ରତ୍ନଭଣ୍ଡାର ପ୍ରସଙ୍ଗରେ ପୁଣିଥରେ ମୁହାଁମୁହିଁ ହେଲେ ବିଜେପି ଓ ବିଜେଡି, କମିସନ ରିପୋର୍ଟ ସାର୍ବଜନୀନ ଦାବି

ଭୁବନେଶ୍ୱର: ଶାସକ ବିଜୁ ଜନତା ଦଳ ବିରୋଧରେ ବିଜେପି ଓ କଂଗ୍ରେସ ଗୁରୁବାର ଜୋରଦାର ଆକ୍ରମଣ କରିଛନ୍ତି। ଯେଉଁସବୁ ପ୍ରସଙ୍ଗ ଉଠାଯାଇଥିଲା ତାହା ପୁରୀ ଶ୍ରୀମନ୍ଦିର ରତ୍ନଭଣ୍ଡାର ସମ୍ପର୍କିତ ଥିଲା ଏବଂ ଉଭୟ ପକ୍ଷ ଜଷ୍ଟିସ ରଘୁବୀର ଦାସ ତଦନ୍ତ କମିସନ ରିପୋର୍ଟ ସାର୍ବଜନୀନ କରିବାକୁ ଦାବି କରିଛନ୍ତି।

ଆଇନଜୀବୀ ତଥା ବିଜେପି ନେତା ପୀତାମ୍ବର ଆଚାର୍ଯ୍ୟ ଗତ ୫ ବର୍ଷ ଧରି ରତ୍ନଭଣ୍ଡାରର ଡୁପ୍ଲିକେଟ ଚାବି ଥିବା ନେଇ ସରକାରଙ୍କ ଦାବି ଉପରେ ସନ୍ଦେହ ପ୍ରକାଶ କରିଛନ୍ତି। ସରକାର ଯଥାଶୀଘ୍ର ଏହି ପ୍ରସଙ୍ଗକୁ ଜନସାଧାରଣଙ୍କୁ ସ୍ପଷ୍ଟ କରନ୍ତୁ ବୋଲି ସେ ଦାବି କରିଛନ୍ତି। ଏଏସ୍ଆଇ ସତ୍ୟପାଠରେ ରତ୍ନଭଣ୍ଡାରର ଜରୁରୀ ମରାମତି କାର୍ଯ୍ୟର ଆବଶ୍ୟକତା ଉଲ୍ଲେଖ କରି ଏହାର ମୂଲ୍ୟବାନ ସାମଗ୍ରୀ ପ୍ରତି ସମ୍ଭାବ୍ୟ ବିପଦର ସଙ୍କେତ ଦେଇଛି।

ସେ ଆହୁରି ମଧ୍ୟ କହିଛନ୍ତି ଯେ ରତ୍ନଭଣ୍ଡାରରୁ ମୂଲ୍ୟବାନ ସାମଗ୍ରୀ ଲୁଟ୍ ହେଉଥିବା ନେଇ ସମସ୍ତେ ସନ୍ଦେହ କରୁଛନ୍ତି। ସେ ନିଜକୁ ମହାପ୍ରଭୁ ଶ୍ରୀଜଗନ୍ନାଥଙ୍କ ପ୍ରକୃତ ଭକ୍ତ ବୋଲି ଦାବି କରୁଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସମ୍ପତ୍ତିକୁ ସୁରକ୍ଷିତ ରଖିବାକୁ  ପୀତାମ୍ବର ଆଚାର୍ଯ୍ୟ ଅନୁରୋଧ କରିଛନ୍ତି। ଏଏସଆଇ ହାଇକୋର୍ଟରେ କହିଛି, ରତ୍ନ ଭଣ୍ଡାର ଅସୁରକ୍ଷିତ ଅଛି। ତେଣୁ ରତ୍ନ ଭଣ୍ଡାର ମରାମତି ପାଇଁ ଏଏସଆଇକୁ ଦାୟିତ୍ୱ ହସ୍ତାନ୍ତର କରନ୍ତୁ ବୋଲି ବିଜେପି ଦାବି କରିଛି। ମୁଖ୍ୟମନ୍ତ୍ରୀ ଯଦି ଜଗନ୍ନାଥଙ୍କ ପ୍ରକୃତ ଭକ୍ତ ତେବେ କଣ କାର୍ଯ୍ୟାନୁଷ୍ଠାନ ନେଇଛନ୍ତି, ଉତ୍ତର ରଖନ୍ତୁ ବୋଲି ସେ କହିଛନ୍ତି।

ସେହିପରି କଂଗ୍ରେସ ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକ ମଧ୍ୟ ବିଜେଡିକୁ ଟାର୍ଗେଟ କରିବା ସହ ରତ୍ନଭଣ୍ଡାର ଭିତରେ ଥିବା ମୂଲ୍ୟବାନ ସାମଗ୍ରୀକୁ ନେଇ ପ୍ରଶ୍ନ ଉଠାଇଛନ୍ତି। ସେ ଜୋର ଦେଇ କହିଥିଲେ ଯେ ତଦନ୍ତ କମିଶନଙ୍କ ରିପୋର୍ଟକୁ ସାର୍ବଜନୀନ କରିବା ସରକାରଙ୍କ ଦାୟିତ୍ୱ ଏବଂ ୫-ଟି ପଦକ୍ଷେପର ପ୍ରଥମ ନୀତି ହେଉଛି ସ୍ୱଚ୍ଛତା। ଯଦି ସରକାର ସ୍ୱଚ୍ଛତାରେ ବିଶ୍ୱାସ କରନ୍ତି, ତେବେ ରିପୋର୍ଟକୁ ସାର୍ବଜନୀନ କରାଯାଉ।

ଅପରପକ୍ଷରେ ବିଜେଡି ଅଭିଯୋଗର ଜବାବ ରଖି ଆଇନ ଅନୁସାରେ ରିପୋର୍ଟ ସାର୍ବଜନୀନ କରାୟିବ ବୋଲି କହିଛି। ବିଜେଡି ବିଧାୟକ ଅମର ପ୍ରସାଦ ଶତପଥୀ କହିଛନ୍ତି, କମିସନ ତାଙ୍କ ରିପୋର୍ଟ ପ୍ରଦାନ କରିଛନ୍ତି, ଏବଂ ଆଇନ ଅନୁଯାୟୀ ଏହା ଜନସାଧାରଣଙ୍କ ପାଇଁ ଉପଲବ୍ଧ କରାଯିବ।

ବିଜେଡି ମୁଖପାତ୍ର ଲେନିନ ମହାନ୍ତି କହିଛନ୍ତି, ରତ୍ନଭଣ୍ଡାର ୧୯୮୫ ରୁ ଆଜି ଯାଏଁ ଖୋଲା ଯାଇନାହିଁ । ପ୍ରବଳ ଅନ୍ତର୍ଦ୍ୱନ୍ଦ ଅଛି। ୨୦୦୦ ରୁ ୨୦୦୯ ପର୍ଯ୍ୟନ୍ତ ଯେବେ ଭାଗିଦାରୀରେ ସରକାର ଥିଲା। ସେତେବେଳେ ଆଇନମନ୍ତ୍ରୀ ବିଶ୍ବଭୂଷଣ ହରିଚନ୍ଦନ ଦାୟିତ୍ୱରେ ଥିଲେ। ସେତେବେଳେ ମଧ୍ୟ ସେ ରତ୍ନଭଣ୍ଡାର ଖୋଲି ନାହାନ୍ତି କିମ୍ବା ଉଦ୍ୟମ କରିନାହାନ୍ତି। ବିଜେଡିକୁ ଟାଣି ଓଟାରି ବଦନାମ କରୁଛି ବିଜେପି। ତେବେ ଯଦି ରାଜନୀତି କରିବା ମୂଳ ଉଦ୍ଦେଶ୍ୟ ତାହାଲେ ଅନେକ ପ୍ରସଙ୍ଗ ରହିଛି। କିନ୍ତୁ ସାଢ଼େ ଚାରିକୋଟି ଓଡ଼ିଆଙ୍କ ପାଇଁ କେବେ କେନ୍ଦ୍ର ପଖରେ କିଛି ଦାବି କାହିଁକି କରୁନି ବିଜେପି ବୋଲି ଲେନିନ ପ୍ରଶ୍ନ କରିଛନ୍ତି।

ଜଷ୍ଟିସ ରଘୁବୀର ଦାସ ତଦନ୍ତ କମିସନଙ୍କ ରିପୋର୍ଟକୁ ସାର୍ବଜନୀନ କରିବା ଦାବି ଜୋର ଧରିଥିବା ବେଳେ ବିରୋଧୀ ଦଳଗୁଡ଼ିକ ସରକାରଙ୍କ ଉତ୍ତରକୁ ଅପେକ୍ଷା କରିଛନ୍ତି।