ପଶ୍ଚିମବଙ୍ଗରେ ବିଜେପିର ମାଷ୍ଟର ଷ୍ଟ୍ରୋକ୍, ମହୁଆ ମୋଇତ୍ରଙ୍କ ବିରୋଧରେ ରାଜ ପରିବାରରୁ ଅମୃତା ରାୟଙ୍କୁ ଟିକେଟ
କୋଲକାତା: ରବିବାର (୨୪ ମାର୍ଚ୍ଚ) ଲୋକସଭା ନିର୍ବାଚନ ପାଇଁ ପ୍ରାର୍ଥୀଙ୍କ ପଞ୍ଚମ ତାଲିକା ପ୍ରକାଶ କରିଛି ବିଜେପି । ଏଥିରେ ୧୧୧ ପ୍ରାର୍ଥୀଙ୍କ ନାମ ରହିଥିବାବେଳେ ଦଳ ପଶ୍ଚିମବଙ୍ଗର କୃଷ୍ଣନଗର ଆସନରୁ ରାଜମାତା ଅମୃତା ରାୟଙ୍କୁ ଟିକେଟ୍ ଦେଇଛି। ସେ ଟିଏମସି ନେତା ମହୁଆ ମୋଇତ୍ରଙ୍କ ସହ ପ୍ରତିଦ୍ୱନ୍ଦ୍ୱିତା କରିବେ। ବିଜେପି ଏହି ଟିକେଟ ଦେଇ ଟିଏମସି ପାଇଁ କଡ଼ା ଚ୍ୟାଲେଞ୍ଜ ଦେଇଛି ଏଥିସହ ସ୍ଥାନୀୟ ଭୋଟ ହାତେଇବାକୁ ଏକ ପ୍ରକାର ମାଷ୍ଟରଷ୍ଟ୍ରୋକ ମାରିଛି ବୋଲି କୁହାଯାଉଛି ।
ଅମୃତା ରୟ ହେଉଛନ୍ତି କୃଷ୍ଣନଗରର ରାଜବାରୀ (ରୟାଲ ପ୍ୟାଲେସ) ର ରାଣୀ ମାତା । ଗତ କିଛି ଦିନ ହେବ ତାଙ୍କ ପ୍ରାର୍ଥୀତ୍ୱକୁ ନେଇ କଳ୍ପନାଜଳ୍ପନା ଲାଗି ରହିଥିଲା । ଅମୃତା ରାୟ ଚଳିତ ମାସ ୨୦ ତାରିଖରେ ବିଜେପିରେ ଯୋଗ ଦେଇଥିଲେ। ସେ ଶୁଭେନ୍ଦୁ ଅଧିକାରୀଙ୍କ ଉପସ୍ଥିତିରେ ବିଜେପିର ସଦସ୍ୟତା ଗ୍ରହଣ କରିଥିଲେ।
ରାଜନୀତିକ ବିଶେଷଜ୍ଞଙ୍କ ମତରେ ଅମୃତା ରାୟଙ୍କ ପ୍ରାର୍ଥୀ ହେବା ପରେ ରାଜ୍ୟରେ ବିଜେପି ମଜବୁତ ସ୍ଥିତିରେ ରହିବ । ବିଜେପି ସୂତ୍ର ଅନୁଯାୟୀ ଜିଲ୍ଲା ନେତୃତ୍ୱ ପ୍ରଥମେ ଅମୃତାଙ୍କୁ ପ୍ରାର୍ଥୀ କରିବାକୁ ଆଗ୍ରହ ପ୍ରକାଶ କରିଥିଲେ ଏବଂ ପରେ ଦଳ ତାଙ୍କ ସହ ଆଲୋଚନା ଆରମ୍ଭ କରିଥିଲେ। ଏଥି ସହିତ ଯେତେବେଳେ ଅମୃତାଙ୍କୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ କୁହାଯାଇଥିଲା ସେତେବେଳେ ସେ ରାଜି ହୋଇଥିଲେ।
ଗତ ନିର୍ବାଚନରେ ଟିଏମସି ନେତା ମୋଇତ୍ର କୃଷ୍ଣନଗର ଆସନରୁ ଜିତିଥିଲେ। ସେ ୬ ଲକ୍ଷରୁ ଅଧିକ ଭୋଟ୍ ପାଇଥିବାବେଳେ ବିଜେପିର କଲ୍ୟାଣ ଚୋୖବେଙ୍କୁ ମୋଟ ୫ ଲକ୍ଷ ଭୋଟ୍ ମିଳିଥିଲା । ୬୩୨୧୮ସଂଖ୍ୟକ ଏକ ବୃହତ୍ ବ୍ୟବଧାନରେ ମହୁଆ ଜିତିଥିଲେ । ଚୋପ୍ରା, ପାଲାସିପାରା ଏବଂ କାଲିଗଞ୍ଜ ବିଧାନସଭାରେ ମହୁଆଙ୍କୁ ବିପୁଳ ଭୋଟ୍ ମିଳିଥିଲା । ତେବେ କିଛି ଦିନହେବ ଟିଏମସି ଏଠାରେ ଦୁର୍ବଳ ହୋଇଯାଇଛି।
କୃଷ୍ଣନଗର ଆସନରେ ଭୋଟ୍ ବ୍ୟବଧାନ ବୃଦ୍ଧି ପାଇଁ ସ୍ଥାନୀୟ, ପ୍ରଭାବଶାଳୀ ତଥା ପରିଚିତ ପ୍ରାର୍ଥୀ ଖୋଜୁଥିଲା ବିଜେପି । ଏଭଳି ପରିସ୍ଥିତିରେ ଅମୃତା ରୟଙ୍କ ନାଁ ଘୋଷଣା ପରେ ଏହି ଅଞ୍ଚଳରେ ବିଜେପି ଆହୁରି ଦୃଢ଼ ହୋଇପାରିବ । ରାଜା କୃଷ୍ଣ ଚନ୍ଦ୍ର ଦେବ ବଙ୍ଗଳାରେ ବହୁତ ପ୍ରସିଦ୍ଧ। ସେ ଅଷ୍ଟାଦଶ ଶତାବ୍ଦୀରେ ତାଙ୍କର ଦୂରଦୃଷ୍ଟି ଶାସନ ପାଇଁ ଜଣାଶୁଣା ଥିଲେ।