Bihar Assembly Election: ପ୍ରାର୍ଥୀଙ୍କ ପ୍ରଥମ ତାଲିକା ପ୍ରକାଶ କଲା ବିଜେପି , ୭୧ ନାଁକୁ ମଞ୍ଜୁରୀ…

ପାଟନା: ବିହାର ବିଧାନସଭା ନିର୍ବାଚନ ୨୦୨୫ ପାଇଁ ପ୍ରାର୍ଥୀ ନା ଘୋଷଣା କଲା ବିଜେପି । ନିର୍ବାଚନ ପାଇଁ ପ୍ରଥମ ତାଲିକାରେ ୭୧ ଜଣ ପ୍ରାର୍ଥୀଙ୍କ ନାଁ ଘୋଷଣା କରିଛି ବିଜେପି । ଏହି ତାଲିକାରେ ଦୁଇ ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ଏବଂ ବିଜୟ କୁମାର ସିହ୍ନାଙ୍କ ନାମ ରହିଛି। ଚୌଧୁରୀ ତାରାପୁରରୁ ପ୍ରାର୍ଥୀ ହୋଇଥିବା ବେଳେ ସିହ୍ନା ଲଖିସରାଇରୁ ନିର୍ବାଚନ ଲଢ଼ିବେ।

ରାଜ୍ୟର ଶାସକ ଜାତୀୟ ଗଣତାନ୍ତ୍ରିକ ମେଣ୍ଟ (NDA)ର ଆସନ ବଣ୍ଟନ ଚୁକ୍ତିନାମାରେ ଚାଲିଥିବା ଅଚଳାବସ୍ଥା ମଧ୍ୟରେ ବିଜେପି ମଙ୍ଗଳବାର ବିହାର ବିଧାନସଭା ନିର୍ବାଚନ ପାଇଁ ୭୧ ଜଣ ପ୍ରାର୍ଥୀଙ୍କ ପ୍ରଥମ ତାଲିକା ପ୍ରକାଶ କରିଛି।

୨୪୩ ସଦସ୍ୟ ବିଶିଷ୍ଟ ବିହାର ବିଧାନସଭା ପାଇଁ ନିର୍ବାଚନ ନଭେମ୍ବର ୬ ଏବଂ ୧୧ ତାରିଖରେ ଦୁଇଟି ପର୍ଯ୍ୟାୟରେ ଅନୁଷ୍ଠିତ ହେବ, ଯେତେବେଳେ ଭୋଟ ଗଣତି ନଭେମ୍ବର ୧୪ ତାରିଖରେ ହେବ।

ଅପରପକ୍ଷେ ଏବେ ବି ବିହାର ନିର୍ବାଚନ ପାଇଁ ଏନଡିଏ ଭିତରେ ଆସନ ବଣ୍ଟନ ବ୍ୟବସ୍ଥା ଏକ ଉଷ୍ମ ବିତର୍କ ହୋଇ ରହିଛି । JDU ଏବଂ ଭାରତୀୟ ଜନତା ପାର୍ଟି ଭିତରେ ନେତାମାନେ ସେମାନଙ୍କ ନିଜ ନିଜ ଉଚ୍ଚକମାଣ୍ଡଙ୍କ ଉପରେ ଅସନ୍ତୁଷ୍ଟ ଥିବା ଦେଖାଯାଉଛି। ଭାଗଲପୁରର JDU ସାଂସଦ ଗୋପାଳ ମଣ୍ଡଳ ଦଳରୁ ଇସ୍ତଫା ଦେବାକୁ ଧମକ ମଧ୍ୟ ଦେଇଛନ୍ତି। ଗିରିରାଜ ସିଂହ ମଧ୍ୟ NDAର ଆସନ ବଣ୍ଟନ ବ୍ୟବସ୍ଥା ଉପରେ ଅସନ୍ତୋଷ ପ୍ରକାଶ କରିଛନ୍ତି। ଏହି ସମୟରେ, ଭାରତୀୟ ଜନତା ପାର୍ଟି (BJP)ର ବିହାର ନିର୍ବାଚନ ପ୍ରଭାରୀ ଏବଂ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରତିକ୍ରିୟା ସାମ୍ନାକୁ ଆସିଛି ।

ଧର୍ମେନ୍ଦ୍ର ପ୍ରଧାନ କହିଛନ୍ତି, “ଜାତୀୟ ଗଣତାନ୍ତ୍ରିକ ମେଣ୍ଟ (NDA) ର ସଦସ୍ୟମାନେ ନିଷ୍ପତ୍ତି ନେଇଛନ୍ତି ଯେ କେଉଁ ଦଳ ୯୯ ପ୍ରତିଶତ ଆସନରେ ଏବଂ କେଉଁ ଆସନରେ ଲଢ଼ିବ।” ସେ ଆହୁରି ମଧ୍ୟ କହିଛନ୍ତି ଯେ ବଳକା ଆସନ ସମ୍ପର୍କରେ ନିଷ୍ପତ୍ତି ବହୁତ ଶୀଘ୍ର ନିଆଯିବ।ପାଟନାରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ଧର୍ମେନ୍ଦ୍ର ପ୍ରଧାନ କହିଛନ୍ତି, “ପାଞ୍ଚଟି NDA ଦଳର ସଦସ୍ୟଙ୍କ ମଧ୍ୟରେ ଆଲୋଚନା ଚାଲିଛି। ପ୍ରାୟ ସମସ୍ତ ଆସନ ଉପରେ ସହମତି ହୋଇଛି।” କେନ୍ଦ୍ର ମନ୍ତ୍ରୀ ଚିରାଗ ପାସୱାନଙ୍କ ଦଳକୁ ଦିଆଯାଇଥିବା କିଛି ଆସନରେ ଜେଡିୟୁ ତାର ପ୍ରାର୍ଥୀମାନଙ୍କୁ ନିର୍ବାଚନ ଚିହ୍ନ ଆବଣ୍ଟନ କରିଛି। ସୂତ୍ର ଅନୁସାରେ ଏନଡିଏ ଭିତରେ ଆସନ ବଣ୍ଟନ ବ୍ୟବସ୍ଥାରେ ସବୁକିଛି ଠିକ୍ ନାହିଁ ଏବଂ କିଛି ଆସନରେ ଏବେ ବି ସମସ୍ୟା ରହିଛି।

ତଥାପି, ଏନଡିଏ ଭିତରେ ଏକତା ପ୍ରଦର୍ଶନ କରିବା ପାଇଁ, ଜେଡିୟୁ କାର୍ଯ୍ୟକାରୀ ସଭାପତି ସଞ୍ଜୟ ଝା, ଲୋକ ଜନଶକ୍ତି ପାର୍ଟି ଅଧ୍ୟକ୍ଷ ଚିରାଗ ପାସୱାନ ଏବଂ ରାଷ୍ଟ୍ରୀୟ ଲୋକମୋର୍ଚ୍ଚାର ଉପେନ୍ଦ୍ର କୁଶୱାହା ଏକ୍ସରେ ଘୋଷଣା କରିଛନ୍ତି ଯେ “ସିଟ୍ ସଂଖ୍ୟା ଚୂଡ଼ାନ୍ତ ହୋଇଛି, ଏବଂ କେଉଁ ଦଳ କେଉଁ ଆସନରେ ଲଢ଼ିବ ସେ ବିଷୟରେ ସକାରାତ୍ମକ ଆଲୋଚନା ଚୂଡ଼ାନ୍ତ ପର୍ଯ୍ୟାୟରେ ଅଛି। ସମସ୍ତ ଏନଡିଏ ଦଳ ମୋଦି ଜୀ ଏବଂ ନୀତିଶ ଜୀଙ୍କ ନେତୃତ୍ୱରେ ସମ୍ପୂର୍ଣ୍ଣ ପ୍ରସ୍ତୁତ ଏବଂ ଏକଜୁଟ।”

ଯାହାକୁ ନେଇ ଧର୍ମେନ୍ଦ୍ର ପ୍ରଧାନ ଦାବି କରିଛନ୍ତି ନଭେମ୍ବର ୧୪ ତାରିଖ ପରେ ବିହାରରେ ପୁଣି ଥରେ ଏନଡିଏ ସରକାର ଗଠନ ହେବ।