ବିଜେପିର ନିର୍ବାଚନ ବ୍ଲୁପ୍ରିଣ୍ଟ: ରୋଡ୍ ସୋ, ରାଲି ଏବଂ ରାଜ୍ୟ ସରକାରଙ୍କ ବିରୋଧରେ ଚାର୍ଜସିଟ୍

ଭୁବନେଶ୍ୱର: ଓଡ଼ିଶାର ୧୪୭ଟି ବିଧାନସଭା ଆସନ ପାଇଁ ଆଗାମୀ ନିର୍ବାଚନ ପାଇଁ ଭାରତୀୟ ଜନତା ପାର୍ଟି (ବିଜେପି) ପ୍ରସ୍ତୁତି ଜୋରଦାର କରିଛି। ନିକଟରେ ଦଳର ନିର୍ବାଚନ ପରିଚାଳନା କମିଟି ବୈଠକରେ ଦଳର ଶୀର୍ଷ ନେତୃବୃନ୍ଦଙ୍କୁ ନେଇ ରୋଡ୍ ସୋ’ ସମେତ ବ୍ୟାପକ ପ୍ରଚାର ରଣନୀତି ପ୍ରସ୍ତୁତ କରାଯାଇଛି।

ବିଜେପିର କେନ୍ଦ୍ରୀୟ ନେତାମାନେ ସମସ୍ତ ବିଧାନସଭା ଓ ଲୋକସଭା ନିର୍ବାଚନ ମଣ୍ଡଳୀରେ ବିଶାଳ ରାଲି ଓ ସଭାକୁ ସମ୍ବୋଧିତ କରିବାର କାର୍ଯ୍ୟକ୍ରମ ରହିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହମନ୍ତ୍ରୀ ଅମିତ ଶାହଙ୍କ ଉପସ୍ଥିତିରେ ହେବାକୁ ଥିବା ବୈଠକକୁ ମଧ୍ୟ ଦଳ ଚୂଡ଼ାନ୍ତ ରୂପ ଦେଉଛି।

ପ୍ରଚାର ରଣନୀତି ଅନୁଯାୟୀ ବିଜେପି ନିଜର ଆଭିମୁଖ୍ୟ ଜନସାଧାରଣଙ୍କୁ ଜଣାଇବା ପାଇଁ ରାଜ୍ୟ ସରକାରଙ୍କ ବିରୋଧରେ ଚାର୍ଜସିଟ୍ ପ୍ରସ୍ତୁତ କରିବାକୁ ଯୋଜନା କରିଛି। ବିଜେଡି ସହ ମେଣ୍ଟ ପ୍ରତ୍ୟାଖ୍ୟାନ ପରେ ନିର୍ବାଚନ ପରିଚାଳନା କମିଟି ବୈଠକରେ ବିଜେପିର ପ୍ରଚାର ରଣନୀତି ସ୍ଥିର ହୋଇଥିବା ବେଳେ ଓଡ଼ିଶାରେ ବିଜେପି ମିଶନରେ ଥିବା ଜଣାପଡିଛି ।

ପ୍ରଚାର ଆରମ୍ଭ କରିବା ପାଇଁ ୨୧ଟି ଲୋକସଭା ଆସନ ଓ ୧୪୭ଟି ବିଧାନସଭା ଆସନରେ ବିଶାଳ ରାଲି କରାଯିବାର ଯୋଜନା ରହିଛି। ଏହି ରାଲିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମନ୍ତ୍ରୀ ଅମିତ ଶାହା, ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଙ୍କ ସମେତ ଦଳର ଶୀର୍ଷ ନେତାମାନେ ଯୋଗଦେବେ। ପ୍ରଧାନମନ୍ତ୍ରୀ ଓଡ଼ିଶାରେ ରୋଡ୍ ସୋ’ କରିବେ ବୋଲି ଆଶା କରାଯାଉଛି।

ତେବେ ବିଜେଡି ବିଧାୟକ ସୁଧୀର ସାମଲଙ୍କ ମତରେ ଏହି ବୈଠକ ବିଜେଡିର ସ୍ଥିତିକୁ ପ୍ରଭାବିତ କରିବ ନାହିଁ ଏବଂ ଦଳ ସର୍ବଦା ଓଡ଼ିଶାବାସୀଙ୍କ ସହ ରହିଛି ଏବଂ ମିଶନ ୨୦୩୬ ଉପରେ ଗୁରୁତ୍ୱ ଦେଉଛି ।

ସରକାରଙ୍କ ବିରୋଧରେ ବିଜେପିର ଚାର୍ଜସିଟରେ ଶାସନ ଅପହରଣ, କଠୋର ସରକାର, ଅଣ ଓଡ଼ିଆ ଅମଲାଙ୍କ ପ୍ରଶାସନ, ମହିଳା ସମ୍ବନ୍ଧୀୟ ମାମଲାରେ ବିଜେଡି ନେତାଙ୍କ ସମ୍ପୃକ୍ତି ଆଦି ପ୍ରସଙ୍ଗକୁ ଦର୍ଶାଯିବ। ଆୟୁଷ୍ମାନ ଭାରତ ଭଳି ମୋଦୀ ସରକାରଙ୍କ ବିଭିନ୍ନ କଲ୍ୟାଣକାରୀ ଯୋଜନାରେ ରାଜ୍ୟ ସରକାର ଲାଗୁନକରିବା, ବେକାରୀ ସ୍ଥିତି, ଶିକ୍ଷକ ଓ ଡାକ୍ତରଙ୍କ ଅଭାବ ଏବଂ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ଘରୋଇ ହସ୍ପିଟାଲ ପ୍ରତି ପକ୍ଷପାତିତା ଉପରେ ଦଳ ଗୁରୁତ୍ୱ ଦେବ।