ଓ୍ବାକଫ୍ ଉପରେ କାହିଁକି କିଛି କହିନଥିଲେ ରାହୁଲ?, ପ୍ରଶ୍ନ କଲେ ମାୟାବତୀ

ନୂଆଦିଲ୍ଲୀ: ଆଇନରେ ପରିଣତ ହେଲାଣି ନୂଆ ଓ୍ବାକଫ୍ ଆଇନ୍, ହେଲେ ଏବେ ବି ଥମିନି ବିରୋଧୀଙ୍କ ତର୍ଜମା ଏବଂ ଆଲୋଚନା । ନୂତନ ୱାକଫ ଆଇନକୁ ନେଇ ଏବେ ବି ରାଜନୀତି ଉଷ୍ମ ରହିଛି । ଏହି ସମୟରେ, ବହୁଜନ ସମାଜ ପାର୍ଟି, ବିଏସପି ମୁଖ୍ୟ ଏବଂ ପୂର୍ବତନ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ମାୟାବତୀ, ଓ୍ବାକଫ୍ ଆଇନ ନେଇ କଂଗ୍ରେସ ଏବଂ ବିଜେପି ସରକାର ଉପରେ ବର୍ଷିଛନ୍ତି । ୱାକଫ ଆଇନ ଉପରେ ରାହୁଲ ଗାନ୍ଧୀ କାହିଁକି ଏପର୍ଯ୍ୟନ୍ତ ନିରବ ରହିଛନ୍ତି ସେନେଇ ପ୍ରଶ୍ନ ଉଠାଇଛନ୍ତି ।

ଏନେଇ ମାୟାବତୀ ନିଜ ଏକ୍ସରେ ଲେଖିଛନ୍ତି, ଲୋକସଭାରେ ୱାକଫ ସଂଶୋଧନ ବିଲ୍ ଉପରେ ଦୀର୍ଘ ଆଲୋଚନା ସମୟରେ ବିରୋଧୀ ଦଳ ନେତା କିଛି ନ କହିବା, ଅର୍ଥାତ୍ ସିଏଏ ପରି ସାମ୍ବିଧାନିକ ଉଲ୍ଲଂଘନର ମାମଲା ବୋଲି ବିରୋଧୀଙ୍କ ଅଭିଯୋଗ ସତ୍ତ୍ୱେ ଏଥିରେ ରାହୁଲ ନୀରବ ରହିବା କ’ଣ ଠିକ୍? । ଏହାକୁ ନେଇ ମୁସଲିମ ସମ୍ପ୍ରଦାୟରେ କ୍ରୋଧ ଏବଂ ସେମାନଙ୍କ ଇଣ୍ଡି ମେଣ୍ଟରେ ଅସ୍ଥିରତା ସୃଷ୍ଟି ହେବା ସ୍ବାଭାବିକ୍ । ଏଥିସହିତ ସେ ଏହାବି କହିଛନ୍ତି, ଯାହା ହେଉନା କାହିଁକି, ଦେଶରେ ବହୁଜନଙ୍କ ସ୍ୱାର୍ଥ ଏବଂ କଲ୍ୟାଣ ଏବଂ ସରକାରୀ ଚାକିରି ଏବଂ ଶିକ୍ଷା ଇତ୍ୟାଦିରେ ସଂରକ୍ଷଣର ଅଧିକାରକୁ ପ୍ରଭାବହୀନ ଏବଂ ନିଷ୍କ୍ରିୟ କରି ବହୁଜନଙ୍କୁ ବଞ୍ଚିତ ରଖିବା କ୍ଷେତ୍ରରେ କଂଗ୍ରେସ, ବିଜେପି ଭଳି ଦଳ ସମାନ ଭାବରେ ଦୋଷୀ । ଧାର୍ମିକ ସଂଖ୍ୟାଲଘୁମାନଙ୍କୁ ମଧ୍ୟ ସେମାନଙ୍କର ପ୍ରତାରଣାରୁ ରକ୍ଷା ପାଇବା ଆବଶ୍ୟକ । ସେମାନଙ୍କ ଏପରି ମନୋଭାବ ଯୋଗୁଁ, ଉତ୍ତର ପ୍ରଦେଶରେ ବହୁଜନଙ୍କ ଅବସ୍ଥା ପ୍ରତ୍ୟେକ କ୍ଷେତ୍ରରେ ବହୁତ ଖରାପ ଏବଂ ଦୁଃଖଦ, ଯେତେବେଳେ ବିଜେପି ନେତାମାନେ ଆଇନକୁ ନିଜ ହାତରେ ନେବାକୁ ମୁକ୍ତ । ଏହା ବ୍ୟତୀତ, ବିଦ୍ୟୁତ୍ ଏବଂ ଅନ୍ୟାନ୍ୟ ସରକାରୀ ବିଭାଗରେ ବଢ଼ୁଥିବା ଘରୋଇକରଣ ଯୋଗୁଁ ପରିସ୍ଥିତି ଚିନ୍ତାଜନକ । ସରକାର ଜନ କଲ୍ୟାଣର ସାମ୍ବିଧାନିକ ଦାୟିତ୍ୱକୁ ସଠିକ୍ ଭାବରେ ପାଳନ କରିବା ଉଚିତ ବୋଲି ଅଭିଯୋଗ କରିଛନ୍ତି ବିଏସପି ମୁଖିଆ ।

ଏଥିସହିତ ମାୟାବତୀ ସରକାରଙ୍କୁ ଚେତାବନୀ ବି ଦେଇଛନ୍ତି । କହିଛନ୍ତି, ସଂସଦରେ ୱାକଫ ସଂଶୋଧନ ବିଲ୍ ଉପରେ ଶାସକ ଏବଂ ବିରୋଧୀ ଦଳଗୁଡ଼ିକ ଆଲୋଚନା ପରେ, ଏହି ନିଷ୍କର୍ଷ ଆସିଛି । କିନ୍ତୁ ଯଦି କେନ୍ଦ୍ର ସରକାର ଏହି ବିଲ୍ କୁ ବୁଝିବା ପାଇଁ ଲୋକଙ୍କୁ ଆହୁରି କିଛି ସମୟ ଦେଇଥାନ୍ତେ ଏବଂ ଏହି ବିଲ୍ ଆଣିବା ପୂର୍ବରୁ ସେମାନଙ୍କର ସମସ୍ତ ସନ୍ଦେହକୁ ଦୂର କରିଥାନ୍ତେ, ତେବେ ଏହା ଭଲ ହୋଇଥାନ୍ତା । ଏହା ଦୁଃଖର ବିଷୟ ଯେ ସରକାର ଏହି ବିଲ୍ କୁ ବହୁତ ଜଲଦିରେ ପାସ୍ କରିଛନ୍ତି ଏବଂ ଏହା ଠିକ୍ ନୁହେଁ । ଏବେ ଯଦି ସରକାର ଏହି ବିଲ୍ ପାସ୍ ହେବା ପରେ ଏହାର ଦୁରୁପଯୋଗ କରନ୍ତି, ତେବେ ବିଏସପି ମୁସଲିମ ସମ୍ପ୍ରଦାୟକୁ ପୂର୍ଣ୍ଣ ସମର୍ଥନ କରିବ ବୋଲି ସେ କହିଛନ୍ତି ।

ସେପଟେ ସଂସଦରେ କିଛି ନକହି ଗତ ବୁଧବାର ୱାକଫ ଆଇନକୁ ସମାଲୋଚନା କରିଛନ୍ତି ରାହୁଲ ଗାନ୍ଧୀ । ରାହୁଲ ୱାକଫ (ସଂଶୋଧନ) ଆଇନକୁ ସମାଲୋଚନା କରି ଏହାକୁ ସମ୍ବିଧାନ ବିରୋଧୀ ଏବଂ ଧାର୍ମିକ ସ୍ୱାଧୀନତା ଉପରେ ଆକ୍ରମଣ ବୋଲି କହିଛନ୍ତି । ଏଥିସହିତ ଚେତାବନୀ ବି ଦେଇଥିଲେ ଯେ, ବହୁତ ଶୀଘ୍ର ଶାସକ ବିଜେପି ଏବଂ ଆରଏସଏସ ଶିଖ ଏବଂ ଖ୍ରୀଷ୍ଟିଆନଙ୍କ ସମେତ ଅନ୍ୟାନ୍ୟ ସଂଖ୍ୟାଲଘୁଙ୍କ ଅଧିକାରକୁ ଟାର୍ଗେଟ କରିବା ଆରମ୍ଭ କରିବେ ।