ଔଷଧ ଏବଂ ଚିକିତ୍ସା ଉପକରଣ ପାଇଁ ୧୪ ହଜାର କୋଟି ଟଙ୍କା ମଞ୍ଜୁରୀ

ନୂଆଦିଲ୍ଲୀ: କେନ୍ଦ୍ର ସରକାର କରୋନା ସହ ମୁକାବିଲା କରିବା ପାଇଁ ଏକ ନୂଆ ପଦକ୍ଷେପ ନେଇଛନ୍ତି । ଦେଶରେ ଔଷଧ ଏବଂ ମେଡିକାଲ ଉପକରଣର ଘରୋଇ ଉତ୍ପାଦନ ବୃଦ୍ଧି ପାଇଁ ୧୪ ହଜାର କୋଟି ଟଙ୍କା ମଂଜୁରୀ ହୋଇଛି । ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ୍ ବୈଠକରେ ଏହି ସ୍ୱତନ୍ତ୍ର ପ୍ୟାକେଜକୁ ଅନୁମୋଦନ ମିଳିଛି ।
କେନ୍ଦ୍ରମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି ଯେ, ଦେଶରେ ୪ଟି ରାଜ୍ୟରେ ମେଡିକାଲ ଉପକରଣ ପାର୍କ ନିର୍ମାଣ କରାଯିବ । ଏଥିପାଇଁ ୩୪୨୦ କୋଟି ଖର୍ଚ୍ଚ ହେବ । ସେହିପରି ଔଷଧିୟ ପାର୍କ ନିର୍ମାଣ ପାଇଁ ୩ ହଜାର କୋଟି ଟଙ୍କା ଖର୍ଚ୍ଚ ହେବ । ଏପିଆଇକୁ ପ୍ରୋତ୍ସାହିତ କରିବା ପାଇଁ ୬୯୦୦ କୋଟି ଟଙ୍କା ଖର୍ଚ୍ଚ ହେବ ବୋଲି ସେ କହିଛନ୍ତି ।
ସେ ଆହୁରି କହିଛନ୍ତି ଯେ, ଭାରତରେ ଔଷଧ ତିଆରି କରିବା ପାଇଁ ୮୦ ପ୍ରତିଶତ ଏପିଆଇ ବିଦେଶରୁ ଆସୁଛି । ତେବେ ଭାରତରେ ଔଷଧ ପାର୍କ ତିଆରି ପାଇଁ ସରକାର ପ୍ରାୟ ୧୪ ହଜାର କୋଟି ଖର୍ଚ୍ଚ କରିବେ । ଏହାଦ୍ୱାରା ଭାରତରେ ଔଷଧ ଏବଂ ଡାକ୍ତରୀ ଉପକରଣର ଅଭାବ ହେବ ନାହିଁ ବୋଲି କେନ୍ଦ୍ରମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି ।