ପ୍ରଥମ ଥର ପାଇଁ କାନାଡା ଗୁଇନ୍ଦା ସଂସ୍ଥା କଲା ସ୍ୱୀକାର; ଦେଶରେ ଖାଲିସ୍ତାନୀ ଆତଙ୍କବାଦୀ ଅଛନ୍ତି ସକ୍ରିୟ

ନୂଆଦିଲ୍ଲୀ:କାନାଡାର ଗୁଇନ୍ଦା ସଂସ୍ଥା କାନାଡିଆନ ସିକ୍ୟୁରିଟି ଇଣ୍ଟେଲିଜେନ୍ସ ସର୍ଭିସ (CSIS) ଏକ ରିପୋର୍ଟରେ ବଡ଼ ଖୁଲାସା କରିଛି। କାନାଡା ପ୍ରଥମ ଥର ପାଇଁ ସ୍ୱୀକାର କରିଛି ଯେ ଖାଲିସ୍ତାନୀ ଆତଙ୍କବାଦୀମାନେ ଭାରତରେ ହିଂସା- ଆତଙ୍କବାଦ ପ୍ରସାର ପାଇଁ କାନାଡା ମାଟି ବ୍ୟବହାର କରୁଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ G7 ଶିଖର ସମ୍ମିଳନୀରେ କାନାଡାର ନୂତନ ପ୍ରଧାନମନ୍ତ୍ରୀ ମାର୍କ କାର୍ନିଙ୍କୁ ଭେଟିବା ପରେ ଏହି ରିପୋର୍ଟ ପ୍ରକାଶ ପାଇଛି ।

CSIS ବୁଧବାର ଦିନ ନିଜର ବାର୍ଷିକ ରିପୋର୍ଟ ପ୍ରକାଶ କରିଛି, ଯେଉଁଥିରେ କାନାଡାର ଜାତୀୟ ସୁରକ୍ଷା ପ୍ରତି କିଛି ପ୍ରମୁଖ ଚିନ୍ତା ଏବଂ ବିପଦର ରୂପରେଖା ଦିଆଯାଇଛି।

କାନାଡାର ସର୍ବୋଚ୍ଚ ଗୁଇନ୍ଦା ସଂସ୍ଥା କାନାଡିଆନ୍ ସିକ୍ୟୁରିଟି ଇଣ୍ଟେଲିଜେନ୍ସ ସର୍ଭିସ୍ (CSIS) ପ୍ରକାଶ କରିଛି ଯେ, ଖାଲିସ୍ତାନମାନେ କାନାଡା ମାଟିକୁ ବ୍ୟବହାର କରି ମୁଖ୍ୟତଃ ଭାରତକୁ ଟାର୍ଗେଟ କରି ହିଂସାର ପ୍ରୋତ୍ସାହନ, ପାଣ୍ଠି ସଂଗ୍ରହ ଏବଂ ଯୋଜନା କରୁଛନ୍ତି। ପ୍ରଥମ ଥର ପାଇଁ CSIS ଏହାକୁ ଆନୁଷ୍ଠାନିକ ଭାବରେ ସାର୍ବଜନୀନ ଭାବରେ ପ୍ରକାଶ କରିଛି।

ସେହିପରି, ଏହି ରିପୋର୍ଟର ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ ପ୍ରଥମ ଥର ପାଇଁ କାନାଡା ଆନୁଷ୍ଠାନିକ ଭାବରେ ଖାଲିସ୍ତାନୀ ଗୋଷ୍ଠୀ ପାଇଁ ‘ଉଗ୍ରବାଦ’ ଶବ୍ଦ ବ୍ୟବହାର କରିଛି। ଏହା ଏକ ବଡ଼ ପରିବର୍ତ୍ତନ, କାରଣ ପୂର୍ବରୁ କାନାଡା ସରକାର ଏବଂ ଏଜେନ୍ସିଗୁଡ଼ିକ ଏହି ପ୍ରସଙ୍ଗକୁ ହାଲୁକା ଭାବରେ ନେଉଥିଲେ।କିନ୍ତୁ ଏବେ CSIS ର ଏହି ସ୍ପଷ୍ଟ ସ୍ୱୀକାରୋକ୍ତି ସହିତ, ଏହା ସ୍ପଷ୍ଟ ହୋଇଯାଇଛି ଯେ ଖାଲିସ୍ତାନୀ ଆତଙ୍କବାଦୀମାନେ କେବଳ ଭାରତ ପାଇଁ ନୁହେଁ ବରଂ କାନାଡାର ନିଜ ସୁରକ୍ଷା ପାଇଁ ମଧ୍ୟ ବିପଦ ।

୧୯୮୫ ମସିହାରେ ଖାଲିସ୍ତାନୀ ଆତଙ୍କବାଦୀମାନେ ଏୟାର ଇଣ୍ଡିଆର ବିମାନ ନମ୍ବର AI 182 ଉପରେ ବୋମା ବିସ୍ଫୋରଣ କରିଥିଲେ, ଯେଉଁଥିରେ ୩୨୯ ଜଣ ପ୍ରାଣ ହରାଇଥିଲେ। ଏହା କାନାଡାର ଇତିହାସରେ ସବୁଠାରୁ ବଡ଼ ଆତଙ୍କବାଦୀ ଆକ୍ରମଣ ଥିଲା। ଏହା ସତ୍ତ୍ୱେ, କାନାଡା ସରକାର ପ୍ରାୟତଃ ଖାଲିସ୍ତାନୀ ସମର୍ଥକମାନଙ୍କ ପ୍ରତି ନରମ ମନୋଭାବ ଗ୍ରହଣ କରିଛନ୍ତି, ଯାହାକୁ ଭାରତ ସର୍ବଦା ସମାଲୋଚନା କରିଆସିଛି।

ବର୍ତ୍ତମାନ ପ୍ରଧାନମନ୍ତ୍ରୀ ମୋଦୀ ଏବଂ ମାର୍କ କାର୍ନିଙ୍କ ମଧ୍ୟରେ ହୋଇଥିବା ବୈଠକରେ ଉଭୟ ନେତା ଉତ୍ତେଜନା ହ୍ରାସ କରିବା ଦିଗରେ ପଦକ୍ଷେପ ନେବା ବିଷୟରେ ଆଲୋଚନା କରିଥିଲେ। ଏହି ବୈଠକରେ, ଉଭୟ ଦେଶ ଜଣେ ନୂତନ ହାଇ କମିଶନରଙ୍କୁ ନିଯୁକ୍ତି ଦେବା ଏବଂ ଅଟକି ରହିଥିବା ବାଣିଜ୍ୟ ଆଲୋଚନାକୁ ପୁଣି ଆରମ୍ଭ କରିବାକୁ ସହମତ ହୋଇଥିଲେ। ଏହି ବୈଠକ ପରେ ଏହି CSIS ରିପୋର୍ଟ ଆସିଛି, ଯାହା ସୂଚାଇ ଦେଉଛି ଯେ କାନାଡା ଏବେ ତାର ଭୁଲ ସଂଶୋଧନ କରିବାକୁ ଚେଷ୍ଟା କରୁଛି।