ଶାହାଜାହାନଙ୍କୁ ରିମାଣ୍ଡରେ ନେବାକୁ କୋର୍ଟ ଅନୁମତି ଦେବା ପରେ ପଶ୍ଚିମବଙ୍ଗ ପୁଲିସ ମୁଖ୍ୟାଳୟରେ ସିବିଆଇ

କୋଲକାତା: ହାଇକୋର୍ଟଙ୍କ ନୂଆ ନିର୍ଦ୍ଦେଶ ପରେ ନିଲମ୍ବିତ ଟିଏମସି ନେତା ଶେଖ ଶାହାଜାହାନଙ୍କୁ ରିମାଣ୍ଡରେ ନେବା ପାଇଁ ସିବିଆଇର ଏକ ଟିମ୍ ବୁଧବାର ବେଙ୍ଗଲ ପୁଲିସ ସିଆଇଡି ମୁଖ୍ୟାଳୟରେ ପହଞ୍ଚିଛି। ମିଳିଥିବା ସୂଚନା ଅନୁଯାୟୀ, ଶାହଜାହାନଙ୍କୁ ଏସଏସକେଏମ ହସ୍ପିଟାଲରେ ଡାକ୍ତରୀ ପରୀକ୍ଷା ପାଇଁ ନିଆଯାଇଛି।

ଗତ ଜାନୁଆରି ମାସରେ ସନ୍ଦେଶଖାଲିରେ ଇଡି ଅଧିକାରୀଙ୍କ ଏକ ଟିମ୍ ଉପରେ ଆକ୍ରମଣ କରିବା ପାଇଁ ଉସକେଇଥିବା ଅଭିଯୁକ୍ତ ଶେଖ୍ ଶାଜାହାନଙ୍କୁ ଅପରାହ୍ନ ୪ଟା ୧୫ ସୁଦ୍ଧା ସିବିଆଇକୁ ହସ୍ତାନ୍ତର କରିବାକୁ କୋଲକାତା ହାଇକୋର୍ଟ ପଶ୍ଚିମବଙ୍ଗ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।

ସନ୍ଦେଶଖାଲିରେ ଜମି ହଡ଼ପ ଓ ଯୌନ ନିର୍ଯାତନା ଅଭିଯୁକ୍ତ ଶାଜାହାନଙ୍କ ହେପାଜତ ହସ୍ତାନ୍ତର କରିନଥିବାରୁ ପଶ୍ଚିମବଙ୍ଗ ସରକାରଙ୍କୁ କୋର୍ଟ ଅବମାନନା ମାମଲା ଅଭିଯୋଗ କରି ସିବିଆଇ ହାଇକୋର୍ଟଙ୍କ ନିକଟରେ ଦ୍ବାରସ୍ଥ ହୋଇଛି। ଏହାପରେ କୋର୍ଟ ପୁଣିଥରେ ସିବିଆଇ ହେପାଜତକୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି।

ସିବିଆଇ ଦାବି କରିଛି ଯେ ଶେଖ୍ ଶାଜାହାନଙ୍କୁ ତଦନ୍ତକାରୀ ସଂସ୍ଥାକୁ ହସ୍ତାନ୍ତର କରିବାକୁ ହାଇକୋର୍ଟଙ୍କ ମଙ୍ଗଳବାର ନିର୍ଦ୍ଦେଶକୁ ବେଙ୍ଗଲ ସିଆଇଡି ପାଳନ କରିନାହିଁ। ଇଡି ପକ୍ଷରୁ ଅତିରିକ୍ତ ସଲିସିଟର ଜେନେରାଲ ଏସଭି ରାଜୁ ଅଦାଲତଙ୍କୁ କହିଛନ୍ତି ଯେ ହାଇକୋର୍ଟଙ୍କ ଆଦେଶ ବିରୋଧରେ ସରକାର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିବାରୁ ଶାହାଜାହାନଙ୍କୁ ହେପାଜତରେ ଦେଇ ନାହାନ୍ତି।

ହାଇକୋର୍ଟଙ୍କ ଆଦେଶ ଉପରେ ରୋକ୍ ଲଗାଇବା ପାଇଁ କୌଣସି ଆଦେଶ ନାହିଁ। ଏହା ହାଇକୋର୍ଟଙ୍କ ନିର୍ଦ୍ଦେଶର ଅବମାନନା ବୋଲେ ସେ କହିଛନ୍ତି।

ସିବିଆଇ ପକ୍ଷରୁ ହାଜର ହୋଇଥିବା ଓକିଲ କହିଛନ୍ତି ଯେ ତଦନ୍ତକାରୀ ସଂସ୍ଥା ପଶ୍ଚିମବଙ୍ଗର ସମସ୍ତ ଅଧିକାରୀଙ୍କୁ ହାଇକୋର୍ଟଙ୍କ ଆଦେଶ ଜଣାଇଛି। ସିବିଆଇ ଓକିଲ କହିଛନ୍ତି, ସିଆଇଡିର ଅତିରିକ୍ତ ଡିଜିଙ୍କ ସମେତ ଡିଜିପି, ମୁଖ୍ୟ ଶାସନ ସଚିବଙ୍କୁ ଚିଠି ପଠାଯାଇଛି। ଓକିଲ ଡିଜିପିଙ୍କ ଏକ ଚିଠିକୁ ଉଦାହରଣ ଦେଇ କହିଛନ୍ତି ଯେଉଁଥିରେ କୁହାଯାଇଛି, ଏହି ମାମଲା ସୁପ୍ରିମକୋର୍ଟରେ ଉଲ୍ଲେଖ କରାଯାଇଛି ଏବଂ ସିବିଆଇକୁ ଏହାର ସମାଧାନ ପାଇଁ ଅପେକ୍ଷା କରିବାକୁ କହିଛନ୍ତି।

ମଙ୍ଗଳବାର ଦିନ କଲିକତା ହାଇକୋର୍ଟ ବେଙ୍ଗଲ ପୋଲିସକୁ ସମ୍ପୂର୍ଣ୍ଣ ପକ୍ଷପାତି ବୋଲି କହିବା ସହ ଜାନୁଆରୀରେ ସନ୍ଦେଶଖାଲିରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଅଧିକାରୀଙ୍କ ଉପରେ ହୋଇଥିବା ଆକ୍ରମଣର ତଦନ୍ତ ସିବିଆଇକୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି।