କରୋନା ମୁକାବିଲା: ଓଡ଼ିଶା ଓ କେରଳକୁ କେନ୍ଦ୍ର ସରକାରଙ୍କ ପ୍ରଶଂସା

ନୂଆଦିଲ୍ଲୀ: ଦେଶରେ ଦିନକୁ ଦିନ ମହାମାରୀ କରୋନା ତାର କାୟା ବିସ୍ତାର କରିଚାଲିଛି । ଏହାରି ଭିତରେ ଓଡ଼ିଶା ଓ କେରଳର କରୋନା ମହାମାରୀ ପରିଚାଳନାକୁ କେନ୍ଦ୍ର ସରକାର ପ୍ରଶଂସା କରିଛନ୍ତି । ଉତ୍ତମ ପରିଚାଳନା ଯୋଗୁଁ ଏହି ଦୁଇ ରାଜ୍ୟର ଦ୍ୱିଗୁଣିତ ହାର ବା ଡବଲିଂ ରେଟ ଦେଶରେ ସର୍ବୋତ୍ତମ ଅଛି ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ଲବ ଅଗ୍ରଓ୍ୱାଲ କହିଛନ୍ତି ।
ସେ କହିଛନ୍ତି ଯେ, ଜାତୀୟ ଡବଲିଂ ହାର ୭.୫ ଦିନକୁ ବୃଦ୍ଧି ପାଇଥିବାବେଳେ ଓଡ଼ିଶା ଓ କେରଳରେ ତାହା ପ୍ରାୟ ୩୦ ଦିନରୁ ଅଧିକ ରହିଛି । ଅର୍ଥାତ ପ୍ରତି ୩୦ ଦିନରେ ଓଡ଼ିଶା ଓ କେରଳର ପଜିଟିଭ ସଂଖ୍ୟା ଦୁଇଗୁଣ ହେଉଛି । ଦେଶର ୧୮ଟି ରାଜ୍ୟର ଡବଲିଂ ହାର ଜାତୀୟ ହାରଠାରୁ ଅଧିକ ରହିଛି ।
ଗତ ୨୪ ଘଣ୍ଟାରେ ଦେଶରେ ୧୫୫୩ଟି ନୂଆ ମାମଲା ଜଣାପଡ଼ିଛି ଓ ୩୬ ଜଣ ମୃତ୍ୟୁବରଣ କରିଛନ୍ତି । ଏହା ସହିତ ଦେଶର ମୋଟ ସଂଖ୍ୟା ୧୭,୨୬୫କୁ ବୃଦ୍ଧି ପାଇଛି ।