ଭୁବନେଶ୍ୱର: ଏଣିକି ମନଇଚ୍ଛା ଗାଡିରେ ଲଗାଇପାରିବେନି ମୋଡିଫାଏଡ୍ ସାଇଲେନ୍ସର। ମୋଡିଫାଏଡ୍ ସାଇଲେନ୍ସର ଲଗାଇ ଅତ୍ୟଧିକ ଶବ୍ଦ କରୁଥିବା ଗାଡ଼ି ଉପରେ ନଜର ରଖାଯିବ। ବିକଟାଳ ଶବ୍ଦ କଲେ ଗାଡ଼ି ଭିଡ଼ି ନେବ ପୋଲିସ। ଶବ୍ଦ ପ୍ରଦୂଷଣ ରୋକିବା ପାଇଁ ଭୁବନେଶ୍ୱର-କଟକ କମିଶନରେଟ୍ ପୋଲିସ ପକ୍ଷରୁ ଏକ କଠୋର ପଦକ୍ଷେପ ଗ୍ରହଣ କରାଯାଇଛି। ଏନେଇ ଜନସାଧାରଣଙ୍କ ସହଯୋଗ ଲୋଡ଼ିଲା ପୋଲିସ। ଜାରି ହେଲା ହ୍ଵାଟ୍ସଆପ ନମ୍ବର।
ଆଇନ ଉଲ୍ଲଂଘନ କରି ଅତ୍ୟଧିକ ଏବଂ ଅଯଥା ଶବ୍ଦ କରୁଥିବା ମୋଡିଫାଏଡ୍ ସାଇଲେନ୍ସର ବ୍ୟବହାର କରୁଥିବା ଗାଡ଼ିଗୁଡ଼ିକ ବିଷୟରେ ସିଧାସଳଖ ଅଭିଯୋଗ କରିବାକୁ ପୋଲିସ ପକ୍ଷରୁ ସାଧାରଣ ଜନତାଙ୍କୁ ଏକ ସାର୍ବଜନୀନ ବିଜ୍ଞପ୍ତି ଜାରି କରାଯାଇଛି। କମିଶନରେଟ୍ ପୋଲିସ ଦ୍ୱାରା ଜାରି କରାଯାଇଥିବା ବିଜ୍ଞପ୍ତି ଅନୁଯାୟୀ, ବର୍ତ୍ତମାନ ସାଧାରଣ ଲୋକମାନେ ଶବ୍ଦ ପ୍ରଦୂଷଣକୁ ନିୟନ୍ତ୍ରଣ କରିବାରେ ସାହାଯ୍ୟ କରିପାରିବେ। ନିୟମ ଉଲ୍ଲଂଘନକାରୀ ଗାଡ଼ିର ଫଟୋ କିମ୍ବା ଭିଡିଓ ଉତ୍ତୋଳନ କରି ଲୋକମାନେ ସିଧାସଳଖ ପୋଲିସକୁ ପଠାଇ ପାରିବେ। ଏଥିପାଇଁ ପୋଲିସ ପକ୍ଷରୁ ଏକ ସ୍ୱତନ୍ତ୍ର ହ୍ୱାଟ୍ସଆପ୍ ନମ୍ବର +୯୧ ୮୨୮୦୩ ୩୮୩୦୨ ଜାରି କରାଯାଇଛି। ଲୋକମାନେ ଉକ୍ତ ଗାଡ଼ିର ରେଜିଷ୍ଟ୍ରେସନ୍ ନମ୍ବର ସହିତ ପ୍ରମାଣ ସ୍ୱରୂପ ଫଟୋ ବା ଭିଡିଓ ଏହି ନମ୍ବରରେ ସେୟାର କରିବାକୁ କୁହାଯାଇଛି।
ଶବ୍ଦ ପ୍ରଦୂଷଣକୁ ନିୟନ୍ତ୍ରଣ କରିବା ଏବଂ ସହରକୁ ସମସ୍ତଙ୍କ ପାଇଁ ସୁରକ୍ଷିତ ତଥା ଶାନ୍ତମୟ ପରିବେଶରେ ପରିଣତ କରିବା ଉଦ୍ଦେଶ୍ୟରେ ଏହି ଉଦ୍ୟମ ଆରମ୍ଭ ହୋଇଛି। ଏହି ପ୍ରସଙ୍ଗରେ ସୂଚନା ପ୍ରଦାନ କରୁଥିବା ବ୍ୟକ୍ତିଙ୍କ ପରିଚୟ ସମ୍ପୂର୍ଣ୍ଣ ଗୋପନ ରଖାଯିବ ବୋଲି ପୋଲିସ ପକ୍ଷରୁ ପ୍ରତିଶ୍ରୁତି ଦିଆଯାଇଛି। ମିଳିଥିବା ସୂଚନା ଆଧାରରେ ପ୍ରଶାସନ ଉକ୍ତ ଗାଡ଼ି ଚାଳକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବ। ଏହି ଅଭିଯାନକୁ ସଫଳ କରିବା ପାଇଁ କମିଶନରେଟ୍ ପୋଲିସ ସାଧାରଣ ଜନତାଙ୍କ ପୂର୍ଣ୍ଣ ସହଯୋଗ କାମନା କରିଛି।