ନୂଆଦିଲ୍ଲୀ: ଗୋଟିଏ ଦେଶ ଗୋଟିଏ ନିର୍ବାଚନ କାର୍ଯ୍ୟକାରୀ କରିବା ପାଇଁ ସରକାର ଗଠନ କରିଥିବା ଉଚ୍ଚସ୍ତରୀୟ କମିଟିରୁ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ ଓହରି ଯାଇଛନ୍ତି। କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଓ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେଙ୍କୁ ଏହି କମିଟିରେ ବାଦ୍ ଦିଆଯାଇଥିବା ଗଣତନ୍ତ୍ର ପ୍ରତି ଅପମାନ କହି ସେ ଓହରି ଯାଇଛନ୍ତି ଏବଂ ସରକାରଙ୍କ ଉଦ୍ଦେଶ୍ୟ ଉପରେ ସନ୍ଦେହ ପ୍ରକାଶ କରିଛନ୍ତି।
ଲୋକସଭାରେ କଂଗ୍ରେସ ସଂସଦୀୟ ଦଳର ନେତା ଥିବା ଅଧୀର ରଞ୍ଜନ ଚୌଧୁରୀ କହିଛନ୍ତି ଯେ, ସୋନିଆ ଓ ଖଡଗେଙ୍କୁ ସାମିଲ ନକରି କମିଟି ଅଧୁରା। ଏପରି କରିବା ଗଣତନ୍ତ୍ର ବ୍ୟବସ୍ଥା ପ୍ରତି ଅପମାନ। ଏକକାଳୀନ ନିର୍ବାଚନ ପ୍ରସଙ୍ଗରେ ଏହି ଦୁଇ ନେତା ହେଉଛନ୍ତି ସବୁଠାରୁ ଗୁରୁତ୍ୱପୂର୍ଣ୍ଣ ଅଂଶୀଦାର ଏବଂ ସେମାନଙ୍କୁ ବାଦ୍ ଦେବା ଗ୍ରହଣୀୟ ନୁହଁ ।
ସରକାର ଶନିବାର ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରିଥିଲେ। ଏହି କମିଟିର ଅନ୍ୟ ସଦସ୍ୟମାନେ ହେଲେ ଗୃହମନ୍ତ୍ରୀ ଅମିତ ଶାହ, ଜମ୍ମୁ-କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଗୁଲାମନବୀ ଆଜାଦ, ପୂର୍ବତନ ଅର୍ଥ କମିସନ ଅଧ୍ୟକ୍ଷ ଏନ୍. କେ. ସିଂହ, ବରିଷ୍ଠ ଓକିଲ ହରିଶ ସାଲଭେ, ଲୋକସଭାର ପୂର୍ବତନ ମହାସଚିବ ସୁଭାଷ ସି କଶ୍ୟପ, ଏବଂ ପୂର୍ବତନ ମୁଖ୍ୟ ଭିଜିଲାନ୍ସ କମିସନର ସଞ୍ଜୟ କୋଠାରୀ ରହିଛନ୍ତି। ସେହିପରି ଆଇନ ମନ୍ତ୍ରୀ ଅର୍ଜୁନ ରାମ ମେଘାଓ୍ୱାଲା ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ ଭାବେ କମିଟିର ବୈଠକରେ ଯୋଗ ଦେବେ।
ଏହି କମିଟି ସମ୍ବିଧାନରେ ନିର୍ଦ୍ଦିଷ୍ଟ ସଂଶୋଧନ, ଲୋକପ୍ରତିନିଧିତ୍ୱ ଆଇନ ଏବଂ ଅନ୍ୟ କୌଣସି ଆଇନ ଓ ନିୟମକୁ ତର୍ଜମା କରି ସୁପାରିସ କରିବ, ଯେଉଁଥିରେ ଏକକାଳୀନ ନିର୍ବାଚନ ପାଇଁ ସଂଶୋଧନର ଆବଶ୍ୟକତା ରହିଛି। ଏହାମଧ୍ୟ ଅନୁଧ୍ୟାନ କରିବ ଏବଂ ସୁପାରିଶ କରିବ ଯେ ସମ୍ବିଧାନରେ ସଂଶୋଧନ ପାଇଁ ରାଜ୍ୟମାନଙ୍କ ଦ୍ୱାରା ଅନୁମୋଦନ ଆବଶ୍ୟକ କି ନାହିଁ। ଏହି କମିଟି ଏକକାଳୀନ ନିର୍ବାଚନ କ୍ଷେତ୍ରରେ ଝୁଲା ବିଧାନସଭା, ଅନାସ୍ଥା ପ୍ରସ୍ତାବ ଗ୍ରହଣ, ଦଳବଦଳ କିମ୍ବା ଅନ୍ୟ କୌଣସି ପରିସ୍ଥିତିର ସମ୍ଭାବ୍ୟ ସମାଧାନର ବିଶ୍ଳେଷଣ କରି ସୁପାରିସ କରିବ।
ଏକକାଳୀନ ନିର୍ବାଚନ ଧାରଣାକୁ କାର୍ଯ୍ୟକାରୀ କରିବା ଲାଗି ସରକାରଙ୍କ ଉଦ୍ୟମକୁ ଅଧୀର ରଞ୍ଜନ କମିଟିରୁ ଓହରିବା ଏକ ପ୍ରକାର ଝଟକା ବୋଲି କୁହାଯାଉଛି। ଏକକାଳୀନ ନିର୍ବାଚନ ପାଇଁ ସରକାର ଅନେକ ବର୍ଷ ଧରି ଦାବି କରି ଆସୁଥିଲେ ମଧ୍ୟ କଂଗ୍ରେସ ଓ ଅନ୍ୟ ବିରୋଧୀ ଦଳଗୁଡ଼ିକର ବିରୋଧର ସମ୍ମୁଖୀନ ହେବାକୁ ପଡ଼ିଛି।
କଂଗ୍ରେସର ସହଯୋଗ ବିନା ଏକକ ନିର୍ବାଚନ ଧାରଣାକୁ ସରକାର କାର୍ଯ୍ୟକାରୀ କରିବାରେ ସମର୍ଥ ହେବେ କି ନାହିଁ ତାହା ଅସ୍ପଷ୍ଟ। ଦଳ ପକ୍ଷରୁ କୁହାଯାଇଛି ଯେ, ଏହି ପ୍ରସଙ୍ଗରେ ଆଲୋଚନା କରିବାକୁ ସେ ରାଜି ଅଛନ୍ତି, କିନ୍ତୁ କେବଳ ଯଦି ସରକାର କମିଟିରେ ସୋନିଆ ଗାନ୍ଧୀ ଓ ଖଡଗେଙ୍କୁ ସାମିଲ କରିବେ।