ନିମାପଡ଼ା ନାବାଳିକା ନିଆଁ ଘଟଣା: ଓଡ଼ିଶାରେ ଆଇନଶୃଙ୍ଖଳା ଭାଙ୍ଗିପଡ଼ିଛି କହି ଟାର୍ଗେଟ କଲେ କେସି ଭେନୁଗୋପାଳ

ଭୁବନେଶ୍ୱର: ପୁରୀ ଜିଲ୍ଲାର ନିମାପଡ଼ା ବ୍ଲକ ଅଧୀନ ବଳଙ୍ଗା ଅଞ୍ଚଳରେ ଶନିବାର ସକାଳେ ଜଣେ ୧୬ ବର୍ଷୀୟ ନାବାଳିକାଙ୍କୁ ତିନି ଅଜଣା ଦୁର୍ବୃତ୍ତ ପେଟ୍ରୋଲ ଢାଳି ନିଆଁ ଲଗାଇ ଦେଇଥିବା ଘଟଣା ଓଡ଼ିଶାରେ ମହିଳା ସୁରକ୍ଷା ନେଇ ଗମ୍ଭୀର ପ୍ରଶ୍ନ ଉଠାଇଛି। ଏପରି ବର୍ବର ଆକ୍ରମଣ ସମ୍ପର୍କରେ କଂଗ୍ରେସ ନେତା କେସି ଭେନୁଗୋପାଲ ରାଜ୍ୟର ଆଇନଶୃଙ୍ଖଳା ବ୍ୟବସ୍ଥାରେ ଗଭୀର ତ୍ରୁଟି ଥିବା ଅଭିଯୋଗ କରିଛନ୍ତି। ଏକ୍ସରେ ପୋଷ୍ଟ କରି ସେ କହିଛନ୍ତି, “ବାଲେଶ୍ୱର ଘଟଣାର ଆଘାତରୁ ଓଡ଼ିଶା ଏଯାଏଁ ମୁକୁଳି ନାହିଁ, ଏବେ ଆଉ ଏକ ଭୟଙ୍କର ଅପରାଧ ସାମ୍ନାକୁ ଆସିଛି। ଦିବାଲୋକରେ ଅପରାଧୀମାନେ ଏଭଳି ନିର୍ଭୟରେ ଜଣେ ଝିଅକୁ ନିଆଁ ଲଗାଇ ପାରୁଛନ୍ତି, ଏହା ପୁଲିସ ବ୍ୟବସ୍ଥାରେ ଥିବା ତ୍ରୁଟିକୁ ଉଜାଗର କରିଛି। ପ୍ରତି ଘଣ୍ଟାରେ ଓଡ଼ିଶା ମହିଳାଙ୍କ ପାଇଁ ଅଧିକ ଅସୁରକ୍ଷିତ ହେଉଛି। ବିଜେପି ସରକାର ନିଜର ସାଙ୍ଗମାନଙ୍କୁ ରାଜ୍ୟ ଲୁଟିବାରେ ସାହାଯ୍ୟ କରିବାରେ ବ୍ୟସ୍ତ, ଆଇନଶୃଙ୍ଖଳାର ପତନ ପାଇଁ ସମ୍ପୂର୍ଣ୍ଣ ଦାୟୀ।”

While Odisha is still reeling under the shock of the Balasore incident, another horrific crime has come to light. How deep must the systemic rot in the police system be for criminals to set a girl on fire in broad daylight with such impunity?

With every passing hour, Odisha is…

— K C Venugopal (@kcvenugopalmp) July 19, 2025

ଶନିବାର ରାତିରେ ଏମ୍ସ ଭୁବନେଶ୍ୱର ପରିସରରେ ବିଜେପି, ବିଜେଡି ଓ କଂଗ୍ରେସର ନେତା ଓ କର୍ମୀମାନେ ନାରାବାଜି ସହ ଉତ୍ତେଜନା ସୃଷ୍ଟି କରିଥିଲେ।  ଏମ୍ସ ବର୍ଣ୍ଣ ଓ୍ୱାର୍ଡ ସମ୍ମୁଖରେ ବିଧାୟକ ଅଶୋକ ଦାସ, ପିସିସି ଉପସଭାପତି ସସ୍ମିତା ବେହେରା, କଂଗ୍ରେସ ନେତା କୃଷ୍ଣଚନ୍ଦ୍ର ପତି ପ୍ରମୁଖ ଧାରଣାରେ ବସିଥିଲେ। ଅନ୍ୟପଟେ ବର୍ଣ୍ଣ ୱାର୍ଡକୁ ନିଷିଦ୍ଧାଞ୍ଚଳ ଘୋଷଣା କରାଯାଇଛି ଏବଂ ୧୬୩ ଧାରା ଲାଗୁ କରାଯାଇଛି।

ଭେନୁଗୋପାଲଙ୍କ ଅଭିଯୋଗ ରାଜ୍ୟରେ ମହିଳା ସୁରକ୍ଷାର ଦୁର୍ବଳ ଅବସ୍ଥାକୁ ଆଲୋକପାତ କରୁଛି। ସେ କହିଛନ୍ତି, “ବିଜେପି ଅପରାଧୀମାନଙ୍କୁ ଆଶ୍ରୟ ଦେଉଛି ଓ ନ୍ୟାୟ ପ୍ରଦାନରେ ବିଫଳ ହେଉଛି। କଂଗ୍ରେସ ନ୍ୟାୟ ନ ମିଳିବା ପର୍ଯ୍ୟନ୍ତ ଶାନ୍ତିରେ ବସିବ ନାହିଁ।” ଏହି ଘଟଣା ବାଲେଶ୍ୱରରେ ଜଣେ ୨୦ ବର୍ଷୀୟ ଛାତ୍ରୀଙ୍କ ଆତ୍ମହତ୍ୟା ଘଟଣା ପରେ ଘଟିଛି, ଯିଏ ଯୌନ ଉତ୍ପୀଡ଼ନର ଅଭିଯୋଗ ଅଣଦେଖା ହେବା ପରେ ଆତ୍ମଦାହ କରିଥିଲେ। ଭେନୁଗୋପାଲ ଏହାକୁ “ପ୍ରଣାଳୀଗତ ବିଫଳତା” ବୋଲି ଅଭିହିତ କରି ଅପରାଧୀଙ୍କ ପାଇଁ କଡ଼ା ଦଣ୍ଡ ଦେବାକୁ ଦାବି କରିଛନ୍ତି।

ନାବାଳିକାଙ୍କ ଶରୀରର ୭୦-୭୫ ପ୍ରତିଶତ ଜଳିଯାଇଛି, ଏବଂ ସେ ଏବେ ଭୁବନେଶ୍ୱର ଏମ୍ସରେ ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି। ଏମ୍ସ ନିର୍ଦ୍ଦେଶକ ଡ. ଆଶୁତୋଷ ବିଶ୍ୱାସ କହିଛନ୍ତି, “ଝିଅଟିର ଅବସ୍ଥା ଗୁରୁତର, କିନ୍ତୁ ସେ କଥା କହିପାରୁଛନ୍ତି। ଆଗାମୀ ୪୮ ରୁ ୭୨ ଘଣ୍ଟା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତାଙ୍କୁ ଆଇସିୟୁରେ ଅକ୍ସିଜେନ ସପୋର୍ଟରେ ରଖାଯାଇଛି।” ୧୪ ଜଣିଆ ଡାକ୍ତରୀ ଟିମ ତାଙ୍କ ଚିକିତ୍ସା ପାଇଁ ନିୟୋଜିତ ହୋଇଛନ୍ତି। ଓଡ଼ିଶା ସରକାର ତାଙ୍କ ସମ୍ପୂର୍ଣ୍ଣ ଚିକିତ୍ସା ଖର୍ଚ ବହନ କରିବେ ବୋଲି ଉପ-ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଘୋଷଣା କରିଛନ୍ତି।

ପୁରୀ ଏସପି ପିନାକ ମିଶ୍ର ଘଟଣାସ୍ଥଳରୁ ଦୁଇଟି ଜ୍ୱଳନ୍ତ ପଦାର୍ଥ ଭର୍ତ୍ତି ବୋତଲ ଜବତ କରି ତଦନ୍ତ ଆରମ୍ଭ କରିଛନ୍ତି। ସିସିଟିଭି ଫୁଟେଜ ଓ ସନ୍ଧାନୀ କୁକୁର ଟିମ ସାହାଯ୍ୟରେ ଅପରାଧୀଙ୍କୁ ଖୋଜାଯାଉଛି, କିନ୍ତୁ ଏଯାଏଁ କୌଣସି ଗିରଫଦାରୀ ହୋଇନାହିଁ। ନାବାଳିକାଙ୍କ ପରିବାର କୌଣସି ବ୍ୟକ୍ତିଗତ ଶତ୍ରୁତା ବା ପ୍ରେମ ସମ୍ପର୍କକୁ ଅସ୍ୱୀକାର କରିଛନ୍ତି।

ଘଟଣାଟି ସକାଳ ୮ଟା ୩୦ରେ ବଳଙ୍ଗା ପୁଲିସ ଷ୍ଟେସନ ଅଧୀନ ବୟାବର ଅଞ୍ଚଳରେ ଭାର୍ଗବୀ ନଦୀ କୂଳରେ ଘଟିଥିଲା। ନାବାଳିକା ଜଣକ ଜଣେ ସାଙ୍ଗଙ୍କୁ ବହି ଦେବା ପାଇଁ ଯାଉଥିବା ବେଳେ ତିନି ଯୁବକ ତାଙ୍କୁ ଅଟକାଇ ନିଆଁ ଲଗାଇ ଦେଇଥିଲେ। ସ୍ଥାନୀୟ ଲୋକେ ଚିତ୍କାର ଶୁଣି ନିଆଁ ଲିଭାଇ ତାଙ୍କୁ ପିପିଲି ସ୍ୱାସ୍ଥ୍ୟ କେନ୍ଦ୍ରକୁ ଓ ପରେ ଏମ୍ସ ଭୁବନେଶ୍ୱରକୁ ସ୍ଥାନାନ୍ତର କରିଥିଲେ।