ଏପ୍ରିଲ ୫ରେ ଜାରି ହେବ କଂଗ୍ରେସର ଘୋଷଣାପତ୍ର, ଆରମ୍ଭ ହେବ ଘର-ଘର ଗ୍ୟାରେଣ୍ଟି ଅଭିଯାନ
ନୂଆଦିଲ୍ଲୀ: ଲୋକସଭା ନିର୍ବାଚନ ତାରିଖ ଘୋଷଣା ପରେ ସାରା ଦେଶରେ ରାଜନୈତିକ ଦଳ ପ୍ରସ୍ତୁତି ଆରମ୍ଭ କରିଛନ୍ତି। ଏହି କ୍ରମରେ ଭାରତୀୟ ଜନତା ପାର୍ଟି ଆଜି ଉତ୍ତରପ୍ରଦେଶରେ ନିର୍ବାଚନ ପ୍ରଚାର ଆରମ୍ଭ କରୁଥିବାବେଳେ ଦିଲ୍ଲୀର ରାମଲିଲା ମଇଦାନରେ ଇଣ୍ଡିଆ ମେଣ୍ଟ ନିଜର ଶକ୍ତି ପ୍ରଦର୍ଶନ କରୁଛି। ଏହି ସମୟରେ କଂଗ୍ରେସର ବରିଷ୍ଠ ନେତା କହିଛନ୍ତି ଯେ ତାଙ୍କ ଦଳର ଘୋଷଣାପତ୍ର ଏପ୍ରିଲ ୫ରେ ପ୍ରକାଶ ପାଇବ।
କଂଗ୍ରେସର ବରିଷ୍ଠ ନେତା ତଥା ସାଧାରଣ ସମ୍ପାଦକ ଜୟରାମ ରମେଶ ଶନିବାର କହିଛନ୍ତି ଯେ ମାର୍ଚ୍ଚ ୧୬ରେ କଂଗ୍ରେସ ପାଞ୍ଚଟି ନ୍ୟାୟ, ପଚିଶଟି ଗ୍ୟାରେଣ୍ଟି ଜାରି କରିଛି ଏବଂ ସାରା ଦେଶରେ ଆଠ କୋଟି ଗ୍ୟାରେଣ୍ଟି କାର୍ଡ ବଣ୍ଟନ ପାଇଁ ଏପ୍ରିଲ ୩ରୁ ଘର-ଘର ଗ୍ୟାରେଣ୍ଟି ଅଭିଯାନ ଆରମ୍ଭ ହେବ। ଏହା ସହିତ ସେ କହିଛନ୍ତି ଯେ କଂଗ୍ରେସ ଏପ୍ରିଲ ୫ ତାରିଖରେ ଘୋଷଣାପତ୍ର ଜାରି କରିବ।
କଂଗ୍ରେସର ଘୋଷଣାପତ୍ର ପାଞ୍ଚଟି ନ୍ୟାୟ, ଯୁବ ନ୍ୟାୟ, ମହିଳା ନ୍ୟାୟ, କୃଷକଙ୍କ ନ୍ୟାୟ, ଶ୍ରମ ନ୍ୟାୟ ଏବଂ ସମାନତା ନ୍ୟାୟ ଉପରେ ଆଧାରିତ ହେବ। କଂଗ୍ରେସ କହିଛି ଯେ ମିଳିତ ଭାବେ ଆମେ ଏହି ଅନ୍ୟାୟ ସମୟର ଅନ୍ଧକାରକୁ ହଟାଇ ଭାରତର ଲୋକଙ୍କ ପାଇଁ ସମୃଦ୍ଧ, ନ୍ୟାୟ ଭରପୂର ତଥା ସୁସଂଗତ ଭବିଷ୍ୟତ ପାଇଁ ବାଟ ଫିଟାଇବୁ। ଏହା ବ୍ୟତୀତ କଂଗ୍ରେସ ମଧ୍ୟ କେନ୍ଦ୍ର ସରକାରରେ ୩୦ ଲକ୍ଷ ଚାକିରି ନିଶ୍ଚିତ କରିଛି ଏବଂ ଆମେ ଏକ କ୍ୟାଲେଣ୍ଡର ପ୍ରକାଶ କରିବୁ ବୋଲି କହିଛନ୍ତି।
Comments are closed.