ଭୁବନେଶ୍ୱର: ଭରା ମଞ୍ଚରେ ମୁଖ୍ୟମନ୍ତ୍ରୀଙ୍କ ପ୍ରଶଂସା କରିଛନ୍ତି କଂଗ୍ରେସ ବିଧାୟକ ତାରା ବାହିନୀପତି । ଖାଲି ପ୍ରଶଂସା କରି ନାହାନ୍ତି ନବୀନ ପଟ୍ଟନାୟକ ଜିନ୍ଦାବାଦ ନାରା ଦେଇ ସମସ୍ତଙ୍କୁ ଚକିତ କରିଛନ୍ତି ତାରା । ଜୟପୁର ବିକ୍ରମ ଦେବ କଲେଜର ପ୍ଲାଟିନମ୍ ଜୁବୁଲି ଉତ୍ସବରେ ତାରା ନବୀନଙ୍କୁ ଭୁରି ଭୁରି ପ୍ରଶଂସା କରିଛନ୍ତି । କୋରାପୁଟର ପର୍ଯ୍ୟଟନକୁ ପ୍ରୋତ୍ସାହନ ଦେଉଥିବାରୁ ନବୀନଙ୍କୁ କୃତଜ୍ଞତା ଜଣାଇବା ସହ ଗୁପ୍ତେଶ୍ୱର ପୀଠର ଉନ୍ନତି ପାଇଁ ନିବେଦନ କରିଛନ୍ତି ।
ଏଥିସହ ବିକ୍ରମଦେବ କଲେଜରେ ଏକ ଅଡିଟୋରିୟମ୍ ପାଇଁ ତାରା ମଞ୍ଚରେ ଦାବି କରିଥିବା ବେଳେ ସେଇଠି ମୁଖ୍ୟମନ୍ତ୍ରୀ ମଞ୍ଜୁରୀ ଦେଇଛନ୍ତି । ଯାହାକୁ ନେଇ ଜିଲ୍ଲାରେ ବେଶ୍ ଚର୍ଚ୍ଚା ହେଉଛି ।
ସବୁବେଳେ କଂଗ୍ରେସ ବିଧାୟକ ତାରା ବାହିନୀପତି, ରାଜ୍ୟ ସରକାରଙ୍କୁ ବିଭିନ୍ନ ପ୍ରସଙ୍ଗରେ ସମାଲୋଚନା କରୁଥିବା ବେଳେ ହଠାତ୍ ବଦଳି ଗଲେ କି ? ଯଦି ନା ତେବେ ସଭା ମଞ୍ଚରେ ଏତେ ପ୍ରଶଂସା କାହିଁକି ? ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
ତା’ଛଡ଼ା ମଞ୍ଚରେ ନବୀନଙ୍କ ଡାହାଣ ପଟେ ତାରା ପ୍ରଥମେ ବସିବା ମଧ୍ୟ ଅନେକ କିଛି ଇଙ୍ଗିତ ଦେଉଛି । ଅନ୍ୟପଟେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ରବି ନାରାୟଣ ନନ୍ଦଙ୍କୁ ମଞ୍ଚରୁ ଓହ୍ଲାଇବା ଲାଗି ହାତ ଟାଣିବାକୁ ନେଇ ବେଶ୍ ଚର୍ଚ୍ଚା ହେଉଛି । ଆଲୋଚନା ହେଉଛି ରବି ନନ୍ଦଙ୍କୁ ଏଡ଼ାଇ ତାରାଙ୍କୁ କୁଆଡ଼େ ବିଜେଡି ଆପଣାଇବ ।