ଅବୈଧ ପ୍ରେମ ପାଇଁ ହଳ କଲେ ପ୍ରେମୀ ଯୁଗଳ

ରାୟଗଡା : ଅବୈଧ ପ୍ରେମ ପାଇଁ ଲୋକହସା ହୋଇଛନ୍ତି ପ୍ରେମୀ ଯୁଗଳ । ଏପରିକି ଗ୍ରାମବାସୀ ଉଭୟଙ୍କୁ ଚାଷ ଜମିରେ ହଳ ବୁଲାଇଛନ୍ତି । ସୋସିଆଲ ମିଡିଆରେ ଖୁବ ଦ୍ରୁତ ଗତିରେ ମାଡି ଚାଲିଛି ଏହି ଖବର । ରାୟଗଡା ଜିଲ୍ଲାରେ ଘଟିଥିବା ଏହି ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । କଲ୍ୟାଣସିଂପୁର ବ୍ଲକ ସିକୋରପାଇ ପଞ୍ଚାୟତର କଞ୍ଜାମଯୋଡି ଗାଁରେ ଏହି ଘଟଣା ଘଟିଛି । ନିଜ ପିଉସୀକୁ ବିବାହ କରିଥିବା ପୁତୁରାକୁ ଗ୍ରାମବାସୀ ପ୍ରଜାକୋର୍ଟରେ ଦଣ୍ଡ ଦେଇଛନ୍ତି । କିଛିଦିନ ହେଲା ପୁତୁରା ଲାକ ସାରକା ଓ ପିୟୁସି କୋଡିୟା ସାରକା ଲୁଚି ଲୁଚି ପ୍ରେମ କରୁଥିଲେ । ଆଉ ପ୍ରେମ ବଢିଯିବା ପରେ ଉଭୟେ ବିବାହ କରିଥିଲେ ବୋଲି ସୂଚନା ମିଳିଛି । ଏହି ଘଟଣା ପରେ ସେମାନଙ୍କୁ ଗ୍ରାମବାସୀ ଦଣ୍ଡ ଦେଇଥିଲେ । ଗତ ସପ୍ତାହେ ତଳୁ ଏହି ଘଟଣା ଘଟିଥିଲା । ଉଭୟ ପ୍ରେମୀ ଯୁଗଳଙ୍କୁ ଗ୍ରାମବାସୀ ବିଲରେ ହଳ କରାଇଛନ୍ତି । କିଛି ଲୋକ ସେମାନଙ୍କ ହଳ କରିବା ଦୃଶ୍ୟ ମଧ୍ୟ ଦେଖୁଛନ୍ତି । ହେଲେ କେହି ଏମାନଙ୍କୁ କିଛି କହୁନାହାଁନ୍ତି । ସୋସିଆଲ ମିଡିଆରେ ଏହି ଭିଡିଓ ଭାଇରାଲ ହେବା ପରେ ଘଟଣା ଲୋକଲୋଚନକୁ ଆସିଛି । ଏ ବାବଦରେ ଗ୍ରାମବାସୀଙ୍କ କହିବାନୁସାରେ ସେମାନଙ୍କ ପ୍ରେମକୁ ବିରୋଧ କରାଯାଇଥିଲା । ତଥାପି ସେମାନେ ଏକା ସାଙ୍ଗରେ ରହିଥିବାରୁ ଦଣ୍ଡ ମିଳିଥିଲା ।