କଟକ: ଏତେ ଦିନର ଅପେକ୍ଷାରେ ଘଟିବ ଅନ୍ତ । ହକି ବିଶ୍ବ କପ୍ ପାଇଁ ଝଳସିବ କଟକ, ଭୁବନେଶ୍ୱର, ରାଉଲକେଲା । ହକି ବିଶ୍ବକୁ ନେଇ ଫ୍ୟାନ୍ସଙ୍କ ମଧ୍ୟରେ ଦେଖା ଦେଇଛି ନାହିଁ ନଥିବା କ୍ରେଜ । ଓଡ଼ିଶାରେ ଦ୍ଵିତୀୟ ଥର ପାଇଁ ହକି ବିଶ୍ବ କପର ଆୟୋଜନ ହେଉଥିବା ବେଳେ ବର୍ତ୍ତମାନ ଏହାକୁ ନେଇ ସବୁଆଡ଼େ ଦେଖିବାକୁ ମିଳୁଛି କ୍ରେଜ୍ ।
ଏଇ ହକି ଫିଭରରେ କଟକିଆ ବି ଆକ୍ରାନ୍ତ । ହକି ପ୍ରସ୍ତୁତରେ ସେମାନେ ବି ପଛରେ ପଡି ନାହାନ୍ତି । କଟକ ମଧୁପାଟଣା ଅଞ୍ଚଳର ଭାସ୍କଜ୍ୟ ଶିଳ୍ପୀ ସଞ୍ଜୀବ କୁମାର ବିଶ୍ଵାଳ ତିଆରି କରିଛନ୍ତି ହକି ବିଶ୍ବ କପର ଏକ ମଡେଲ । ତା ସାଙ୍ଗକୁ ସେଲୁଲାର କ୍ୟାମେରା ବି ତିଆରି କରିଛନ୍ତି। ତେବେ ସବଉଠୁ ବଡ଼ କଥା ହେଉଛି ଏହି ବିଶ୍ଵ କପର ଟ୍ରଫି ମଡେଲଟି ସମ୍ପୂର୍ଣ୍ଣ କବାଡିଆ ଜିନିଷରୁ ପ୍ରସ୍ତୁତ ହୋଇଛି ।
ଅଦରକାରୀ ଓ ଫୋପଡ଼ା ଯାଇଥିବା ଲୁହାକୁ ନେଇ ସେ ତିଆରି କରିଛନ୍ତି ତାଙ୍କର ଏହି ସୁନ୍ଦର କଳାକୃତୀ । ଦୀର୍ଘ ସାତ ଦିନର ଅକ୍ଲାନ୍ତ ପରିଶ୍ରମ ପରେ ଏହି ସୁନ୍ଦର ଭାସ୍କର୍ଯ୍ୟ ଶିଳ୍ପ ମାଧ୍ୟମରେ ସେ ସମସ୍ତଙ୍କୁ ଚକିତ କରିଛନ୍ତି । ଯେହେତୁ କଟକ ଭଳି ସହରରେ ବିଶ୍ଵ କପ ହକିର ଉଦଘାଟନୀ ସମାରୋହ ହେବାକୁ ଯାଉଛି, ସେଥିପାଇଁ ଜଣେ କଟକିଆ ହିସାବରେ ଏହାକୁ ନିର୍ମାଣ କରିଥିବା କହିଛନ୍ତି ସଞ୍ଜୀବ ।
