ରାଜ୍ୟଗୋଷ୍ଠୀ କ୍ରୀଡା: ଭାରତୀୟ ମହିଳା ହକି ଟିମରେ ଧସେଇ ପଶିଲା କୋଭିଡ, ନଭଜୋତଙ୍କ ରିପୋର୍ଟ ପଜିଟିଭ

ବର୍ମିଂହାମ: ଚଳିତ ରାଜ୍ୟଗୋଷ୍ଠୀ କ୍ରୀଡାରେ ଭାରତୀୟ ମହିଳା ହକି ଟିମ ମଧ୍ୟରେ ଅନିଚ୍ଛା ସତ୍ୱେ ଧସେଇ ପସିଛି କରୋନା । ପ୍ରଥମ ଦିବସରେ ଘାନାଙ୍କୁ ୫-୦ରେ ହରାଇ ଜବରଦସ୍ତ ଫର୍ମରେ ଥିବା ଟିମ ଇଣ୍ଡିଆର ମହିଳା ଖେଳାଳି ନଭକୋତ କୌରଙ୍କ କୋଭିଡ ରିପୋର୍ଟ ପଜିଟିଭ ଆସିଛି । ୨୭ ବର୍ଷୀୟା ଏହି ମିଡ ଫିଲ୍ଡର ସ୍ୱଦେଶ ପ୍ରତ୍ୟାବର୍ତନ କରିବେ । ତାଙ୍କ ସ୍ଥାନରେ ସୋନିକା ଟାଣ୍ଡି ଦଳ ସହିତ ଯୋଗ ଦେବେ । ନଭଜୋତ ଆଇସୋଲେଶନ ରହିବେ । ଦ୍ୱିତୀୟ ଟେଷ୍ଟ କରାଯିବା ପରେ ତାଙ୍କୁ ଆବଶ୍ୟକ ପରାମର୍ଶ ଦିଆଯିବ ବୋଲି ଡାକ୍ତରଙ୍କ ପକ୍ଷରୁ କୁହାଯାଇଛି । ଜାକର୍ତା ଏସିଆନ ଗେମ୍ସ ରୌପ୍ୟ ପଦକ ବିଜେତା ଏବଂ ଇନଚେନ ବ୍ରୋଞ୍ଜ ବିଜୟୀ ଭାରତୀୟ ଦଳର ସେ ସଦସ୍ୟ ଥିଲେ । ଏହି ଅବସରରେ ଭାରତୀୟ ଅଲିମ୍ପିକ ଆସୋସିଏଶନ ଖେଳାଳିମାନଙ୍କୁ ଗେମ୍ସ ଭିଲେଜରେ ସତର୍କତା ସହ ଚଳିବା ପାଇଁ ପରାମର୍ଶ ଦେଇଛନ୍ତି । ପ୍ରତ୍ୟେକ ଦିନ ଗେମ୍ସ ଭିଲେଜରୁ ୧୨ ପାଖାପାଖି ପଜିଟିଭ କେସ ବାହାରୁଛି ବୋଲି ଆୟୋଜକ ପକ୍ଷରୁ କୁହାଯାଇଛି ।