ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଇଡି ହାତରେ ବଡ ପ୍ରମାଣ! ୩୫ଟି ସ୍ଥାନରେ ରେଡ୍

ନୂଆଦିଲ୍ଲୀ: ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଆଜି ପଞ୍ଜାବ ଓ ହାଇଦ୍ରାବାଦର ୩୫ଟି ସ୍ଥାନରେ ଇଡି ରେଡ୍ କରିଛି । ବିଭିନ୍ନ ସୂତ୍ରରୁ ମିଳିଥିବା ତଥ୍ୟ ଆଧାରରେ ପଚରାଉଚରା କରିବା ବେଳେ ଇଡି କିଛି ନୂଆ ତଥ୍ୟ ପାଇଛି। ଏହାପରେ ମଦ ବ୍ୟବସାୟୀ ଏବଂ ମଦ କମ୍ପାନୀ ଆଦିରେ ରେଡ୍ କରିଛି ଇଡି।

ଦିଲ୍ଲୀର ଅବକାରୀ ନୀତି ୨୦୨୧-୨୨ରେ ଅନିୟମିତତା ହୋଇଥିବା ନେଇ ଦିଲ୍ଲୀର ଉପରାଜ୍ୟପାଳ ସିବିଆଇ ତଦନ୍ତ ନିର୍ଦ୍ଦେଶ ଦେଇଥିଲେ। ଏହାପରେ ସିବିଆଇ ଏବଂ ଇଡି ତଦନ୍ତ କରୁଛନ୍ତି।

ସେପଟେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ୱାଲ ଟ୍ୱିଟ୍ କରି କହିଛନ୍ତି, ଇଡି ପକ୍ଷରୁ ୫୦୦ରୁ ଅଧିକ ରେଡ୍ ହୋଇଛି । ତିନି ମାସ ହେଲା ସିବିଆଇ-ଇଡିର ୩୦୦ରୁ ଅଧିକ ଅଧିକାରୀ ଦିନରାତି କାମ କରୁଛନ୍ତି। ହେଲେ ଡାର୍ଟି ପଲିଟିକ୍ସ ପାଇଁ ଏତେ ସଂଖ୍ୟକ ଅଫିସରଙ୍କ ସମୟ ନଷ୍ଟ ହେଉଛି।

ଇଡିର ଏଫଆଇଆର ଅନୁସାରେ ଇଣ୍ଡୋସ୍ପିରିସର ମାଲିକ ସମୀର ମହେନ୍ଦ୍ରୁ ମନିଷ ସିସୋଦିଆଙ୍କ ସହଯୋଗୀଙ୍କୁ ଦୁଇଥର କୋଟିଏରୁ ଅଧିକ ଟଙ୍କା ଦେଇଥିଲେ। ମିଡିଆ ରିପୋର୍ଟ ଅନୁସାରେ, ଦିଲ୍ଲୀ ମଦ ସ୍କାମରେ ଆନ୍ଧ୍ର ଓ ପଞ୍ଜାବ ସହ ଲିଙ୍କ୍ ଥିବା ମଧ୍ୟ ଜାଣିବାକୁ ମିଳିଛି, ବ୍ୟବସାୟୀ ଓ ପୂର୍ବତନ ଅଧିକାରୀଙ୍କ ଘରେ ଏ ନେଇ ରେଡ୍ ହୋଇଛି।