ଯବାନକୁ ହନ୍ତସନ୍ତ କରୁଥିଲା ଡ୍ରେନ ଦୁର୍ଗନ୍ଧ, ନିଜ ଆଡୁ ହସ୍ତକ୍ଷେପ କରି ଭର୍ତ୍ସନା କଲେ ହାଇକୋର୍ଟ

ନୂଆଦିଲ୍ଲୀ: ରାସ୍ତାରେ ବହୁଛି ନାଳ ନର୍ଦ୍ଦମାର ପାଣି। ଯାତାୟତ ବାଟରେ କୁଢକୁଢ ଆବର୍ଜନା। ନର୍ଦ୍ଦମାର ଏହି ଦୁର୍ଗନ୍ଧ ଯୋଗୁଁ ପ୍ରତ୍ୟେକ ଦିନ ହନ୍ତସନ୍ତ ହେବାକୁ ପଡୁଛି। ସାମାନ୍ୟ ବର୍ଷା ହେଲେ ଅଣ୍ଟାଏ ପାଣି। ଆମେ ଏଠାରେ କୌଣସି ବସ୍ତି କିମ୍ବା ଗାଁ କଥା କହୁନୁ, ଏହା ହେଉଛି ରାଜଧାନୀ ଦିଲ୍ଲୀର ଅବସ୍ଥା। ଏଠାରେ କୌଣସି ବସ୍ତି ବାସିନ୍ଦା କିମ୍ବା ସାଧାରଣ ଲୋକେ ହଇରାଣ ହେଉ ନାହାଁନ୍ତି ବରଂ ୩ ହଜାର ଯବାନ ପ୍ରତ୍ୟେକ ଦିନ ହଇରାଣ ହେଉଛନ୍ତି। ଏହି ଯବାନ ଡ୍ରେନ ଦୁର୍ଗନ୍ଧରୁ ହନ୍ତସନ୍ତ ହେଉଛନ୍ତି। ଯାହାକୁ ନେଇ ଏକ ଖବର କାଗଜର ରିପୋର୍ଟ ପ୍ରକାଶ ପାଇଥିଲା। ଏହି ରିପୋର୍ଟ ଆଧାରରେ ଉକ୍ତ ମାମଲାକୁ ଗୁରୁତର ଭାବେ ନେବା ସହ ନିଜ ଆଡୁ ହସ୍ତକ୍ଷେପ କଲେ ଦିଲ୍ଲୀ ହାଇକୋର୍ଟ।

ଖବର କାଗଜର ରିପୋର୍ଟ ଆଧାରରେ କ୍ୟାଣ୍ଟନମେଣ୍ଟ ବୋର୍ଡକୁ କଡା ତାଗିଦ କରିଛନ୍ତି ଦିଲ୍ଲୀ ହାଇକୋର୍ଟ। ରିପୋର୍ଟ ଅନୁସାରେ ରାଜପୁତାନା ରାଇଫଲ୍ସର ୩ ହଜାରରୁ ଅଧିକ ସୈନିକ ପ୍ରତିଦିନ ସକାଳେ ପରେଡ୍ ଗ୍ରାଉଣ୍ଡକୁ ଯିବାକୁ ହେଲେ ନାଳ ନର୍ଦ୍ଦମା ଦେଇ ଗତି କରୁଛନ୍ତି। ଏହି ମାମଲାକୁ ବିଚାରପତି ପ୍ରତିଭା ଏମ୍ ସିଂହ ଏବଂ ମନମୀତ ପ୍ରୀତମ ସିଂହ ଆରୋରାଙ୍କ ଏକ ଖଣ୍ଡପୀଠ ଗୁରୁତର ସହ ନେଇ କ୍ଷୋଭ ପ୍ରକାଶ କରିଛନ୍ତି ଏବଂ କହିଛନ୍ତି ଯେ ସୈନିକମାନଙ୍କୁ ଦିନକୁ ଚାରିଥର ନାଳ ନର୍ଦ୍ଦମା ପାର ହେବାକୁ ପଡ଼େ, ଡ୍ରେନରେ ଆବର୍ଜନା ପୂର୍ଣ୍ଣ ହୋଇଥାଏ। ବେଳେ ବେଳେ ଡ୍ରେନରେ ଅଣ୍ଟା ପର୍ଯ୍ୟନ୍ତ ପାଣି ମଧ୍ୟ ପ୍ରବାହିତ ହୁଏ।

୨୬ ମଇରେ ଦିଲ୍ଲୀର ଏକ ଖବରକାଗଜରେ ପ୍ରକାଶିତ ଏକ ରିପୋର୍ଟର ସ୍ୱତଃ ବିଚାରକୁ କୋର୍ଟ ନେଇଥିଲେ। ଏହି ରିପୋର୍ଟରେ ରାଜପୁତାନା ରାଇଫଲ୍ସର ସୈନିକମାନେ ପ୍ରତିଦିନ କିପରି ଅସୁବିଧାର ସମ୍ମୁଖୀନ ହୁଅନ୍ତି ତାହା କୁହାଯାଇଥିଲା। ୨୦୨୪ ମସିହାରୁ ଦିଲ୍ଲୀ ମଧ୍ୟରେ ସମୟ ସମୟରେ ବିଭିନ୍ନ ଡ୍ରେନ ସଫା କରିବା ପାଇଁ ନିର୍ଦ୍ଦେଶନାମା ଦାବି କରି କୋର୍ଟ ଦୁଇଟି ଆବେଦନର ଶୁଣାଣି କରିଥିଲେ।

କୋର୍ଟ କହିଛନ୍ତି ଯେ ଏହି ଡ୍ରେନ୍ ଦେଇ ଯବାନ ମାର୍ଚ୍ଚ କରିବା ସମ୍ପର୍କରେ ଖବରକାଗଜରେ ପ୍ରକାଶିତ ରିପୋର୍ଟ ପ୍ରକୃତରେ ଏକ ଗ୍ରହଣୀୟ ପରିସ୍ଥିତି ନୁହେଁ। କୋର୍ଟ କହିଛନ୍ତି ଯେ ରିପୋର୍ଟରେ ଉଲ୍ଲେଖ ଅଛି ଯେ ଏକ ସେତୁ ନିର୍ମାଣ ପାଇଁ ଅନୁରୋଧ କରାଯାଇଥିଲା, କିନ୍ତୁ ଏପର୍ଯ୍ୟନ୍ତ ସେତୁ ନିର୍ମାଣ ହୋଇନାହିଁ। ଦିଲ୍ଲୀ କ୍ୟାଣ୍ଟନମେଣ୍ଟ ବୋର୍ଡର ଓକିଲଙ୍କୁ ନୋଟିସ୍ ଗ୍ରହଣ କରିବାକୁ ଅନୁରୋଧ କରାଯାଇଛି।

କୋର୍ଟ ଦିଲ୍ଲୀ କ୍ୟାଣ୍ଟନମେଣ୍ଟ ବୋର୍ଡକୁ ଆଗାମୀ ଶୁଣାଣି ୨୯ ମଇ ସୁଦ୍ଧା ଏକ ସଂକ୍ଷିପ୍ତ ସ୍ଥିତି ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ। ଫେବୃଆରୀରେ, କୋର୍ଟ ସ୍ୱତନ୍ତ୍ର ଟାସ୍କ ଫୋର୍ସକୁ ଦିଲ୍ଲୀର ତୈମୁର ଡ୍ରେନର ପ୍ରାକୃତିକ ପ୍ରବାହକୁ ବାଧା ଦେଉଥିବା ସମସ୍ତ ବେଆଇନ ଜବରଦଖଲ ଏବଂ ନିର୍ମାଣକୁ ହଟାଇବାକୁ ନିର୍ଦ୍ଦେଶ ଦେଇଥିଲେ, ଯେଉଁଥିରେ ଏକ ୫ ମହଲା କୋଠା ମଧ୍ୟ ଅନ୍ତର୍ଭୁକ୍ତ।

ଡ୍ରେନ୍ ସଫା କରିବା ପାଇଁ ନିର୍ଦ୍ଦେଶାବଳୀ
ଡ୍ରେନ୍ ଭାଙ୍ଗିବା ଏବଂ ସମ୍ପ୍ରସାରଣ ସଠିକ୍ ଦିଗରେ ଜାରି ରହିବା ଉଚିତ ବୋଲି ଉଲ୍ଲେଖ କରି କୋର୍ଟ କହିଛନ୍ତି ଯେ ଡ୍ରେନ୍ ସଫା କରିବା ଏକ ନିରନ୍ତର ପ୍ରକ୍ରିୟା ଭାବରେ କରାଯିବା ଉଚିତ। ପ୍ରତିଦିନ ଅତି କମରେ ଦୁଇଥର, ସକାଳ ଏବଂ ସନ୍ଧ୍ୟାରେ ସଫା କରାଯିବା ଉଚିତ। ଡ୍ରେନ୍ ଚାରିପାଖରେ ଥିବା ଅଳିଆ ସଫା କରିବା ଦିଲ୍ଲୀ ମ୍ୟୁନିସିପାଲ୍ କର୍ପୋରେସନର ଦାୟିତ୍ୱ।