ନୂଆଦିଲ୍ଲୀ: ଟୁଲ୍କିଟ୍ ମାମଲାରେ ଦିଲ୍ଲୀ ପୋଲିସ ଦୁଇ ଜଣ କଂଗ୍ରେସ ନେତାଙ୍କୁ ନୋଟିସ୍ ଜାରି କରିଛି ବୋଲି ସୂତ୍ରରୁ ପ୍ରକାଶ। ସୂଚନା ଅନୁଯାୟୀ ନୂଆଦିଲ୍ଲୀ ଏବଂ ଗୁରୁଗାଓଁରେ ଟ୍ୱିଟର କାର୍ଯ୍ୟାଳୟ ପରିଦର୍ଶନ କରିବା ପରେ ଦିଲ୍ଲୀ କଂଗ୍ରେସ ସହ ଜଡିତ ଦୁଇ ଜଣ ନେତାଙ୍କୁ ‘ଟୁଲ୍କିଟ୍’ ବିବାଦ ସମ୍ପର୍କରେ ଯାଞ୍ଚରେ ଯୋଗଦେବାକୁ ନୋଟିସ୍ ଜାରି କରିଛି।
ଏକ ବିବୃତ୍ତି ଜାରି କରି କଂଗ୍ରେସ କହିଛି, ସେମାନଙ୍କୁ ଅଭିଯୁକ୍ତ ଭାବରେ ନୁହେଁ ବରଂ ଅଭିଯୋଗକାରୀ ଭାବରେ ଡକାଯାଇଛି। ଏହି ଦୁଇ ନେତା ହେଉଛନ୍ତି ରାଜୀବ ଗୌଡା ଏବଂ ରୋହନ ଗୁପ୍ତା।
ଏହି ବିବାଦ ଆରମ୍ଭ ହୋଇଥିଲା ଯେତେବେଳେ ଦଳର ମୁଖପାତ୍ର ସମ୍ବିତ ପାତ୍ରଙ୍କ ସମେତ ଅନେକ ବିଜେପି ନେତା କୋଭିଡ ସଙ୍କଟକୁ ସରକାରଙ୍କ ନିୟନ୍ତ୍ରଣକୁ ନେଇ ପ୍ରଧାନମନ୍ତ୍ରୀ ମୋଦୀଙ୍କ ଭାବମୂର୍ତ୍ତିକୁ ଖରାପ କରିବା ପାଇଁ କଂଗ୍ରେସ ଦ୍ୱାରା ସୃଷ୍ଟି ହୋଇଥିବା ଅନେକ ଦଲିଲକୁ ସେୟାର କରିଥିଲେ।