ମୁମ୍ବାଇ: ଚଳିତ ଆଇପିଏଲରେ ଚେନ୍ନାଇ ସୁପର କିଙ୍ଗସର ପ୍ରଦର୍ଶନ ନୈରାଶ୍ୟଜନକ ରହିଛି । ଦଳ ୮ ମ୍ୟାଚରୁ କେବଳ ୨ଟିରେ ବିଜୟ ହାସଲ କରିଛି । ଶନିବାର ଅଧିନାୟକ ରବୀନ୍ଦ୍ର ଜାଡେଜା ତାଙ୍କ ପଦ ଛାଡିଛନ୍ତି । ବିଭିନ୍ନ ମହଲରୁ ସମାଲୋଚିତ ହେବା ପରେ ଏବଂ ତାଙ୍କ ପ୍ରଦର୍ଶନ ପ୍ରତି ଯତ୍ନବାନ ହେବା ପାଇଁ ସେ ଏହି ପଦକ୍ଷେପ ଗ୍ରହଣ କରିଛି । ତାଙ୍କ ସ୍ଥାନରେ ମହେନ୍ଦ୍ର ସିଂ ଧୋନୀଙ୍କୁ ପୁନର୍ବାର ଅଧିନାୟକ ଭାବେ ନିୟୋଜିତ କରାଯାଇଛି । ଚେନ୍ନାଇ ଟିମ ମ୍ୟାନେଜମେଂଟ ପକ୍ଷରୁ ଏ ନେଇ ବିଧିବଦ୍ଧ ଭାବେ ଜଣାଇ ଦିଆଯାଇଛି । ଜାଡେଜାଙ୍କ ଅନୁରୋଧ ଯୋଗୁ ଧୋନୀ ଏହି ଦାୟିତ୍ୱ ଗ୍ରହଣ କରିବା ପାଇଁ ରାଜି ହୋଇଛନ୍ତି । ବାକି ତକ ମ୍ୟାଚରେ ଧୋନୀଙ୍କ ନେତୃତ୍ୱରେ ଦଳ କମାଲ କରିବ ବୋଲି ପ୍ରଶଂସକମାନେ ଆଶା ପୋଷଣ କରିଛନ୍ତି ।
ବର୍ତମାନ ପରିସ୍ଥିତିରେ ଚେନ୍ନାଇକୁ ବାକି ଥିବା ସମସ୍ତ ମ୍ୟାଚରେ ବିଜୟ ହାସଲ କରିବା ଜରୁରୀ ହୋଇ ପଡିଛି । ଧୋନୀଙ୍କ ନେତୃତ୍ୱରେ ଚେନ୍ନାଇ ୪ଥର ଚାମ୍ପିୟନ ଓ ୫ ଥର ରନର୍ସ ଅପ ହୋଇଛି । ୪ର୍ଥ ଥର ପାଇଁ ଚେନ୍ନାଇ ତାର ଅଧିନାୟକ ବଦଳାଇଛି । ସୂଚନାଯୋଗ୍ୟ ଆନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରି ସାରିଥିବା ଧୋନୀଙ୍କ ଏହା ଶେଷ ଆଇପିଏଲ ହେବ ବୋଲି ଅନୁମାନ କରାଯାଉଛି ।
Comments are closed.