ସରକାର ଯୋଜନା ପାଲଟିଛି ସାତ ସପନ, ଓଳିଏ ଖାଇଲେ ଓଳିଏ ଉପାସ ରହୁଛନ୍ତି ଦିବ୍ୟାଙ୍ଗ ଯୁଧିଷ୍ଠିର

ନୂଆପଡା: ସରକାର ଗରିବ ଶ୍ରେଣୀର ଲୋକଙ୍କୁ ଗ୍ରାମୀଣ ଆବାସରେ ଘର ଖଣ୍ଡିଏ ଯୋଗାଇବାର ବ୍ୟବସ୍ଥା କରିଛନ୍ତି । ଏମିତିକି ଭିନ୍ନକ୍ଷମ ମାନଙ୍କ ପାଇଁ ସ୍ୱତନ୍ତ୍ର ପ୍ରାଥମିକତା ଦେବାର ନିୟମ ରହିଛି । ଏ ହେଉଛନ୍ତି ନୂଆପଡା ଜିଲ୍ଲା ଖଡ଼ିଆଳ ବ୍ଲକ ଖାସବାହାଲ ପଞ୍ଚାୟତ ଚଚରାଭଟା ଗ୍ରାମର ଦିବ୍ୟାଙ୍ଗ ଯୁଧିଷ୍ଠିର ଟାହାଣୀ । ପତ୍ନୀ, ପାଞ୍ଚ ପୁଅଝିଅଙ୍କୁ ନେଇ ଯୁଧିଷ୍ଠିରଙ୍କ ସଂସାର । ଦୁଇ ପୁଅ ଦାଦନ ଖଟି ଯାଇଥିବା ବେଳେ ପରଘରେ ସ୍ୱାମି,ସ୍ତ୍ରୀ ମୁଲଲାଗିଲେ ଦୁଇ ଓଳି ଖାଇବାକୁ ମିଳେ । ସରକାରୀ ଯୋଜନା କହିଲେ ଦିବ୍ୟାଙ୍ଗ ଭତ୍ତା ଓ ରାସନ କାର୍ଡରେ ମିଳୁ ଥିବା କିଛି ଚାଉଳ ହିଁ ଭରସା  । ଖଡ଼ିଆଳ ବ୍ଲକ ଚଚରାଭଟା ଗାଁର ଦିବ୍ୟାଙ୍ଗ ଯୁଧିଷ୍ଠିରଙ୍କ ପରିସ୍ଥିତି ଯେ ସ୍ଵଚକ୍ଷୁରେ ନଦେଖିଛି ସେ କେବେ ବିଶ୍ୱାସ କରିବ ନାହିଁ । ଆଜିର ଦିନରେ ମଧ୍ୟ ଦୀର୍ଘ ବର୍ଷ ହେବ ଏକ କେନାଲ ହୁଡାରେ ଝାଟିମାଟି କୁଡ଼ିଆ କରି ରହିଥିବା ବେଳେ ସରକାରଙ୍କ ଯୋଜନା ତାଙ୍କ ପ୍ରତି ସାତ ସପନ ଭଳି ମନେ ହେଉଛି ।

ପାଞ୍ଚ କୁଟୁମ୍ଭ ମଧ୍ୟରୁ ଦୁଇ ଜଣ ପେଟପାଟଣା ପାଇଁ ଦାଦନ ଯାଇଥିବା ବେଳେ ଦୁର୍ବିସହ ଜୀବନ ଜିଉଁଛନ୍ତି ଘରେ ଥିବା ସଦସ୍ୟ । ଯୁଧିଷ୍ଠିର ଦିବ୍ୟାଙ୍ଗ ହୋଇଥିବା ହେତୁ କୌଣସି କାମଧନ୍ଦା କରି ପାରନ୍ତି ନାହିଁ । ସରକାରଙ୍କ  କିଛି ଚାଉଳ ସହ ଭିନ୍ନକ୍ଷମ ଭତ୍ତା ହିଁ ତାଙ୍କର ଭରସା । ସରକାର ଥିଲା ବାଲା ଲୋକଙ୍କୁ ଘର ଯୋଗାଇ ଦେଉଥିବା ବେଳେ ଯୁଧିଷ୍ଠିରଙ୍କ ପାଇଁ ସତେ ଯେମିତି ଅନ୍ଧ ସାଜି ଯାଇଛନ୍ତି । ସ୍ଥାନୀୟ ଜନ ପ୍ରତିନିଧି ମାନେ କେବଳ ନିର୍ବାଚନ ସମୟରେ ଆସୁଥିବା ବେଳେ ପ୍ରକୃତ ଯୋଗ୍ୟ ହିତାଧିକାରୀ ମାନଙ୍କୁ ଦେଖିବାକୁ ତାଙ୍କ ପାଖରେ ସମୟ ନାହିଁ । ଏହାକୁ ନେଇ ସ୍ଥାନୀୟ ବୁଦ୍ଧିଜୀବୀ ମାନେ ତୀବ୍ର ଅସନ୍ତୋଷ ବ୍ୟକ୍ତ କରିବା ସହ ଯୁଧିଷ୍ଠିରଙ୍କୁ ଘର ଖଣ୍ଡିକ ସହ ତାଙ୍କ ନାମରେ ଏକ ଅନ୍ତଦୟ କାର୍ଡ ପ୍ରଦାନ ପାଇଁ ଦାବି କରିଛନ୍ତି ।

ସେପଟେ ବାରମ୍ବାର ସ୍ଥାନୀୟ ସରପଞ୍ଚଙ୍କ ଠାରୁ ନେଇ ଖଡ଼ିଆଳ ବିଡିଓଙ୍କ ପର୍ଯ୍ୟନ୍ତ ଗୁହାରି କରିଥିଲେ ହେଁ କୌଣସି ସୁଫଳ ମିଳିନଥିବା କହିଛନ୍ତି ଉଭୟ ଯୁଧିଷ୍ଠିର ଟାହାଣୀ ଓ ତାଙ୍କ ପତ୍ନୀ । ଏ ବାବଦରେ ପଚାରିବାରୁ ‘ଆପଣଙ୍କଠୁ ଏ ଖବଏ ଶୁଣିଛି ବର୍ତ୍ତମାନ ସେହି ନିର୍ଦ୍ଧିଷ୍ଟ ପୋର୍ଟାଲ ବନ୍ଦ ଅଛି । ତଦନ୍ତ କରି ତାଙ୍କ ନାମ ସାମିଲ କରି ଘର ପ୍ରଦାନ ପାଇଁ ଚେଷ୍ଟା କରାଯିବ ଓ ଯୋଗାଣ ନିରକ୍ଷକଙ୍କ ସହ ଯୋଗାଯୋଗ କରି ଅନ୍ତଦୟ କାର୍ଡର ବ୍ୟବସ୍ଥା କରାଯିବ ବୋଲି କହିଛନ୍ତି ଖଡ଼ିଆଳ ବିଡ଼ିଓ ।