Donald Trump’s New Global Tariff: ସୁପ୍ରିମକୋର୍ଟଙ୍କ ଆଦେଶକୁ ନାହିଁ ଟ୍ରମ୍ପଙ୍କ ଖାତିର, ପୁଣି ବିଶ୍ୱ ଶୁଳ୍କକୁ ୧୫ ପ୍ରତିଶତକୁ କଲେ ବୃଦ୍ଧି 

ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସାମ୍ପ୍ରତିକ ସୁପ୍ରିମକୋର୍ଟଙ୍କ ନିଷ୍ପତ୍ତିକୁ ସମ୍ପୂର୍ଣ୍ଣ ଅଣଦେଖା କରି ପୁଣି ବିଶ୍ୱ ଶୁଳ୍କ ବୃଦ୍ଧି ଘୋଷଣା କରିଛନ୍ତି। ଶୁକ୍ରବାର ଦିନ ଟ୍ରମ୍ପ ପ୍ରଶାସନ ଦ୍ୱାରା ଲାଗୁ କରାଯାଇଥିବା ବ୍ୟାପକ ଶୁଳ୍କକୁ ସୁପ୍ରିମକୋର୍ଟ ଅସାମ୍ବିଧାନିକ କିମ୍ବା ବେଆଇନ ଘୋଷଣା କରି ପ୍ରତ୍ୟାଖ୍ୟାନ କରିଥିଲେ, କିନ୍ତୁ ରାଷ୍ଟ୍ରପତି ତାଙ୍କର ନୀତିକୁ କଠୋର କରିବାକୁ ନିଷ୍ପତ୍ତି ନେଇଥିଲେ। ଆଉ ସମସ୍ତ ଦେଶ ଉପରେ ୧୦ ପ୍ରତିଶତ ଟାରିଫ୍ ଘୋଷଣା କରିଥିଲେ। କିନ୍ତୁ ଏବେ ଏହାକୁ ପୁଣି ୧୫ ପ୍ରତିଶତକୁ ବୃଦ୍ଧି କରିଛନ୍ତି ରାଷ୍ଟ୍ରପତି ଟ୍ରମ୍ପ। ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ, ଟ୍ରୁଥ୍ ସୋସିଆଲରେ ପୋଷ୍ଟ କରି ଘୋଷଣା କରିଛନ୍ତି ଯେ, ତୁରନ୍ତ ପ୍ରଭାବଶାଳୀ, ବିଶ୍ୱବ୍ୟାପୀ ସମସ୍ତ ଦେଶରୁ ଆମଦାନୀ ଉପରେ ଶୁଳ୍କ ୧୦ ପ୍ରତିଶତରୁ ୧୫ ପ୍ରତିଶତକୁ ବୃଦ୍ଧି କରାଯିବ।

ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋସିଆଲ ମିଡିଆରେ ପୋଷ୍ଟ କରି ଟ୍ରମ୍ପ କହିଛନ୍ତି ଯେ ଅନେକ ଦେଶ ଦଶନ୍ଧି ଧରି ଆମେରିକାର ଲାଭ ଉଠାଉଛନ୍ତି, କିନ୍ତୁ ଏବେ ତାଙ୍କ ସରକାର ସେମାନଙ୍କୁ ବନ୍ଦ କରୁଛି। ସେ କହିଛନ୍ତି ଯେ ଆଗାମୀ ମାସଗୁଡ଼ିକରେ, ସେ ଆହୁରି ନୂତନ ଟିକସକୁ ଚୂଡ଼ାନ୍ତ କରିବେ, ଯାହା ଆଇନଗତ ହେବ। ତାଙ୍କର ଲକ୍ଷ୍ୟ ହେଉଛି ଆମେରିକାକୁ ଆହୁରି ଶକ୍ତିଶାଳୀ ଏବଂ ପୂର୍ବ ଅପେକ୍ଷା ଅଧିକ ମହାନ କରିବା।

ଟ୍ରମ୍ପ୍ ୧୯୭୪ର ବାଣିଜ୍ୟ ଆଇନର ଧାରା ୧୨୨ ଅନୁଯାୟୀ ଏହି ନିଷ୍ପତ୍ତି ନେଇଥିଲେ, ଯାହା ରାଷ୍ଟ୍ରପତିଙ୍କୁ ଦେୟ ସନ୍ତୁଳନ ନିଅଣ୍ଟ ସ୍ଥିତିରେ ୧୫୦ ଦିନ ପର୍ଯ୍ୟନ୍ତ ୧୫ ପ୍ରତିଶତ ପର୍ଯ୍ୟନ୍ତ ଶୁଳ୍କ ଲଗାଇବାକୁ ଅନୁମତି ଦିଏ। ପୂର୍ବରୁ, ଟ୍ରମ୍ପ ଶୁକ୍ରବାର ଦିନ ୧୦ ପ୍ରତିଶତର ଏକ ଅସ୍ଥାୟୀ ବିଶ୍ୱ ଶୁଳ୍କ ଲାଗୁ କରିଥିଲେ। ବର୍ତ୍ତମାନ, ୧୫ ପ୍ରତିଶତକୁ ବୃଦ୍ଧି ସହିତ, ଏହି ଶୁଳ୍କ ସର୍ବାଧିକ ସୀମାରେ ପହଞ୍ଚିଛି।

ଟ୍ରମ୍ପଙ୍କ ଏହି ପଦକ୍ଷେପ ଆନ୍ତର୍ଜାତୀୟ ବାଣିଜ୍ୟ ଉପରେ ଗଭୀର ପ୍ରଭାବ ପକାଇପାରେ। ଟ୍ରମ୍ପ ବାରମ୍ବାର ଜୋର ଦେଇଛନ୍ତି ଯେ ଆମେରିକାକୁ ଦୀର୍ଘକାଳୀନ କ୍ଷତିରୁ ରକ୍ଷା କରିବା ପାଇଁ ଶୁଳ୍କ ଆବଶ୍ୟକ। ସେ କହିଛନ୍ତି ଯେ ପୂର୍ବ ସରକାରଗୁଡ଼ିକ ଅନ୍ୟ ଦେଶଗୁଡ଼ିକୁ ଆମେରିକାର ଲାଭ ଉଠାଇବାକୁ ଅନୁମତି ଦେଇଥିଲେ, କିନ୍ତୁ ବର୍ତ୍ତମାନ ପରିସ୍ଥିତି ପରିବର୍ତ୍ତନ ହେଉଛି। ସ୍ପଷ୍ଟ ଭାବରେ, ଟ୍ରମ୍ପ ତାଙ୍କର “ଆମେରିକା ପ୍ରଥମ” ନୀତି ପ୍ରତି ପ୍ରତିବଦ୍ଧ।