ଭୁବନେଶ୍ୱର:ଅର୍ବାନ୍ ମୋବିଲିଟି ଇଣ୍ଡିଆ (ୟୁଏମ୍ଆଇ) ସମ୍ମିଳନୀ ଓ ଏକ୍ସପୋ-୨୦୨୬ ଅବସରରେ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ର ‘ହେରିଟେଜ୍ ସେଲ୍’ ପକ୍ଷରୁ ଆୟୋଜିତ ‘ଏକାମ୍ର ୱାକ୍ସ’ର ଏକ ସ୍ୱତନ୍ତ୍ର ସାଇକ୍ଲିଂ ଟ୍ରେଲ୍ (Cycling Trail) ଆଜି ସକାଳ ମେଫେୟାର ସାଙ୍କଚୁଆରୀ ଆଣ୍ଡ କନଭେନସନ୍ରୁ (Mayfair Sanctuary and Convention) ଆରମ୍ଭ ହୋଇଯାଇଛି। ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ତଥା ବିଡିଏ ଅଧକ୍ଷ ଡା କୃଷ୍ଣଚନ୍ଦ୍ର ମହାପାତ୍ର କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ପତାକା ଦେଖାଇ ସାଇକ୍ଲିଂ ଟ୍ରେଲ୍ର ଶୁଭାରମ୍ଭ କରିଥିଲେ।
ତିନି ଦିନ ଧରି ଚାଲୁଥିବା ଏହି ସମ୍ମିଳନୀରେ ଯୋଗ ଦେଉଥିବା ପ୍ରତିନିଧିମାନଙ୍କ ପାଇଁ ଏହି ସାଇକେଲ ଯାତ୍ରା ଆୟୋଜନ କରାଯାଇଛି। ଏଥିରେ ସେମାନେ ସମ୍ମିଳନୀ ସ୍ଥଳ ବାହାରେ ଭୁବନେଶ୍ୱରର ସୌନ୍ଦର୍ଯ୍ୟ ଓ ପରିବେଶ ଦେଖିପାରିବେ। ସହରର ପ୍ରାକୃତିକ ସମ୍ପଦ ଏବଂ ସହରୀ ପରିଚୟ ସହିତ ନିରନ୍ତର ପରିବହନ ବ୍ୟବସ୍ଥାକୁ ଏହି କାର୍ଯ୍ୟକ୍ରମ ଯୋଡ଼ିବାର ଲକ୍ଷ୍ୟ ରହିଛି।
ସାଇକେଲ ଚାଳନା କେବଳ ଯାତାୟତ ମାଧ୍ୟମ ନୁହେଁ। ଏହା ସାର୍ବଜନୀନ ସ୍ଥାନ, ସବୁଜ କ୍ଷେତ୍ର ଏବଂ ସହରର ଦୈନନ୍ଦିନ ଜୀବନ ସହିତ ଲୋକଙ୍କୁ ଯୋଡ଼ିବାର ଏକ ଉପାୟ ଭାବରେ ମଧ୍ୟ କାମ କରେ ବୋଲି ମନ୍ତ୍ରୀ ମହାପାତ୍ର ଏହି ଅବସରରେ କହିଥିଲେ। ଆଜିର ଏହି ଟ୍ରେଲରେ ସମ୍ମାନିତ ବ୍ୟକ୍ତି ଓ ଅଂଶଗ୍ରହଣକାରୀମାନେ ମେଫେୟାର ସାଙ୍କଚୁଆରୀ ଏବଂ କନଭେନସନରୁ ଏକାମ୍ର କାନନ ଯାଏ ସାଇକେଲ ଯାତ୍ରା କରିଥିଲେ। ସେହିପରି ଏହି ଯାତ୍ରା ମାଧ୍ୟମରେ ସେମାନେ ସହରର ସବୁଜ ସ୍ଥାନ ଓ ପ୍ରାକୃତିକ ପରିବେଶ ମଧ୍ୟ ଦେଖିବାର ସୁଯୋଗ ପାଇଥିଲେ ।
ସାଇକେଲିଂ ଟ୍ରେଲ୍ ସହିତ ଏକାମ୍ର ୱାକ୍ସ UMI ପ୍ରତିନିଧିମାନଙ୍କ ପାଇଁ ଅନ୍ୟ କିଛି ବିଶେଷ ଟ୍ରେଲ ମଧ୍ୟ ପ୍ରସ୍ତୁତ ହୋଇଛି। ଏଥିରେ ଡେରାସ ଜଙ୍ଗଲରେ ଚାଲିବା, ଐତିହ୍ୟ ଟ୍ରେଲ୍ ଏବଂ ରାତିରେ ଭୁବନେଶ୍ୱର ଦେଖିବା ଭଳି କାର୍ଯ୍ୟକ୍ରମ ରହିଛି। ଏହି ଗାଇଡ୍ କରାଯାଇଥିବା ଟ୍ରେଲ୍ ଗୁଡ଼ିକରେ ଲୋକେ ରାଜଧାନୀର ପ୍ରକୃତି, ପୁରୁଣା ମନ୍ଦିର ସ୍ଥାପତ୍ୟ ଏବଂ ଭୁବନେଶ୍ୱର କିପରି ଏକ ପୁରୁଣା ମନ୍ଦିର ସହରରୁ ଆଧୁନିକ ଯୋଜନାବଦ୍ଧ ସହର ହୋଇଉଠିଛି ସେ ବିଷୟରେ ଜାଣିପାରିବେ। ଏକାମ୍ର ୱାକ୍ସ ଏହି ଅନୁଭବ ମାଧ୍ୟମରେ ଭୁବନେଶ୍ୱରର ଜୀବନ୍ତ ପରମ୍ପରା, ଐତିହାସିକ ସ୍ଥାନ, ପ୍ରକୃତି ଏବଂ ଆଜିର ସହର ଜୀବନକୁ ଏକାଠି ଦେଖାଇବାକୁ ଚେଷ୍ଟା କରାଯାଇଛି । ଏହି ପଦକ୍ଷେପ ପ୍ରତିନିଧିମାନଙ୍କୁ ସହର ଏବଂ ଏହାର ଐତିହ୍ୟ ସହ ସିଧାସଳଖ ଯୋଡ଼ିବାର ସୁଯୋଗ ଦେବ। ଏହା ସ୍ଥାୟୀ ଗତିଶୀଳତା ଓ ସହର ବିକାଶ ଉପରେ UMIରେ ହେଉଥିବା ଆଲୋଚନାକୁ ମଧ୍ୟ ପୂରଣ କରିବ।
ବିଡିଏ (BDA)ର ହେରିଟେଜ୍ ସେଲ୍ ପକ୍ଷରୁ ଆରମ୍ଭ ହୋଇଥିବା ‘ଏକାମ୍ର ୱାକ୍ସ’ ସ୍ଥାନୀୟ ଲୋକ ଏବଂ ପର୍ଯ୍ୟଟକଙ୍କୁ ଭୁବନେଶ୍ୱର ଜାଣିବା ଓ ଅନୁଭବ କରିବାର ସୁଯୋଗ ଦେଉଛି। ଏଥିରେ ସୁବ୍ୟବସ୍ଥିତ ଏବଂ ଗାଇଡ୍ କରାଯାଇଥିବା ଟ୍ରେଲ ମାଧ୍ୟମରେ ସହରର ଅତୀତ, ବର୍ତ୍ତମାନ ଓ ଭବିଷ୍ୟତକୁ ଏକାଠି କରାଯାଉଛି। ଅଧିକ ବିବରଣୀ ଏବଂ ବୁକିଂ ପାଇଁ www.ekamra-walks.com ଦେଖନ୍ତୁ ।