ଚେନ୍ନାଇ ଟେଷ୍ଟରେ ଭାରତର ଶୋଚନୀୟ ପରାଜୟ, ୨୨୭ ରନରେ ଜିତିଲା ଇଂଲଣ୍ଡ

ଚେନ୍ନାଇ: ପ୍ରଥମ ଟେଷ୍ଟରେ ଟିମ୍ ଇଣ୍ଡିଆର ପରାଜୟ । ୨୨୭ ରନରେ ବୃହତ ବିଜୟ ହାସଲ କରିଛି ଇଂଲଣ୍ଡ । ୪୨୦ରନର ବିଶାଳ ଟାର୍ଗେଟର ପିଛା କରି ଶେଷ ଦିନରେ ଭାରତ କରିଥିଲା ମାତ୍ର ୧୯୨ ରନ୍ । ଆଜି ଥିଲା ମ୍ୟାଚର ଶେଷ ଦିନ । ବିଜୟ ପାଇଁ ଭାରତକୁ ଆଉ ୩୮୧ ରନ୍ ଆବଶ୍ୟକ ଥିଲା । ତେବେ ଜେମସ୍ ଆଣ୍ଡରସନ୍ ଓ ଜ୍ୟାକ୍ ଲିଚଙ୍କ ଖତରନାକ ବୋଲିଂ ଆଗରେ ଧରାଶାୟୀ ହୋଇଥିଲା ଭାରତର ବ୍ୟାଟିଂ ଲାଇନ୍ ଅପ୍ ।

ଭାରତ ୪୨୦ ରନ୍ ବିଜୟ ଲକ୍ଷ୍ୟର ପିଛା କରି ୫୮ ଓଭର ଗୋଟିଏ ବଲ ଖେଳି ମାତ୍ର ୧୯୨ ରନରେ ସୀମିତ ରହିଗଲା । ଜୋଫ୍ରା ଆର୍ଚର ବୁମରାହଙ୍କ ଓ୍ୱିକେଟ ନେଇ ଇଂଲଣ୍ଡର ବିଜୟ ମୁଣ୍ଡି ମାରିଥିଲେ । ଦ୍ୱିତୀୟ ଇନିଂସରେ ଭାରତ ପକ୍ଷରୁ ଅଧିନାୟକ ବିରାଟ କୋହଲି ସର୍ବାଧିକ ୭୨ ରନ୍ ଓ ଶୁଭମନ୍ ଗିଲ୍ କରିଥିଲା ୫୦ରନ୍ । ଅନ୍ୟ କୌଣସି ଖେଳାଳି ୨୦ ରନ୍ ବି ପାର କରି ନାହାନ୍ତି ।

ଇଂଲଣ୍ଡ ପ୍ରଥମ ଇନିଂସରେ ୫୭୮ ରନ୍ ଓ ଦ୍ୱିତୀୟ ଇନିଂସରେ କରିଥିଲା ୧୭୮ ରନ୍ । ଭାରତ ପ୍ରଥମ ଇନିଂସରେ କରିଥିଲା ୩୩୭ ରନ୍ । ଦ୍ୱିତୀୟ ଇନିଂସରେ ୧୯୨ ରନରେ ସମସ୍ତ ଓ୍ୱିକେଟ ହରାଇଛି । ଏହି ବିଜୟ ସହ ଚାରି ଟିକିଆ ଟେଷ୍ଟରେ ଇଂଲଣ୍ଡ ୧-୦ରେ ସିରିଜ ଆଗୁଆ ରହିଛି ।