ଭୁବନେଶ୍ବର: ପଶ୍ଚିମ ବଙ୍ଗ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଲେ ମୁଖ୍ୟମନ୍ତ୍ରୀ ମୋହନ ମାଝୀ। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ପଶ୍ଚିମବଙ୍ଗ ଗସ୍ତ ବେଳେ ଅସମ୍ମାନ ଓ ପ୍ରୋଟୋକଲ ଉଲ୍ଲଂଘନ ପ୍ରସଙ୍ଗକୁ ନେଇ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ମୁଖ୍ୟମନ୍ତ୍ରୀ ମୋହନ ମାଝୀ ଚିଠି ଲେଖିଛନ୍ତି। ଏଥିରେ ମୋହନ ମାଝୀ ଉଲ୍ଲେଖ କରିଛନ୍ତି ଯେ ରାଷ୍ଟ୍ରପତି ଜଣେ ସମ୍ମାନିତ ଆଦିବାସୀ ମହିଳା, ତାଙ୍କୁ ପଶ୍ଚିମବଙ୍ଗରେ ଯେଉଁଭଳି ଅଶୋଭନୀୟ ବ୍ୟବହାର କରାଗଲା, ତାହା ସାରା ଦେଶରେ ଜନସାଧାରଣଙ୍କୁ ବ୍ୟଥିତ କରିଛି।
ଅନ୍ତର୍ଜାତୀୟ ମହିଳା ଦିବସର ଠିକ୍ ପୂର୍ବରୁ ଏହି ଘଟଣାଟି ଘଟିଥିବାରୁ ବିଶେଷ ଭାବେ ବିଚଳିତ କରିଛି। ରାଷ୍ଟ୍ରପତିଙ୍କ ଗସ୍ତ ସମୟରେ ଜନଜାତି ସମ୍ପ୍ରଦାୟର ସଦସ୍ୟମାନଙ୍କୁ ନେଇ ଅନୁଷ୍ଠିତ କାର୍ଯ୍ୟକ୍ରମର ସ୍ଥାନ ପରିବର୍ତ୍ତନ ଦୁର୍ଭାଗ୍ୟଜନକ । ଏହା ଆମର ସାମ୍ବିଧାନିକ ମୂଲ୍ୟବୋଧ ସହିତ ଅସଙ୍ଗତ ବୋଲି ସାଧାରଣରେ ବିବେଚନା କରାଯାଇଛି।
ତାଙ୍କର ଏହି ଘଟଣା କେବଳ ଦେଶର ଲକ୍ଷ ଲକ୍ଷ ଆଦିବାସୀ, ପଛୁଆ ବର୍ଗ ଏବଂ ଦଳିତଙ୍କ ଭାବନାକୁ ଆଘାତ ଦେଇନାହିଁ ବରଂ ପଶ୍ଚିମବଙ୍ଗର ପ୍ରତିଛବି ଉପରେ ଏକ ମଳିନ ପକାଇଛି। ପଶ୍ଚିମବଙ୍ଗ ତାହାର ସଂସ୍କୃତି, ସଭ୍ୟତା ଏବଂ ଗଣତାନ୍ତ୍ରିକ ପ୍ରତିଷ୍ଠାନ ପ୍ରତି ସମ୍ମାନ ପାଇଁ ଖୁବ୍ ଜଣାଶୁଣା। ସାନ୍ତାଳ ସମ୍ପ୍ରଦାୟ ଏକ ବଡ଼ ସମ୍ପ୍ରଦାୟ ଯେଉଁମାନେ ଭାରତର ଅନେକ ସ୍ଥାନରେ ବସବାସ କରନ୍ତି ଏବଂ ରାଷ୍ଟ୍ରର ବିକାଶରେ ଗୁରୁତ୍ୱପୂର୍ଣ୍ଣ ଅବଦାନ ରଖଥାନ୍ତି। ମୁଁ ନିଜେ ଏହି ସମ୍ପ୍ରଦାୟର ସଦସ୍ୟ ହୋଇଥିବାରୁ ଏହି ଘଟଣା ଉପରେ ଅତ୍ୟନ୍ତ ବ୍ୟଥିତ ଅନୁଭବ କରୁଛି।
ମୁଁ ଆପଣଙ୍କୁ ଆନ୍ତରିକ ଭାବରେ ଏହି ବିଷୟରେ ଚିନ୍ତନ କରିବାକୁ ଅନୁରୋଧ କରୁଛି। ରାଷ୍ଟ୍ରପତି ଏବଂ ଦେଶର ଜନସାଧାରଣଙ୍କୁ ଆପଣଙ୍କର ଅନୁଶୋଚନା ଜଣାଇବାକୁ ଅନୁରୋଧ କରୁଛି।ଏପରି ଏକ ଆଭିମୁଖ୍ୟ ଗଣତାନ୍ତ୍ରିକ ମାନଦଣ୍ଡ ଏବଂ ସାମ୍ବିଧାନିକ କାର୍ଯ୍ୟାଳୟର ମର୍ଯ୍ୟାଦା ପ୍ରତି ଆମର ମିଳିତ ପ୍ରତିବଦ୍ଧତାକୁ ପୁନଃ ଦୃଢ଼ କରିବାରେ ସାହାଯ୍ୟ କରିବ।