ଗଲୱାନ ସଂଘର୍ଷ ପରେ ପ୍ରଥମ ଗସ୍ତ: ବ୍ରିକ୍ସ ସମ୍ମିଳନୀ ପାଇଁ ପ୍ରସ୍ତୁତି ଜୋରଦାର, ହେଲେ ବେଜିଂର ନୀରବତାକୁ ନେଇ ସସ୍ପେନ୍ସ
ନୂଆଦିଲ୍ଲୀ: ପ୍ରାୟ ୭ ବର୍ଷର ଦୀର୍ଘ ବ୍ୟବଧାନ ପରେ ଆସନ୍ତା ମାସରେ ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଭାରତ ଗସ୍ତରେ ଆସିବାର ପ୍ରବଳ ସମ୍ଭାବନା ସୃଷ୍ଟି ହୋଇଛି। ଆସନ୍ତା ସେପ୍ଟେମ୍ବର ୧୨ ଏବଂ ୧୩ ତାରିଖରେ ନୂଆଦିଲ୍ଲୀରେ ଆୟୋଜିତ ହେବାକୁ ଥିବା ବହୁ ପ୍ରତୀକ୍ଷିତ ବ୍ରିକ୍ସ ସମ୍ମିଳନୀରେ ସେ ଅଂଶଗ୍ରହଣ କରିପାରନ୍ତି। ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ଜିନପିଙ୍ଗ ଏକୁଟିଆ ନୁହଁନ୍ତି, ବରଂ ତାଙ୍କ ସହ ପ୍ରାୟ ୪୦୦ ଜଣ ଅଧିକାରୀଙ୍କ ଏକ ବିଶାଳ ପ୍ରତିନିଧି ଦଳ ଭାରତ ଆସିବାର କାର୍ଯ୍ୟକ୍ରମ ରହିଛି।
ଏହି ହାଇ-ପ୍ରୋଫାଇଲ୍ ଗସ୍ତ ପାଇଁ ରାଜଧାନୀ ଦିଲ୍ଲୀର ବଡ଼ ବଡ଼ ହୋଟେଲଗୁଡ଼ିକୁ ଚିହ୍ନଟ କରାଯାଉଥିବା ବେଳେ ସୁରକ୍ଷା ବ୍ୟବସ୍ଥାକୁ ମଧ୍ୟ କଡ଼ାକଡ଼ି କରାଯାଉଛି। ତେବେ ଏତେ ବଡ଼ ଧରଣର ପ୍ରସ୍ତୁତି ଚାଲିଥିଲେ ସୁଦ୍ଧା, ବେଜିଂ ପକ୍ଷରୁ ଏଯାବତ୍ ଜିନପିଙ୍ଗଙ୍କ ଗସ୍ତକୁ ନେଇ କୌଣସି ଆନୁଷ୍ଠାନିକ ଘୋଷଣା କରାଯାଇନାହିଁ। ଏହି ନୀରବତା କୂଟନୈତିକ ମହଲରେ ଅନେକ ପ୍ରଶ୍ନବାଚୀ ସୃଷ୍ଟି କରିଛି।
ଉଲ୍ଲେଖଯୋଗ୍ୟ ଯେ, ଶେଷ ଥର ପାଇଁ ୨୦୧୯ ମସିହା ଅକ୍ଟୋବର ମାସରେ ସି ଜିନପିଙ୍ଗ ଭାରତ ଆସିଥିଲେ। ସେହି ସମୟରେ ତାମିଲନାଡୁର ଐତିହାସିକ ସହର ମହାବଳୀପୁରମଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ତାଙ୍କର ଏକ ସୌହାର୍ଦ୍ଦ୍ୟପୂର୍ଣ୍ଣ ଅନୌପଚାରିକ ବୈଠକ ଅନୁଷ୍ଠିତ ହୋଇଥିଲା। ମାତ୍ର ଏହାର କିଛି ମାସ ପରେ ଗଲୱାନ ଉପତ୍ୟକାରେ ଉଭୟ ଦେଶର ସେନା ମୁହାଁମୁହିଁ ହେବା ଏବଂ ରକ୍ତାକ୍ତ ସଂଘର୍ଷ ଘଟିବା
ଫଳରେ ଦୁଇ ପଡ଼ୋଶୀ ଦେଶ ମଧ୍ୟରେ ସମ୍ପର୍କ ସମ୍ପୂର୍ଣ୍ଣ ତିକ୍ତ ହୋଇଯାଇଥିଲା। ସୀମାରେ ଅହେତୁକ ଉତ୍ତେଜନା, ଅନେକ ଚାଇନିଜ୍ ଆପ୍ ଉପରେ ଭାରତର କଟକଣା ଏବଂ ବାଣିଜ୍ୟିକ କାରବାର ବାଧାପ୍ରାପ୍ତ ହେବା ପରେ ପରିସ୍ଥିତି ଜଟିଳ ହୋଇଥିଲା। ଯଦିଓ ୨୦୨୪ ଅକ୍ଟୋବରରେ ସୀମାରେ ସେନା ପ୍ରତ୍ୟାହାର ଓ ପାଟ୍ରୋଲିଂ ନେଇ କିଛି ସହମତି ପ୍ରକାଶ ପାଇଥିଲା, ତଥାପି ସମ୍ପର୍କରେ ଥିବା ଫାଟ ଏବେ ବି ପୂରଣ ହୋଇପାରିନାହିଁ।
ବର୍ତ୍ତମାନର ବିଶ୍ୱ ରାଜନୀତିକ ସ୍ଥିତିରେ ଆମେରିକାର କ୍ରମାଗତ ଚାପ ଏବଂ ଅର୍ଥନୈତିକ ଆହ୍ୱାନର ସାମ୍ନା କରୁଥିବା ଚୀନ୍ ପାଇଁ ଭାରତର ବିଶାଳ ବଜାର ନିହାତି ଜରୁରୀ ହୋଇପଡ଼ିଛି। ‘ଗ୍ଲୋବାଲ ସାଉଥ’ର ଏକ ଶକ୍ତିଶାଳୀ ନେତୃତ୍ୱ ଭାବେ ଉଭା ହୋଇଥିବା ଭାରତ ସହ ସୀମା ବିବାଦ ଜାରି ରଖିବା ବେଜିଂ ପାଇଁ ଆଦୌ ଲାଭଦାୟକ ନୁହେଁ।
ଅନ୍ୟପଟେ ଭାରତ ମଧ୍ୟ ସୀମାରେ ଲଗାତାର ସେନା ମୁତୟନ ଜନିତ ବିପୁଳ ଆର୍ଥିକ ବୋଝ ଏବଂ ବାଣିଜ୍ୟିକ ଅନିଶ୍ଚିତତା କମାଇବାକୁ ଚାହୁଁଛି। ତେଣୁ ଆଗାମୀ ବ୍ରିକ୍ସ ସମ୍ମିଳନୀ ଅବସରରେ ମୋଦି ଏବଂ ଜିନପିଙ୍ଗଙ୍କ ମଧ୍ୟରେ ଏକ ସ୍ୱତନ୍ତ୍ର ଦ୍ୱିପାକ୍ଷିକ ଆଲୋଚନା ହେବାର ଯଥେଷ୍ଟ ସମ୍ଭାବନା ରହିଛି।
ଜ୍ୟୋତିଷ ଶାସ୍ତ୍ର ଓ ଦେଶର ଗ୍ରହ ଦଶାର ଏକ ସ୍ୱତନ୍ତ୍ର ଆକଳନ ଅନୁଯାୟୀ ମଧ୍ୟ, ସେପ୍ଟେମ୍ବର ମାସରେ ଚୀନର ବିଦେଶୀ ସମ୍ପର୍କ ଓ କୂଟନୈତିକ ସକ୍ରିୟତା ବୃଦ୍ଧି ପାଇବାର ସୂଚନା ମିଳୁଛି, ଯାହା ଜିନପିଙ୍ଗଙ୍କ ଭାରତ ଆସିବା ଖବରକୁ ବଳ ଯୋଗାଉଛି।
ସେହିପରି ଭାରତର ଗ୍ରହ ସ୍ଥିତି ସୂଚାଉଛି ଯେ, ନୂଆଦିଲ୍ଲୀ ଆଲୋଚନା ପାଇଁ ଦ୍ୱାର ଖୋଲା ରଖିବ ସତ, କିନ୍ତୁ ସୁରକ୍ଷା ଓ ସୀମା ପ୍ରସଙ୍ଗରେ କୌଣସି ପ୍ରକାର ଆଖିବୁଜା ବିଶ୍ୱାସ କରିବ ନାହିଁ। ନିଜର ସର୍ବୋଚ୍ଚ ସତର୍କତା ବଜାୟ ରଖିବା ସହ ଭାରତ କୂଟନୈତିକ ପଦକ୍ଷେପ ନେବ ବୋଲି ଆଶା କରାଯାଉଛି।
