ନୂଆଦିଲ୍ଲୀ:ଅନ୍ଧାର ଭିତରେ କିଛି ସମୟ ପାଇଁ ହଜିଗଲା ଆମେରିକାର ଏକ ସହର | ଆକାଶରୁ ଖସିଲା ମାଛ ଓ ଆମେରିକାର ନ୍ୟୁଜର୍ସି ସହରରେ କଟିଗଲା ବିଜୁଳି | ଆକାଶରୁ ଗୋଟାଏ ମାଛ ଖସିବା କାରଣରୁ ଆମେରିକାର ନ୍ୟୁଜର୍ସି ସହର ଅନ୍ତଗର୍ତ ସେରିଭିଲି ଅଞ୍ଚଳରେ ବିଜୁଳି କଟିଯାଇଥିଲା । ଗତ ଶନିବାର ଦିନ ସେରିଭିଲି ପୋଲିସ୍ ‘ଫେସ୍ବୁକ୍’ ପୋଷ୍ଟ୍ରେ ଏମିତି କିଛି ଉଲ୍ଲେଖ କରିଥିବା ନେଇ ‘ନ୍ୟୁୟର୍କ ପୋଷ୍ଟ୍’ ରିପୋର୍ଟ କରିଛି | ବିଜୁଳି କଟିଯିବା ଫଳରେ ସେରିଭିଲି ଅଞ୍ଚଳର ପ୍ରାୟ ୨,୧୦୦ରୁ ଅଧିକ ଲୋକ କିଛି ଘଣ୍ଟା ପାଇଁ ଅନ୍ଧାରରେ ରହିଥିଲେ।
ତେବେ ଏଠାରେ ଆପଣ ଭାବୁଥିବେ, ମାଛ ପାଇଁ ବିଜୁଳି କାହିଁକି କଟିଲା ? ତା ପୁଣି ଆକାଶରୁ ! ଆକାଶକୁ ମାଛ ଆସିଲା କେଉଁଠୁ ? ପ୍ରକୃତ କଥା ଥିଲା ଏମିତି । ସ୍ଥାନୀୟ ସରକାରୀ ଅଧିକାରୀମାନଙ୍କ ସୂଚନା ଅନୁଯାୟୀ, ଗୋଟାଏ ଶିକାରୀ ପକ୍ଷୀ ମାଛଟିକୁ ଧରି ଆକାଶରେ ଉଡିଯାଉଥିବା ବେଳେ ତା ପଞ୍ଝାରୁ ମାଛଟି ଖସି ବିଦ୍ୟୁତ୍ ଟ୍ରାନ୍ସଫର୍ମର ଉପରେ ପଡ଼ି ଯାଇଥିଲା । ଏହି କାରଣରୁ ଟ୍ରାନ୍ସଫର୍ମର ଫାଟି ଯାଇଥିଲା | ତେଣୁ ସହରର ସେହି ଅଞ୍ଚଳକୁ ବିଜୁଳି ସେବା ଯୋଗାଇବାରେ ସମସ୍ୟା ସୃଷ୍ଟି ହୋଇଛି ବୋଲି ସୂଚନା ମିଳିଛି ।
‘ଫେସ୍ବୁକ୍’ ପୋଷ୍ଟ୍ରେ ସେରିଭିଲି ପୁଲିସ ଲେଖିଛି ଯେ, ସେରିଭିଲିର ବହୁ ତଳିଆ ଅଞ୍ଚଳରେ ବିଜୁଳି କଟିଯାଇଛି। ଟ୍ରାନ୍ସଫର୍ମର ଉପରୁ ଗୋଟିଏ ମାଛ ମିଳିଛି ଓ ସେହି ମାଛ ଟ୍ରାନ୍ସଫର୍ମରକୁ ନଷ୍ଟ କରି ଦେଇଛି ।’
ତେବେ ଟ୍ରାନ୍ସଫର୍ମର ଉପରକୁ ମାଛ ଗଲା କେମିତି ? ଟ୍ରାନ୍ସଫର୍ମର ଉପରେ ମାଛ ପକାଇଥିବା ସେ ପକ୍ଷୀଟି ‘ସି ହକ୍’ ବା ସମୁଦ୍ର ବାଜ ବୋଲି ସନ୍ଦେହ କରାଯାଉଛି। ସରକାରୀ ଅଧିକାରୀମାନେ ମଜାରେ କହିଛନ୍ତି, ଆକାଶରେ ଉଡ଼ିଯାଉଥିବା ବେଳେ ସେ ପକ୍ଷୀଟି ଠିକ୍ ସମୟରେ ଭୁଲ୍ ସ୍ଥାନରେ ମାଛଟିକୁ ପକାଇ ଦେଇଛି।