ନୂଆଦିଲ୍ଲୀ: ବାଂଲାଦେଶ କ୍ରିକେଟ ଦଳର ପୂର୍ବତନ ଅଧିନାୟକ ତଥା ପୂର୍ବତନ ସାଂସଦ ସାକିବ ଅଲ ହାସନଙ୍କ ଘରେ ଆକ୍ରମଣ ହୋଇଛି।
ରିପୋର୍ଟ ଅନୁଯାୟୀ, ବୁଧବାର ରାତିରେ ଅଜ୍ଞାତ ଆକ୍ରମଣକାରୀମାନେ ସାକିବଙ୍କ ଘର ଉପରେ ପେଟ୍ରୋଲ ବୋମା ଆକ୍ରମଣ କରି ନିଆଁ ଲଗାଇ ଦେବାକୁ ଚେଷ୍ଟା କରିଥିଲେ। ବୁଧବାର ରାତି ପ୍ରାୟ ୯ଟା ସମୟରେ ଏହି ଘଟଣା ଘଟିଥିଲା। ମାଗୁରା ସଦର ପୋଲିସ ଷ୍ଟେସନର ଭାରପ୍ରାପ୍ତ ଅଧିକାରୀ ମହମ୍ମଦ ଅବଦୁଲ୍ଲା ଅଲ ମାମୁନ ଏହି ସୂଚନା ପ୍ରଦାନ କରିଛନ୍ତି।
ଦିଲ୍ଲୀର ବିଦେଶୀ ଖବରଦାତା କ୍ଲବରେ ପୂର୍ବତନ ବାଂଲାଦେଶୀ ପ୍ରଧାନମନ୍ତ୍ରୀ ଶେଖ ହାସିନାଙ୍କ ସହ ଭର୍ଚୁଆଲି ଯୋଗଦାନ ଏବଂ ଆଲୋଚନା କରିବାର କିଛି ଘଣ୍ଟା ପରେ ସାକିବଙ୍କ ଘର ଉପରେ ଆକ୍ରମଣ ହୋଇଥିଲା। ଏହି କାର୍ଯ୍ୟକ୍ରମ ଶେଖ ହାସିନାଙ୍କ ବହିଷ୍କାରର ଦୁଇ ବର୍ଷ ପରେ ଅନୁଷ୍ଠିତ ହୋଇଥିଲା। ଦୁଇ ବର୍ଷ ପୂର୍ବରୁ ହାସିନା ତାଙ୍କ ଦେଶ ଛାଡି ଭାରତ ପଳାଇ ଯାଇଥିଲେ।
ଗଣମାଧ୍ୟମ ରିପୋର୍ଟ ଅନୁସାରେ, ସାକିବଙ୍କ ଘରେ ପେଟ୍ରୋଲ ବୋମା ଫିଙ୍ଗିଥିବା ଆକ୍ରମଣକାରୀମାନେ ପ୍ରଥମେ ଇଟା ଏବଂ ପଥରରେ ଆକ୍ରମଣ କରିଥିଲେ। ଫଳରେ ଝରକା ଏବଂ କାଚ ଭାଙ୍ଗି ଯାଇଥିଲା। ଏହା ପରେ ଘରକୁ ନିଆଁ ଲଗାଇବାକୁ ଚେଷ୍ଟା କରାଯାଇଥିଲା। ଜଣେ ପୋଲିସ ଅଧିକାରୀ କହିଛନ୍ତି ଯେ ଆକ୍ରମଣକାରୀ କିଏ ଥିଲେ କିମ୍ବା ସେମାନେ କାହିଁକି ଏପରି କଲେ ସେ ବିଷୟରେ ଏପର୍ଯ୍ୟନ୍ତ କୌଣସି ସୂଚନା ମିଳିନାହିଁ। ଏହି ଘଟଣା ପରେ ସାକିବଙ୍କ ଘର ଏବଂ ଆଖପାଖ ଅଞ୍ଚଳରେ ପୋଲିସ ମୁତୟନ କରାଯାଇଛି।