ସମ୍ବଲପୁର: ୫୦୦ରୁ ଉର୍ଦ୍ଧ୍ବ ଲୋକଙ୍କୁ ଆର୍ଥିକ ଠକେଇ କରିବା ଅଭିଯୋଗରେ ସମ୍ବଲପୁରରେ ପୋଲିସ ଜଣେ ବ୍ୟକ୍ତିଙ୍କୁ ଗିରଫ କରିଛି। ନିବେଶକଙ୍କୁ ଜମା ଟଙ୍କା ଉପରେ ଅଧିକ ରିଟର୍ଣ୍ଣ ପ୍ରଦାନ କରିବା ନେଇ ପ୍ରଲୋଭନ ଦେଉଥିଲା।
ସନ୍ତୋଷ ଆଚାର୍ଯ୍ୟ ନାମକ ଅଭିଯୁକ୍ତକୁ ସମ୍ବଲପୁରର ଧନୁପାଲି ଥାନା ଅଧୀନସ୍ଥ କୁଲୁଥକାନି ଅଞ୍ଚଳରୁ ଗିରଫ କରାଯାଇଥିବା ଜଣାପଡ଼ିଛି।
ବିଭିନ୍ନ ଅଞ୍ଚଳରେ କାୟା ବିସ୍ତାର କରିଥିବା ଏହି ନେଟୱାର୍କର ମାଷ୍ଟରମାଇଣ୍ଡ ଭାବରେ ସେ କାର୍ଯ୍ୟ କରୁଥିଲା। MCX ନାମରେ ଏହି ଠକେଇ କାର୍ଯ୍ୟ କରାଯାଇଥିଲା।
ଅଭିଯୁକ୍ତ ଜଣକ କେବଳ ସମ୍ବଲପୁର ଜିଲ୍ଲାରେ ୫୦୦ରୁ ଅଧିକ ନିବେଶକଙ୍କୁ କୋଟି କୋଟି ଟଙ୍କା ଠକି ନେଇଥିବା ଅଭିଯୋଗ ହୋଇଛି।
ସୂଚନା ଅନୁଯାୟୀ ୧୦ ଲକ୍ଷ ଟଙ୍କା ଜମା କରୁଥିବା ନିବେଶକମାନଙ୍କୁ ୫ ପ୍ରତିଶତ ସୁଧ ଦେବାକୁ ପ୍ରତିଶ୍ରୁତି ଦିଆଯାଇଥିଲା। ସେହିପରି ୨୦ ଲକ୍ଷ ଟଙ୍କା ନିବେଶ କରୁଥିବା ନିବେଶକମାନଙ୍କୁ ୭ ପ୍ରତିଶତ ସୁଧ ଏବଂ ୧ କୋଟି ଟଙ୍କା ଜମା ଉପରେ ୮ ପ୍ରତିଶତ ସୁଧ ମିଳିବା ନେଇ ପ୍ରଲୋଭିତ କରାଯାଇଥିଲା।
ତେବେ ଉକ୍ତ କମ୍ପାନୀ ୨୦୨୪ ମସିହାରେ ବନ୍ଦ ହୋଇଯାଇଥିବା ନିବେଶକମାନେ ଜାଣିବା ପରେ ଘଟଣା ସାମ୍ନାକୁ ଆସିଥିଲା। ଅପରପକ୍ଷରେ ଅଭିଯୁକ୍ତଙ୍କର କୌଣସି ଇଣ୍ଟରନ୍ୟାସନାଲ ଲିଙ୍କ ଅଛି କି ନାହିଁ ତାହା ଜାଣିବା ପାଇଁ ଅଧିକ ତଦନ୍ତ ଚାଲିଛି।
Comments are closed.