ସ୍କୁଲ ବ୍ୟାଗରୁ ଗଞ୍ଜେଇ ଜବତ, ୭ ଜଣଙ୍କୁ ଧରିଲା ପୋଲିସ

କୋରାପୁଟ: ଅଭିନବ ଉପାୟରେ ଗଞ୍ଜେଇ ଚାଲାଣ । ତାହା ପୁଣି ସ୍କୁଲ ବ୍ୟାଗ୍‌ରେ । କିଛି ଯୁବକ ସ୍କୁଲ ବ୍ୟାଗରେ ଗଞ୍ଜେଇ ନେଉଥିବା ବେଳେ ମାଛକୁଣ୍ଡ ପୋଲିସ ହାତରେ ଧରାପଡ଼ିଛନ୍ତି ।
କୋରାପୁଟ ଜିଲା ମାଛକୁଣ୍ଡ ପୋଲିସ ଶନିବାର ପାଟ୍ରୋଲିଂ କରୁଥିଲା । ଏହି ସମୟରେ ମଲେଗାଁ ଛକରେ ୪ ଜଣ ଯୁବକ ସ୍କୁଲ ବ୍ୟାଗ୍ କାନ୍ଧରେ ପକାଇ ବସକୁ ଅପେକ୍ଷା କରିଥିଲେ । ପୋଲିସ ସେମାନଙ୍କୁ ସନ୍ଦେହ କରି ବ୍ୟାଗ୍ ଯାଞ୍ଚ କରିଥିଲା । ପରେ ସେଥିରେ ଗଞ୍ଜେଇ ଥିବା ଜାଣିବାକୁ ପାଇଥିଲା । ପୋଲିସ ସେମାନଙ୍କଠାରୁ ୨୦ କେଜି ଗଞ୍ଜେଇ ଜବତ କରିବା ସହ ଉକ୍ତ ୪ ଜଣଙ୍କୁ ଗିରଫ କରିଥିଲା । ସେମାନେ ହେଲେ ୟପୁ ଅଞ୍ଚଳର ଅଜିତ ରାମା , ସୋନୁ ରାମ ଏବଂ ବିହାର ଅଞ୍ଚଳର ସନ୍ଦୀପ କଇସବ, ସୁମିତ ମିଶ୍ରା । ପଚରା ଉଚରା ପରେ ସେମାନେ ସ୍ଥାନୀୟ ଯୁବକଙ୍କଠାରୁ ଏହି ଗଞ୍ଜେଇ କିଣିଥିବା କହିଥିଲେ । ପୋଲିସ ସଙ୍ଗେ ସଙ୍ଗେ ଉକ୍ତ ସ୍ଥାନକୁ ଯାଇ ସେଠାରୁ ୩ ଜଣଙ୍କୁ ଗିରଫ କରିଥିଲା । ସେମାନେ ହେଲେ ମାଲେଗାଁ ଗ୍ରାମ ର ମଙ୍ଗଳା ଖିଲ ,ସୁକୁ ଦାର୍ଲି ଏବଂ ଆନ୍ଧ୍ରପ୍ରଦେଶ ମୁଚିମ ପୁଟ ଅଞ୍ଚଳର ବଲରାମ ମୁକି । ଜବତ ଗଞ୍ଜେଇର ମୂଲ୍ୟ ୨ ଲକ୍ଷ ଟଙ୍କା ହେବ । ଏହି ଗଞ୍ଜେଇ ଲମତାପୁଟ ଅଞ୍ଚଳରୁ ବାହାର ରାଜ୍ୟକୁ ଚାଲାଣ ହେଉଥିଲା ବୋଲି ଏସଡ଼ିପିଓ ସଞ୍ଜୟ ମହାପତ୍ର ପ୍ରକାଶ କରିଛି । ଏହି ଚଢାଉ ଲମତାପୁଟ ଫାଣ୍ଡି ଅଧିକାରୀ ଚିତପ୍ରଧାନୀଙ୍କ ନେତୃତ୍ୱ କରାଯାଇଥିଲା ।