ହମାସକୁ ବଡ ଧକ୍କା: ଦୁଇଫାଳ ହେଲା ଗାଜାପଟ୍ଟି, ଆହୁରି ଭୟଙ୍କର ଯୁଦ୍ଧ ହେବ ବୋଲି ଚେତାବନୀ ଦେଲା ଇସ୍ରାଏଲ

ନୂଆଦିଲ୍ଲୀ:ଇସ୍ରାଏଲ ଏବଂ ହମାସ ମଧ୍ୟରେ ଚାଲିଥିବା ଯୁଦ୍ଧ ଏବେ ଭହାବହ ସ୍ଥିତିରେ । ସବୁଠାରୁ ଗୁରୁତ୍ୱପୂର୍ଣ୍ଣ ଖବର ହେଉଛି, ଗାଜାକୁ ଏବେ ଦୁଇ ଭାଗ କରିଦିଆ ଯାଇଛି । ଇସ୍ରାଏଲି ସେନା ପକ୍ଷରୁ ଦାବି କରାଯାଇଛି, ଗାଜା ଉତ୍ତର ଏବଂ ଦକ୍ଷିଣ ଏହିପରି ୨ ଭାଗରେ ବିଭକ୍ତ ହୋଇଯାଇଛି । ଫଳରେ ହମାସକୁ ଶକ୍ତ ଧକ୍କା ହୋଇଛି । ସେତିକି ନୁହେଁ, ହମାସ ଉପରେ ଏବେ ଭୟଙ୍କର ଆକ୍ରମଣ ହେବ ବୋଲି କୁହାଯାଉଛି ।
ଇସ୍ରାଏଲ ପକ୍ଷରୁ କିଛିଦିନ ପୂର୍ବରୁ ଗାଜାର ସାଧାରଣ ଲୋକଙ୍କୁ ଉତ୍ତରରୁ ଦକ୍ଷିଣ ଗାଜାକୁ ଚାଲିଯିବା ପାଇଁ କହିଥିଲା । ଏଥିପାଇଁ ସମୟ ବି ଦେଇଥିଲା । ତେବେ ଗାଜା ୨ ଭାଗରେ ବିଭକ୍ତ ହୋଇଯିବା ପରେ ହମାସର ସମସ୍ୟା ଆହୁରି ବଢି ଯାଇଛି । ହମାସ ଆତଙ୍କୀଙ୍କୁ ଆତ୍ମଗୋପନ କରିବା ପାଇଁ ଆଉ କୌଣସି ଜାଗା ନାହିଁ।
ଏହା ପୂର୍ବରୁ ଇସ୍ରାଏଲ ପକ୍ଷରୁ ସ୍ପଷ୍ଟ କୁହାଯାଇଥିଲା, ହମାସ ଶେଷ ନ ହେବା ପର୍ଯ୍ୟନ୍ତ ଯୁ୍ଦ୍ଧ ବନ୍ଦ ହେବ ନାହିଁ । ଯୁଦ୍ଧ ବିରତିର ପ୍ରଶ୍ନ ଉଠୁନାହିଁ । ଇସ୍ରାଏଲ ଆର୍ମିର ମୁଖପାତ୍ର ଡେନିୟଲ ହେଗରୀ କହିଛନ୍ତି, ସେନା ଗାଜା ସିଟିକୁ ଚାରିପଟୁ ଘେରି ରଖିଛନ୍ତି । ଏବେ ଗାଜା ଉତ୍ତର ଏବଂ ଦକ୍ଷିଣ ଦୁଇଭାଗରେ ବିଭକ୍ତ ହୋଇଯାଇଛି । ଆମର ସେନା କୋଷ୍ଟଲାଇନ ଯାଏ ପହଞ୍ଚି ଗଲେଣି ଏବଂ ଗାଜାକୁ ନିଜ କବ୍ଜାକୁ ନେଇ ଗଲେଣି । ସ୍ଥଳଭାଗ ଏବଂ ଆକାଶ ମାର୍ଗ ଦୁଇପଟୁ ଆତଙ୍କୀ ଆଡ୍ଡାସ୍ଥଳ ଉପରକୁ ଆକ୍ରମଣ କରାଯାଉଛି ।