ରେଷ୍ଟୁରାଣ୍ଟ ମାଲିକଙ୍କ ପାଇଁ ଖୁସି ଖବର: ଚୁକ୍ତିନାମାରୁ ବିବାଦୀୟ ‘ପ୍ରାଇସ୍ ପାରିଟି’ ନିୟମ ହଟାଇଲା ଜୋମାଟୋ
ନୂଆଦିଲ୍ଲୀ: ଭାରତର ଅଗ୍ରଣୀ ଫୁଡ୍ ଡେଲିଭରୀ ଆପ୍ ‘ଜୋମାଟୋ’ ରେଷ୍ଟୁରାଣ୍ଟ ମାଲିକମାନଙ୍କ ପାଇଁ ଏକ ବଡ଼ ତଥା ଆଶ୍ୱସ୍ତିକର ନିଷ୍ପତ୍ତି ନେଇଛି । ଏଣିକି କୌଣସି ରେଷ୍ଟୁରାଣ୍ଟ ନିଜ ଗ୍ରାହକଙ୍କୁ ସିଧାସଳଖ କିମ୍ବା ଅନ୍ୟ କୌଣସି ପ୍ଲାଟଫର୍ମରେ ଶସ୍ତା ଖାଦ୍ୟ ଯୋଗାଇଦେଲେ ଜୋମାଟୋ ସେମାନଙ୍କ ଉପରେ କୌଣସି ଜୋରିମାନା ଲଗାଇବ ନାହିଁ । ଦେଶର ଲକ୍ଷ ଲକ୍ଷ ହୋଟେଲ ବ୍ୟବସାୟୀଙ୍କ ଦୀର୍ଘ ଦିନର ଅସନ୍ତୋଷ ଏବଂ ବିରୋଧ ପରେ କମ୍ପାନୀ ନିଜର ଚୁକ୍ତିନାମାରୁ ଏହି ବିବାଦୀୟ ‘ମୂଲ୍ୟ ନିର୍ଦ୍ଧାରଣ କଟକଣା’ ବା ‘ପ୍ରାଇସ୍ ପାରିଟି କ୍ଲଜ୍’କୁ ହଟାଇ ଦେଇଛି ବୋଲି ସୂତ୍ରରୁ ପ୍ରକାଶ ।
ଦୀର୍ଘ ବର୍ଷ ଧରି ଜୋମାଟୋ ନିଜ ଚୁକ୍ତିନାମାରେ ଏକ ସ୍ୱତନ୍ତ୍ର ନିୟମ ରଖିଥିଲା, ଯାହା ରେଷ୍ଟୁରାଣ୍ଟଗୁଡ଼ିକୁ ଜୋମାଟୋ ଆପ୍ରେ ସର୍ବନିମ୍ନ ମୂଲ୍ୟ ରଖିବାକୁ ବାଧ୍ୟ କରୁଥିଲା । ଏହି ନିୟମ ଅନୁଯାୟୀ, ଯଦି କୌଣସି ରେଷ୍ଟୁରାଣ୍ଟ ସିଧାସଳଖ ଆସୁଥିବା ଗ୍ରାହକଙ୍କୁ ବା ଅନ୍ୟ କୌଣସି ଡେଲିଭରୀ ଆପ୍ ମାଧ୍ୟମରେ ଜୋମାଟୋରେ ଦର୍ଶାଯାଇଥିବା ଦାମ୍ ଠାରୁ କମ୍ ଦାମରେ ଖାଦ୍ୟ ବିକ୍ରି କରୁଥିଲା, ତେବେ ଜୋମାଟୋ ସେମାନଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରୁଥିଲା । ଏପରିକି ଦାମ୍ରେ ଥିବା ତାରତମ୍ୟର ତିନି ଗୁଣା ଅର୍ଥ ଜୋରିମାନା ଭାବେ ଆଦାୟ କରିବାର ପ୍ରାବଧାନ ମଧ୍ୟ ଥିଲା । ରେଷ୍ଟୁରାଣ୍ଟଗୁଡ଼ିକ ଏହି ନିୟମ ମାନୁଛନ୍ତି କି ନାହିଁ ତାହା ଯାଞ୍ଚ କରିବା ପାଇଁ କମ୍ପାନୀ ‘ମିଷ୍ଟ୍ରି ସପିଂ’ ଭଳି କୌଶଳ ମଧ୍ୟ ଆପଣାଉଥିଲା ।
ନ୍ୟାସନାଲ ରେଷ୍ଟୁରାଣ୍ଟ ଆସୋସିଏସନ ଅଫ୍ ଇଣ୍ଡିଆ ପକ୍ଷରୁ ଏହି ନିୟମକୁ ଦୀର୍ଘ ଦିନ ଧରି ତୀବ୍ର ବିରୋଧ କରାଯାଉଥିଲା । ଏହାକୁ ଏକଚାଟିଆ ନୀତି ବୋଲି ଦର୍ଶାଇ ସଂଘର ସଭାପତି ସାଗର ଜେ. ଦରିଆନି କହିଥିଲେ ଯେ, “ଖାଦ୍ୟ ଓ ଉତ୍ପାଦ ଆମର, ତେଣୁ ଏହାର ଦାମ୍ ସ୍ଥିର କରିବାର ସମ୍ପୂର୍ଣ୍ଣ ସ୍ୱାଧୀନତା ମଧ୍ୟ ଆମର ରହିବା ଉଚିତ୍ ।” ରେଷ୍ଟୁରାଣ୍ଟ ମାଲିକମାନଙ୍କର ଏହି କ୍ରମାଗତ ଅସନ୍ତୋଷ ଏବଂ ଭାରତୀୟ ପ୍ରତିସ୍ପର୍ଦ୍ଧା ଆୟୋଗ (CCI) ପକ୍ଷରୁ ଏକଚାଟିଆ ବ୍ୟବସାୟ ନେଇ ଚାଲିଥିବା ତଦନ୍ତର ଚାପରେ ପଡ଼ି ଜୋମାଟୋ ଶେଷରେ ଏହି ନିଷ୍ପତ୍ତିରୁ ଓହରି ଯାଇଛି । ଅବଶ୍ୟ କମ୍ପାନୀ ପକ୍ଷରୁ ଆନୁଷ୍ଠାନିକ ଭାବେ ଏହାର କୌଣସି କାରଣ ଦର୍ଶାଯାଇନାହିଁ ।
ସୂଚନାଯୋଗ୍ୟ ଯେ, ବର୍ତ୍ତମାନ ଜୋମାଟୋ ଆପ୍ ସହିତ ଦେଶର ପ୍ରାୟ ୩ ଲକ୍ଷ ରେଷ୍ଟୁରାଣ୍ଟ ଯୋଡ଼ି ହୋଇଥିବା ବେଳେ ଏହାର ୨.୪ କୋଟି ଗ୍ରାହକ ଅଛନ୍ତି ଏବଂ କମ୍ପାନୀର ବଜାର ମୂଲ୍ୟ ପ୍ରାୟ ୨୬ ବିଲିୟନ୍ ଡଲାର ରହିଛି । ଆଗାମୀ ଦିନରେ ସରକାରୀ ସମର୍ଥିତ ‘ଓଏନଡିସି’ (ONDC) ଏବଂ ପ୍ରତିଦ୍ୱନ୍ଦ୍ୱୀ କମ୍ପାନୀମାନେ କମ୍ କମିଶନରେ ରେଷ୍ଟୁରାଣ୍ଟଗୁଡ଼ିକୁ ନିଜ ଆଡ଼କୁ ଆକୃଷ୍ଟ କରୁଥିବାରୁ ଜୋମାଟୋର ଏହି ପରିବର୍ତ୍ତିତ ନିଷ୍ପତ୍ତି ଏକ ବ୍ୟବସାୟିକ ରଣନୀତିର ଅଂଶ ବୋଲି ବିବେଚନା କରାଯାଉଛି । ଆଇନ ବିଶେଷଜ୍ଞଙ୍କ ମତରେ, ଏହି ନିୟମ ଉଚ୍ଛେଦ ଫଳରେ ରେଷ୍ଟୁରାଣ୍ଟଗୁଡ଼ିକ ଏବେ ଗ୍ରାହକଙ୍କୁ ନିଜ ଇଚ୍ଛା ଅନୁଯାୟୀ ସିଧାସଳଖ ରିହାତି ପ୍ରଦାନ କରିପାରିବେ ।