ନୂଆଦିଲ୍ଲୀ: ଓଡ଼ିଶାର ଖଣି ଆବଣ୍ଟନ ପ୍ରକ୍ରିୟା ଚାଲିଥିବା ବେଳେ ମୟୂରଭଞ୍ଜର ଗୋରୁମହିଷାଣୀ ଲୁହାପଥର ଖଣି ହସ୍ତଗତ କରିଛି ପୂର୍ବରୁ ଲିଜ୍ ରଖିଥିବା ଘନଶ୍ୟାମ ମିଶ୍ର ଏଣ୍ଡ ସନ୍ସ ପ୍ରାଇଭେଟ୍ ଲିମିଟେଡ଼ କମ୍ପାନୀ । ଏହି ଲୁହାପଥର ଖଣିକୁ ୧୧୫ ପ୍ରତିଶତ ପ୍ରିମିୟମରେ ହସ୍ତଗତ କରିଛି ଏହି କମ୍ପାନୀ ।
ଗୋରୁମହିଷାଣୀ ଲୁହାପଥର ଖଣିରେ ଆନୁମାନିକ ୧୭.୬୦ ମିଲିୟନ ଟନର ଖଣିଜ ପଥର ଗଚ୍ଛିତ ରହିଛି ଏବଂ ଏଥିଲାଗି ସମୁଦାୟ ୧୧ଟି କମ୍ପାନୀ ବିଡ଼ର୍ ରହିଥିଲେ ।
ଓଡ଼ିଶା ସରକାର ଏହି ଖଣି ଲାଗି ପୂର୍ବରୁ ୬୬.୨୫ ପ୍ରତିଶତ ଫ୍ଲୋର ଦର ରଖିଥିବାର ସୂଚନା ମିଳିଛି ।
ଓଡ଼ିଶାର ୧୯ଟି ଖଣି ମଧ୍ୟରୁ ଏହା ୧୧ତମ ଖଣି ଭାବେ ନିଲାମ ଅନୁଷ୍ଠିତ ହୋଇଛି ।
ଋବିବାର ଦିନ ଗୋଆର ଫୋର୍ମେଣ୍ଟୋ ଇଣ୍ଡଷ୍ଟ୍ରିଆଲ୍ ପ୍ରା ଲିଃ ନଦୀଡ଼ିହ ଲୁହାପଥର ଓ ମାଙ୍ଗାନିଜ୍ ଖଣି ନିଲାମରେ ହସ୍ତଗତ କରିଥିଲା । ଏହି ଖଣିକୁ ଫର୍ମେଣ୍ଟୋ ୧୪୧.୨୫ ପ୍ରତିଶତ ବିକ୍ରିମୂଲ୍ୟ ଓଡ଼ିଶା ସରକାରଙ୍କୁ ଦେବାର ନିଷ୍ପତ୍ତି ଗ୍ରହଣ କରିଥିଲା ।
ଏଠାରେ ସୂଚନାଯୋଗ୍ୟ, ଶନିବାର ଦିନ ନିଲାମ ହୋଇଥିବା ମହୁଲସୁଖା ଲୁହାପଥର ଓ ମାଙ୍ଗାନିଜ୍ ଖଣିକୁ ପଟ୍ଟନାୟକ ମିନେରାଲ୍ସ ପ୍ରାଇଭେଟ୍ ଲିମିଟେଡ଼ ହସ୍ତଗତ କରିଥିଲା । ଏହି ଖଣିକୁ ୯୨.୭୦ ପ୍ରତିଶତ ପ୍ରିମିୟମରେ ଏହି କମ୍ପାନୀ କରାୟତ କରିପାରିଛି ।
ସେହିପରି ଭାବେ ଶୁକ୍ରବାର ଦିନ କୋଲକାତାର ଖଟୁଆ ନର୍ଭେରାମ ଏଣ୍ଡ କମ୍ପାନୀ ରଇଡ଼ା ୨ ଲୁହାପଥର ଖଣି ହାସଲ କରିପାରିଛି । ଏହାକୁ ୯୦.୯୦ ପ୍ରତିଶତ ବିକ୍ରିମୂଲ୍ୟରେ ହାସଲ କରିପାରିଛି ।
କେନ୍ଦୁଝର ଜିଲ୍ଲାରେ ଥିବା ଝିଲିଙ୍ଗ-ଲଙ୍ଗଲୋଟା ଲୁହାପଥର ଖଣିକୁ ଶ୍ୟାମ ଓର୍ ୧୩୫ ପ୍ରତିଶତ ବିକ୍ରିମୂଲ୍ୟ ଓଡ଼ିଶା ସରକାରଙ୍କୁ ଦେବାକୁ ନିଷ୍ପତ୍ତି ଗ୍ରହଣ କରି ହାସଲ କରିପାରିଛି ।
ବଳଦା ଲୁହାପଥର ଖଣିକୁ ଫେବୃଆରୀ ୪ ତାରିଖ ଦିନ ସେରାଜୁଦ୍ଦିନ୍ ଏଣ୍ଡ କମ୍ପାନୀ ନେଇଥିବା ବେଳେ ଫେବୃଆରୀ ୩ ତାରିଖ ଦିନ ଠାକୁରାଣୀ ଲୁହାପଥର ଖଣିକୁ ଆର୍ସେଲର୍ ମିତ୍ତଲ୍ ଇଣ୍ଡିଆ ପ୍ରାଇଭେଟ୍ କମ୍ପାନୀ ଅକ୍ତିଆର କରିପାରିଛି ।
Comments are closed.