ଏମିିତି ଏକ ରକ୍ତ ଯାହା ବିଶ୍ୱର ଜଣେ ଲୋକଙ୍କ ଶୀରରେ ରହିଛି, ମିଳିଲା ଦୁନିଆର ଦୁର୍ଲଭ ବ୍ଲଡ ଗ୍ରୁପ

ନୂଆଦିଲ୍ଲୀ: ଯେତେବେଳେ ବ୍ଲଡ ଗ୍ରୁପ ବିଷୟରେ ଆଲୋଚନା ହୁଏ, ଆମେ ସାଧାରଣତଃ A, B, AB ଓ O ଗ୍ରୁପ ବିଷୟରେ ଜାଣିଥାଉ। କିନ୍ତୁ ବିଜ୍ଞାନ ଜଗତରେ ଏକ ଏପରି ଆବିଷ୍କାର ହୋଇଛି, ଯାହା ଚିକିତ୍ସା ବିଜ୍ଞାନକୁ ଆଶ୍ଚର୍ଯ୍ୟ କରିଦେଇଛି। ଏକ ଏପରି ବ୍ଲଡ ଗ୍ରୁପ ଖୋଜାଯାଇଛି, ଯାହା ସମଗ୍ର ପୃଥିବୀରେ କେବଳ ଜଣେ ବ୍ୟକ୍ତିଙ୍କ ଶରୀରରେ ମିଳିଛି। ଏହାର ନାମ ଦିଆଯାଇଛି ‘ଗ୍ୱାଡା ନେଗେଟିଭ୍’ (Gwada Negative)। ଏହି ଆବିଷ୍କାରକୁ ୨୦୨୫ ମସିହା ଜୁନରେ ମିଲାନରେ ଅନୁଷ୍ଠିତ ଇଣ୍ଟରନ୍ୟାସନାଲ ସୋସାଇଟି ଅଫ ବ୍ଲଡ ଟ୍ରାନ୍ସଫ୍ୟୁଜନ (ISBT) ସମ୍ମେଳନରେ ଆନୁଷ୍ଠାନିକ ମାନ୍ୟତା ମିଳିଛି।

‘ଗ୍ୱାଡା ନେଗେଟିଭ୍’ କ’ଣ?

‘ଗ୍ୱାଡା ନେଗେଟିଭ୍’ କୌଣସି ସାଧାରଣ ବ୍ଲଡ ଗ୍ରୁପ ନୁହେଁ। ଏହା ବିଶ୍ୱର ୪୮ତମ ଆନୁଷ୍ଠାନିକ ବ୍ଲଡ ଗ୍ରୁପ ସିଷ୍ଟମ, ଯାହାକୁ ୨୦୨୫ ମସିହା ଜୁନରେ ISBT ଦ୍ୱାରା ମାନ୍ୟତା ଦିଆଯାଇଛି। ଫ୍ରେଞ୍ଚ ବ୍ଲଡ ଏଷ୍ଟାବ୍ଲିସମେଣ୍ଟ (EFS) ଏହି ବ୍ଲଡ ଗ୍ରୁପର ଆବିଷ୍କାର କରିଛି, ଏବଂ ଏହା ବର୍ତ୍ତମାନ କେବଳ ଗ୍ୱାଡେଲୂପ (Guadeloupe) ମୂଳରୁ ଜଣେ ୬୮ ବର୍ଷୀୟ ମହିଳାଙ୍କ ଶରୀରରେ ମିଳିଛି।  ଏହି ବ୍ଲଡ ଗ୍ରୁପକୁ EMM-negative ସିଷ୍ଟମ ଭାବେ ଶ୍ରେଣୀବଦ୍ଧ କରାଯାଇଛି। EMM ହେଉଛି ଏକ ଏଣ୍ଟିଜେନ, ଯାହା ପ୍ରାୟ ପ୍ରତ୍ୟେକ ମଣିଷର ରକ୍ତ କଣିକାରେ ଥାଏ। କିନ୍ତୁ ଏହି ମହିଳାଙ୍କ ଶରୀରରେ ଏହାର ସମ୍ପୂର୍ଣ୍ଣ ଅନୁପସ୍ଥିତି ଚିକିତ୍ସା ବିଜ୍ଞାନକୁ ଆଶ୍ଚର୍ଯ୍ୟ କରିଦେଇଛି।

ଆବିଷ୍କାରର ଆରମ୍ଭ ଓ ୧୫ ବର୍ଷର ରହସ୍ୟ

ଏହି ରହସ୍ୟମୟ ବ୍ଲଡ ଗ୍ରୁପର କାହାଣୀ ୨୦୧୧ରେ ଆରମ୍ଭ ହୋଇଥିଲା, ଯେତେବେଳେ ଗ୍ୱାଡେଲୂପ ମୂଳରୁ ଜଣେ ମହିଳା, ଯିଏ ପ୍ୟାରିସରେ ରହୁଥିଲେ, ତାଙ୍କର ଏକ ସାଧାରଣ ଅସ୍ତ୍ରୋପଚାର ପୂର୍ବରୁ ରକ୍ତ ପରୀକ୍ଷା କରାଯାଇଥିଲା। ସେହି ସମୟରେ ବୈଜ୍ଞାନିକମାନେ ତାଙ୍କ ରକ୍ତରେ ଏକ ଏପରି ଏଣ୍ଟିବଡି ଖୋଜି ପାଇଥିଲେ, ଯାହା କୌଣସି ଜଣାଶୁଣା ବ୍ଲଡ ଗ୍ରୁପ ସିଷ୍ଟମ ସହ ମେଳ ଖାଉ ନଥିଲା।

ସେହି ସମୟରେ, ଟେକ୍ନୋଲୋଜି ଏତେ ଉନ୍ନତ ନଥିଲା ଯେ ଏହି ଅଜଣା ବ୍ଲଡ ଗ୍ରୁପର ପରିଚୟ ସ୍ଥିର କରାଯାଇ ପାରିବ। କିନ୍ତୁ ୨୦୧୯ରେ, ନେକ୍ସଟ ଜେନେରେସନ ସିକ୍ୱେନ୍ସିଂ (NGS) ଟେକ୍ନୋଲୋଜିର ସାହାଯ୍ୟରେ ବୈଜ୍ଞାନିକମାନେ ଏହି ମହିଳାଙ୍କ ପୁରୁଣା ରକ୍ତ ନମୁନାର ପୁନଃ ପରୀକ୍ଷା କରିଥିଲେ ଏବଂ ଅନ୍ତିମ ଭାବେ ଏହି ଅନନ୍ୟ ରକ୍ତ ଗୋଷ୍ଠୀର ରହସ୍ୟ ସମାଧାନ କରିଥିଲେ।

କାହିଁକି ଏତେ ଦୁର୍ଲଭ?

‘ଗ୍ୱାଡା ନେଗେଟିଭ୍’ର ଅର୍ଥ ହେଉଛି ଏହି ମହିଳାଙ୍କ ରକ୍ତରେ EMM ଏଣ୍ଟିଜେନ ସମ୍ପୂର୍ଣ୍ଣ ରୂପେ ଅନୁପସ୍ଥିତ। ଏହା ଏକ ଅତ୍ୟନ୍ତ ଦୁର୍ଲଭ ଅବସ୍ଥା, କାରଣ EMM ଏକ ହାଇ-ଇନସିଡେନ୍ସ ଏଣ୍ଟିଜେନ, ଯାହା ପ୍ରାୟ ସମସ୍ତ ମଣିଷଙ୍କ ଶରୀରରେ ଥାଏ। ଏହାର ଅନୁପସ୍ଥିତି ଏହି ମହିଳାଙ୍କୁ ଚିକିତ୍ସା ଦୃଷ୍ଟିରୁ ଏକମାତ୍ର କରିଦେଇଛି।