ନୂଆଦିଲ୍ଲୀ : ପୁଣି ଫେରିଲା ମାସ୍କ । ଦେଶରେ କାୟା ମେଲାଇଲାଣି H3N2 ଇନ୍ଫ୍ଲୁଏଞ୍ଜା ସଂକ୍ରମଣ । ୫ରୁ ୭ଦିନ ଯାଏ ଲାଗିରହୁଛି ଜ୍ୱର, ଥଣ୍ଡା ଓ କାଶ ।ଏହି ଫ୍ଲୁ ବୃଦ୍ଧି ପାଉଥିବାରୁ ସ୍ୱାସ୍ଥ୍ୟ ବିଶେଷଜ୍ଞ ମାନେ ଫ୍ଲୁ ଟୀକା ଡ୍ରାଇଭ ଉପରେ ଗୁରୁତ୍ୱ ଦେବାକୁ ଆହ୍ୱାନ ଦେଇଛନ୍ତି । H3N2 ସ୍ୱାଇନ୍ ଫ୍ଲୁର ଶୀଘ୍ର ବିସ୍ତାର ବିଷୟରେ ଚେତାବନୀ ଦେଇ ଡକ୍ଟର ରଣଦୀପ ଗୁଲେରିଆ କହିଛନ୍ତି ଯେ ଲୋକଙ୍କୁ ଫେସ୍ ମାସ୍କ ଏବଂ ବାରମ୍ବାର ହାତ ସାନିଟାଇଜେସନ୍ ବ୍ୟବହାର କରିବା ଆବଶ୍ୟକ ।ଏଥିସହ ସମସ୍ତଙ୍କୁ ଟୀକାକରଣ କରାଯିବା ଉଚିତ ବୋଲି ସେ କହିଛନ୍ତି ।
ନାଗପୁରରେ ଏକାଡେମୀ ଅଫ୍ ମେଡିକାଲ ସାଇନ୍ସ (ଏମ୍ଏସ୍) ଦ୍ୱାରା ଆୟୋଜିତ ଏକ ଆଲୋଚନାଚକ୍ରରେ ଡାକ୍ତର ରଣଦୀପ ଗୁଲେରିଆ ଭାଷଣ ଦେଇଥିଲେ। ଏହି ସମୟରେ, ମାସ୍କକୁ ପୁନର୍ବାର ବାଧ୍ୟତାମୂଳକ କରାଯିବା ଉଚିତ କି ବୋଲି ପଚରାଯିବାରୁ ଡାକ୍ତର ରଣଦୀପ ଗୁଲେରିଆ କହିଛନ୍ତି ଯେ ଏହା ଏକ ବୁନ୍ଦା ସଂକ୍ରମଣ ହୋଇ କାଶରେ ବ୍ୟାପିଥିବାରୁ ମାସ୍କ ବ୍ୟବହାର କରିବାର ଆବଶ୍ୟକତା ରହିଛି।
ସେ ଆହୁରି ମଧ୍ୟ କହିଛନ୍ତି, ସ୍କୁଲରେ ଛାତ୍ରଛାତ୍ରୀ ମାନେ ସଂକ୍ରମଣର ଶିକାର ହୋଇଥାଆନ୍ତି ଏହାଦ୍ୱାରା ବଡ଼ମାନେ ମଧ୍ୟ ତାଙ୍କ ସଂସ୍ପର୍ଶରେ ଆସି ସେମାନେ ଏହି ରୋଗରେ ଆକ୍ରାନ୍ତ ହୋଇଥାଆନ୍ତି । ତେଣୁ ଆମେ ମାସ୍କ ପିନ୍ଧିବା, ନିୟମିତ ଭାବେ ହାତ ଧୋଇବା ଏବଂ ସାମାଜିକ ଦୂରତା ମଧ୍ୟ ବଜାୟ ରଖିବା ଆବଶ୍ୟକ । ଫ୍ଲୁ ଆଳରେ କୋଭିଡ ସଂକ୍ରମଣ ବଢିପାରେ ବୋଲି ଆଶଙ୍କା କରାଯାଉଛି । ତେବେ ଜ୍ୱର, ଥଣ୍ଡା ନ କମିଲେ ଡାକ୍ତରଙ୍କ ପରାମର୍ଶରେ ଡାକ୍ତରଖାନାରେ ଭର୍ତ୍ତି ହେବାକୁ ପରାମର୍ଶ ଦିଆଯାଇଛି।