ନୂଆଦିଲ୍ଲୀ: ଇସ୍ରାଏଲ ସେନା ଟ୍ରାପ ହେବେ। ଯେତେ ଇସ୍ରାଏଲ ସେନା ପ୍ରବେଶ କଲେ ମଧ୍ୟ ଆତଙ୍କବାଦୀ ଗୋଷ୍ଠୀ ଠିକ ସମୟରେ ସମସ୍ତ ସେନାକୁ ନିଜ ଜାଲରେ ଛିନ୍ଦା ଦେବାକୁ ପ୍ଲାନ ପ୍ରସ୍ତୁତ କରିଛି ବୋଲି କହିଛି। ଗାଜାରେ ଅକ୍ଟୋବର ମାସରୁ ଚାଲିଥିବା ଯୁଦ୍ଧ ଆହୁରି ଚାଲିବ। ହେଲେ ଏହାକୁ ନେଇ ଚିନ୍ତିତ ହେବା ଅପେକ୍ଷା ଆତଙ୍କୀ ଗୋଷ୍ଠୀ ହମାସ ଏହାକୁ ଏକ ସୁଯୋଗ ବୋଲି ଚିନ୍ତା କରିବା ସହ ଇସ୍ରାଏଲ ସେନାକୁ ପାନେ ଦେବାକୁ ଯୋଜନା ତିଆରି କରିଛି ବୋଲି ଅନ୍ତର୍ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି।
ହମାସ ବିଶ୍ୱାସ କରେ ଯେ ଏହା ଇସ୍ରାଏଲ ସେନାର ଅଗ୍ରଗତିକୁ ଦୀର୍ଘ ସମୟ ଧରି ଅଟକାଇ ରଖିପାରିବ ଏବଂ ତା’ର ପ୍ରମୁଖ ଶତ୍ରୁକୁ ଅସ୍ତ୍ରବିରତି ପାଇଁ ରାଜି ହେବାକୁ ବାଧ୍ୟ କରିପାରିବ।
ଏହି ସଂଗଠନ ପାଖରେ ଅସ୍ତ୍ରଶସ୍ତ୍ର, କ୍ଷେପଣାସ୍ତ୍ର, ଖାଦ୍ୟ ଓ ଚିକିତ୍ସା ସାମଗ୍ରୀ ମହଜୁଦ ରହିଛି। ପାଲେଷ୍ଟାଇନ ଏନକ୍ଲେଭର ଗଭୀରରେ ଖୋଦିତ ସୁଡଙ୍ଗର ଏକ ସହରରେ ଏହାର ହଜାର ହଜାର ଯୋଦ୍ଧା ମାସ ମାସ ଧରି ବଞ୍ଚି ରହିପାରିବେ ଏବଂ ସହରାଞ୍ଚଳ ଗରିଲା ରଣନୀତି ଦ୍ୱାରା ଇସ୍ରାଏଲ ସେନାକୁ ନିରାଶ କରିପାରିବେ।
ଚାଲିଥିବା ଯୁଦ୍ଧକୁ ଶେଷ କରିବା ପାଇଁ ଇସ୍ରାଏଲ ଉପରେ ଅନ୍ତର୍ଜାତୀୟ ଚାପ ପକାଉଛି ବୋଲି ହମାସ ବିଶ୍ୱାସ କରୁଛି। ଯେମିତି ସାଧାରଣ ଲୋକଙ୍କ ମୃତ୍ୟୁ ବଢ଼ିବାରେ ଲାଗିଛି, ଅସ୍ତ୍ରବିରତି ଏବଂ ଏକ ଆଲୋଚନା ସମାଧାନକୁ ବାଧ୍ୟ କରିପାରିବ ଯାହା ଇସ୍ରାଏଲର ପଣବନ୍ଦୀଙ୍କ ବଦଳରେ ହଜାର ହଜାର ପାଲେଷ୍ଟାଇନ୍ ବନ୍ଦୀଙ୍କ ମୁକ୍ତି ପରି ଏକ ବାସ୍ତବ ଆଶ୍ବସ୍ତି ଉଗ୍ରବାଦୀ ଗୋଷ୍ଠୀକୁ ଦେବ ବୋଲି କୁହାଯାଉଛି।
ବନ୍ଧକ ବଦଳରେ ଏଭଳି କଏଦୀଙ୍କୁ ମୁକ୍ତ କରିବା ପାଇଁ ବାଧ୍ୟ କରିବାକୁ ଚାହୁଁଛି ବୋଲି ହମାସ ଆମେରିକା ଓ ଇସ୍ରାଏଲକୁ ସ୍ପଷ୍ଟ କରିଦେଇଛି। ଦୀର୍ଘକାଳୀନ, ଦୀର୍ଘ 17 ବର୍ଷ ଧରି ଇସ୍ରାଏଲ ପକ୍ଷରୁ ଗାଜା ଉପରେ ଜାରି ରହିଥିବା ଅବରୋଧକୁ ସମାପ୍ତ କରିବାକୁ ହମାସ ଚାହୁଁଛି ବୋଲି କହିଛି।
ଗତ ଅକ୍ଟୋବର 7 ତାରିଖରେ ଗାଜାରେ ହମାସ ପକ୍ଷରୁ ହୋଇଥିବା ଆକ୍ରମଣରେ 1400 ଇସ୍ରାଏଲ ନାଗରିକ ପ୍ରାଣ ହରାଇଥିବା ବେଳେ 239 ଜଣ ଯବାନଙ୍କୁ ବନ୍ଦୀ କରି ରଖାଯାଇଛି।
ଗାଜାରେ ମୃତ୍ୟୁସଂଖ୍ୟା 9 ହଜାର ଟପିଛି। ପ୍ରତିଦିନ ହିଂସାକାଣ୍ଡ ଘଟୁଥିବାରୁ ସାରା ବିଶ୍ୱରେ ବିକ୍ଷୋଭର ନିଆଁ ଜଳୁଛି। ଏହି ଛୋଟିଆ ଜାଗାରେ ଫସି ରହିଥିବା 2 ନିୟୁତରୁ ଅଧିକ ଗାଜାବାସୀଙ୍କ ଅବସ୍ଥା ସଙ୍କଟାପନ୍ନ ରହିଛି। ଅନେକଙ୍କୁ ପାଣି, ଖାଦ୍ୟ କିମ୍ବା ବିଜୁଳି ମିଳୁନାହିଁ। ଗାଜାର ଏକ ଜନଗହଳିପୂର୍ଣ୍ଣ ଶରଣାର୍ଥୀ ଶିବିର ଉପରେ ମଙ୍ଗଳବାର ଦିନ ଇସ୍ରାଏଲର ରକେଟ୍ ଆକ୍ରମଣରେ 50 ଜଣ ପାଲେଷ୍ଟାଇନ୍ ନାଗରିକ ଏବଂ ଜଣେ ହମାସ କମାଣ୍ଡରଙ୍କ ମୃତ୍ୟୁ ଘଟିଛି।
ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ହମାସକୁ ସମୂଳେ ନିପାତ କରିବା ପାଇଁ ଶପଥ ନେବା ସହ ଅସ୍ତ୍ରବିରତି ଡାକରାକୁ ପ୍ରତ୍ୟାଖ୍ୟାନ କରିଛନ୍ତି। ଇସ୍ରାଏଲ୍ ଅଧିକାରୀମାନେ କହୁଛନ୍ତି ଯେ ଆଗକୁ କ’ଣ ହେବ ସେ ନେଇ ସେମାନେ କୌଣସି ଭ୍ରମରେ ନାହାନ୍ତି ଏବଂ ଆତଙ୍କବାଦୀମାନେ ସାଧାରଣ ନାଗରିକଙ୍କ ପଛରେ ଲୁଚି ରହିଥିବା ଅଭିଯୋଗ କରୁଛନ୍ତି।
ଜାତିସଂଘରେ ଇସ୍ରାଏଲର ପୂର୍ବତନ ରାଷ୍ଟ୍ରଦୂତ ତଥା ନେସେଟର ବୈଦେଶିକ ବ୍ୟାପାର ଓ ପ୍ରତିରକ୍ଷା କମିଟିର ପୂର୍ବତନ ସଦସ୍ୟ ଡାନି ଡାନନ କହିଛନ୍ତି, ଦେଶ ଏକ ଦୀର୍ଘ ଓ ଯନ୍ତ୍ରଣାଦାୟକ ଯୁଦ୍ଧ ପାଇଁ ନିଜକୁ ପ୍ରସ୍ତୁତ କରିଛି।
ସେ ରଏଟର୍ସକୁ କହିଛନ୍ତି, ଆମେ ଶେଷରେ ଜାଣୁ ଯେ ଆମେ ବିଜୟୀ ହେବୁ ଏବଂ ଆମେ ହମାସକୁ ପରାସ୍ତ କରିବୁ। ଆମକୁ ଅତ୍ୟନ୍ତ ସତର୍କ ଏବଂ ଅତ୍ୟନ୍ତ ଯତ୍ନବାନ ହେବାକୁ ପଡିବ ଏବଂ ବୁଝିବାକୁ ପଡିବ ଯେ ଯେଉଁଠି ଆକ୍ରମଣ ହେଉଛି ତାହା ଏକ ଅତ୍ୟନ୍ତ ଜଟିଳ ସହର।
ଆମେରିକା କହିଛି ଯେ ବର୍ତ୍ତମାନ ସାଧାରଣ ଅସ୍ତ୍ରବିରତି ସମୟ ନୁହେଁ, ଯଦିଓ ମାନବିକ ସହାୟତା ପହଞ୍ଚାଇବା ପାଇଁ ଯୁଦ୍ଧ ବିରତିର ଆବଶ୍ୟକତା ରହିଛି।