First space traveller: ହନୁମାନ ନା ନୀଲ ଆର୍ମଷ୍ଟ୍ରଙ୍ଗ, ମହାକାଶକୁ ପ୍ରଥମେ କିଏ ଯାଇଥିଲେ?, ଅନୁରାଗ ଠାକୁରଙ୍କ ଭାଷଣ ପରେ ଜୋର ଧରିଲା ବିତର୍କ…..

ନୂଆଦିଲ୍ଲୀ: ହିମାଚଳ ପ୍ରଦେଶର ଉନାରେ ଏକ ସ୍କୁଲ କାର୍ଯ୍ୟକ୍ରମରେ ଭାଷଣ ଦେଉଥିବା ସମୟରେ ବିଜେପି ସାଂସଦ ଏବଂ ପୂର୍ବତନ କେନ୍ଦ୍ର ମନ୍ତ୍ରୀ ଅନୁରାଗ ଠାକୁର ଛାତ୍ରମାନଙ୍କୁ କହିଥିଲେ ଯେ ଭଗବାନ ହନୁମାନଙ୍କୁ “ମହାକାଶରେ ଯାତ୍ରା କରିଥିବା ପ୍ରଥମ ବ୍ୟକ୍ତି” ଭାବରେ ବିବେଚନା କରାଯାଇପାରିବ। ଅନୁରାଗ ଠାକୁରଙ୍କ ଏହି ମନ୍ତବ୍ୟ ଏବେ ସୋସିଆଲ ମିଡିଆରେ ଭାଇରାଲ ହୋଇଛି। ଭିଡିଓରେ ଠାକୁର ଛାତ୍ରମାନଙ୍କୁ ପଚାରୁଥିବାର ଦେଖାଯାଇଛି, “ଅନ୍ତରୀକ୍ଷକୁ ଯାତ୍ରା କରିଥିବା ପ୍ରଥମ ମହାକାଶ ଯାତ୍ରୀ କିଏ ଥିଲେ?, ଛାତ୍ରଛାତ୍ରୀମାନେ ଉତ୍ତର ଦେଇଥିଲେ, ଯେ ନୀଲ ଆର୍ମଷ୍ଟ୍ରଙ୍ଗ । ହେଲେ ଏହା ପରେ ଅନୁରାଗ ଠାକୁର ନିଜସ୍ୱ ଉତ୍ତର ଦେଇଥିଲେ, ଯେ ମୁଁ ଭାବୁଛି ପ୍ରଭୁ ହନୁମାନ ଥିଲେ । ଠାକୁରଙ୍କ ମନ୍ତବ୍ୟ ସୋସିଆଲ ମିଡିଆରେ ବିତର୍କ ଆରମ୍ଭ କରିଛି । ଠାକୁରଙ୍କ ଯୁକ୍ତି ସହିତ ମଧ୍ୟ ୟୁଜର୍ସମାନେ ଦାବି କରୁଛନ୍ତି ଯେ, ଭଗବାନ ବ୍ରହ୍ମା, ଭଗବାନ ଇନ୍ଦ୍ର କିମ୍ବା ରାବଣ ମଧ୍ୟ ଭଗବାନ ହନୁମାନଙ୍କ ପୂର୍ବରୁ ମହାକାଶକୁ ଯାଇଥିଲେ। ନାସା ଅନୁଯାୟୀ, ସୋଭିଏତ୍ ୟୁନିଅନ୍‌ର ୟୁରି ଗାଗାରିନ୍ ମହାକାଶରେ ପ୍ରଥମ ମାନବ ଥିଲେ।  ଏଥିସହିତ କେହି କେହି ‘ପ୍ରଥମ ମହାକାଶ ଯାତ୍ରୀ ଥିଲେ ନାରଦ ମୁନି’ ବୋଲି ସୋସିଆଲ ମିଡିଆ ବ୍ୟବହାରକାରୀ ମତ ରଖିଛନ୍ତି ।  ଯାହାକୁ ନେଇ ଏବେ ସୋସିଆଲ ମିଡିଆରେ ମହା ବିତର୍କ ଛିଡିଛି । କିଏ ମହାକାଶକୁ ପ୍ରଥମେ ଯାଇଥିଲେ ?

ତେବେ କହିରଖୁଛୁ, ଉଭୟ ଉତ୍ତର ମଧ୍ୟରୁ କେଉଁଟାକୁ ବି ଠିକ୍ ବୋଲି କୁହାଯାଇପାରିବ ନାହିଁ । କାରଣ ଇତିହାସ କହୁଛି, ମହାକାଶକୁ ଯାତ୍ରା କରିଥିବା ପ୍ରଥମ ମାନବ ଥିଲେ ସୋଭିଏତ୍ ମହାକାଶଚାରୀ ୟୁରି ଗାଗାରିନ୍, ଯିଏ ୧୯୬୧ ମସିହାରେ ପୃଥିବୀ ପରିକ୍ରମା କରିଥିଲେ। ୧୯୬୯ ମସିହାରେ ଆମେରିକାର ନୀଲ ଆର୍ମଷ୍ଟ୍ରଙ୍ଗ ଚନ୍ଦ୍ରରେ ପାଦ ରଖିଥିବା ପ୍ରଥମ ମାନବ ହୋଇଥିଲେ। ଆଉ ନୀଲ ଆର୍ମଷ୍ଟ୍ରଙ୍ଗ ଏବଂ ପ୍ରଭୁ ହନୁମାନ ଭୁଲ୍ ଉତ୍ତର । କାରଣ ପୌରାଣିକ କାହାଣୀକୁ ଇତିହାସ ଭାବରେ ଦର୍ଶାଯାଇପାରିବ ନାହିଁ ବୋଲି ଯୁକ୍ତି ବାଢିଛନ୍ତି ଆଲୋଚକ । ସେମାନଙ୍କ କହିବା ଅନୁସାରେ, ଉପନିବେଶମୁକ୍ତ କରିବା ଏବଂ ଆମ ନିଜ ସଂସ୍କୃତିରେ ଗର୍ବ କରିବା ଅର୍ଥ ବିଜ୍ଞାନ ଏବଂ ଇତିହାସ ନାମରେ ପୌରାଣିକ କାହାଣୀକୁ ପ୍ୟାକେଜିଂ କରିବା ନୁହେଁ ।

ଏହି ଘଟଣା ନେଇ ଅନୁରାଗଙ୍କୁ ସମାଲୋଚନା ବି କରାଯାଇଛି । ସମାଲୋଚକ କହିଛନ୍ତି ଯେ, ଯେତେବେଳେ ଛାତ୍ରମାନେ ଏକ ସ୍ୱରରେ ନୀଲ ଆର୍ମଷ୍ଟ୍ରଙ୍ଗଙ୍କୁ ଉତ୍ତର ଦେଲେ, ଠାକୁର କହିଥିଲେ: “ମୁଁ ଭାବୁଛି ଏହା ହନୁମାନଜୀ ଥିଲେ। ଏହା ଦର୍ଶାଏ ଯେ ଆମର ହଜାର ହଜାର ବର୍ଷ ପୁରୁଣା ପରମ୍ପରା, ଜ୍ଞାନ ଏବଂ ସଂସ୍କୃତି ଗୁରୁତ୍ୱପୂର୍ଣ୍ଣ। ଯଦି ଆମେ ନିଜ ବିଷୟରେ ଶିଖିବା ନାହିଁ, ତେବେ ଆମେ ବ୍ରିଟିଶମାନେ ଆମକୁ ଯାହା ଶିଖାଇଥିଲେ ସେଥିରେ ସୀମିତ ରହିବୁ। ଆମେ ଏବେ ବି ନିଜକୁ ଯେପରି ଦେଖୁଛୁ ସେହିପରି ଦେଖୁଛୁ। ତେଣୁ, ମୁଁ ପ୍ରଧାନଶିକ୍ଷକ ଏବଂ ଆପଣମାନଙ୍କୁ ସମସ୍ତଙ୍କୁ ପାଠ୍ୟପୁସ୍ତକରୁ ଚିନ୍ତା କରିବାକୁ ଏବଂ ଆମର ଜାତି, ଆମର ପରମ୍ପରା, ଆମର ଜ୍ଞାନ ଉପରେ ନଜର ପକାଇବାକୁ ଅନୁରୋଧ କରିବାକୁ ଚାହୁଁଛି । ଯଦି ତୁମେ ଏହାକୁ ସେହି ଦିଗରୁ ଦେଖ, ତେବେ ତୁମେ ବହୁତ କିଛି ଦେଖିପାରିବ ବୋଲି ପିଲାଙ୍କୁ କହିଥିଲେ ସାଂସଦ । କିନ୍ତୁ ସାଂସଦ ଏହା ଭୁଲି ଯାଇଥିଲେ ଯେ, ତାଙ୍କର ହନୁମାନ ତତ୍ତ୍ୱକୁ ଆଗକୁ ବଢାଇବା ସହିତ ଛାତ୍ରମାନଙ୍କୁ ଏହା ବି ସଂଶୋଧିତ କରିବାର ଥିଲା ଯେ, ୟୁରି ଗାଗାରିନ୍, ନୀଲଙ୍କ ଚନ୍ଦ୍ରରେ ପାଦ ରଖିବାର ୮ ବର୍ଷ ପୂର୍ବରୁ ମହାକାଶ ଯାତ୍ରା କରିସାରିଥିଲେ।