ବିଧାୟକ ପ୍ରଶାନ୍ତଙ୍କ ଗାଡ଼ି ନମ୍ବର ବଦଳାଗଲା ନା ପୂର୍ବରୁ ବଦଳାଯାଇଥିଲା

ଭୁବନେଶ୍ୱର: ଗିରଫ ହୋଇ ବାଣପୁର ଜେଲରେ ଥିବା ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ବିରୋଧରେ ଆଉ ଏକ ମାମଲା ରୁଜୁ ହେବ ବୋଲି ସୂଚନା ରହିଛି । ଯେଉଁ ଗାଡି ବ୍ୟବହାର କରୁଥିଲେ ବିଧାୟକ ସେଥିରେ ଲାଗିଥିବା ଗାଡି ନମ୍ବର ଆଉ ଗୋଟିଏ ଗାଡିର । ସେହି ଗାଡିଟି ହ୍ୟୁଣ୍ଡାଇ କ୍ରେଟାର ଏବଂ ଗାଡିଟି ଶିବାନି ଫୁଡ ନାମରେ ପଞ୍ଜିକୃତ ହୋଇଛି।

ଉଲ୍ଲେଖଯୋଗ୍ୟ, ବିଧାୟକ ଗତ ୧୨ ତାରିଖ ଦିନ ଯେଉଁ ଲ୍ୟାଣ୍ଡ ରୋଭର ଡସକଭରୀ ଗାଡି (OD 25 K 5775) ଲୋକଙ୍କ ଉପରକୁ ମଡାଇ ଦେଇଥିଲେ । ଏହା କୁମାର ଦେବଦତ୍ତଙ୍କ ନାମରେ ରହିଛି । ଏମ୍ ଭିଆଇ ଆପରୁ ଏହି ସୂଚନା ମିଳିଛି । କିନ୍ତୁ ପୁଲିସ ଏବେ ଯେଉଁ ପ୍ରାଥମିକ ତଦନ୍ତ ରିପୋର୍ଟ ଦାଖଲ କରିଛି ସେଥିରେ ବିଧାୟକଙ୍କ ଗାଡି ନମ୍ବର OD02 AY 5775 ବୋଲି ଉଲ୍ଲେଖ କରିଛି । ଯାହାକି ଅସମାହିତ ପ୍ରଶ୍ନ ତିଆରି କରିଛି । ନିଲମ୍ବିତ ବିଜେଡି ବିଧାୟକଙ୍କ ବିରୋଧରେ କେସ ଦୁର୍ବଳ କରିବାକୁ ପୁଲିସ ଏପରି କରିଛି ନା ବିଧାୟକଙ୍କ ଗାଡିର ନମ୍ବର ଜାଲ୍ ତାହା ଏବେ ପ୍ରଶ୍ନ ଉଠିଛି । ଆଉ ପୁଲିସର ତଦନ୍ତ ପ୍ରକ୍ରିୟା ଉପରେ ସିଧା ପ୍ରଶ୍ନ ଉଠିଛି ।

ପୁଲିସ କେସ ଡାଏରୀ ଦାଖଲ କରିବା ପରେ ଏସପି ଅଖିଳେଶ ପହି କହିଛନ୍ତି, ଯେଉଁ ଗାଡି ମାଡିଯାଇଥିଲା ତାର ନମ୍ବର OD02 AY 5775 । ଯାହାକି ବିବାଦକୁ ବଢାଇଛି। ଦୁଇଟି ନମ୍ବର ଭିତରେ ଫରକ ହେଉଛି K ଏବଂ AY । ବାକି ସବୁ ସମାନ ରହିଛି।

ଏବେ ପୁଲିସ କହୁଥିବା ନମ୍ବରଟି ହ୍ୟୁଣ୍ଡାଇ କ୍ରେଟା କାରର । ଏବଂ ଏହି ନମ୍ବର ଓ କାର ଶିବାନି ଫୁଡ ନାମରେ ପଞ୍ଜିକୃତ ହୋଇଛି ବୋଲି ଏମଭିଆଇ ଆପରୁ ଜଣାପଡିଛି।

ବିଧାୟକ ପ୍ରଶାନ୍ତ ଜଗଦ୍ଦେବ ଦଳକୁ ନିଲମ୍ବିତ ହେବା ପରେ ମଧ୍ୟ ଶାସକ ଦଳର ଅନେକ କାର୍ଯ୍ୟକ୍ରମରେ ଉପସ୍ଥିତ ରହୁଥିଲେ। ପୂର୍ବରୁ ଏକ ମାମଲାରେ ହାଇକୋର୍ଟ ଦ୍ୱାରା ଜେଲ ଦଣ୍ଡାଦେଶ ପାଇଥିଲେ ମଧ୍ୟ ସ୍ୱାସ୍ଥ୍ୟଗତ ସମସ୍ୟା ଦେଖାଇ ହସ୍ପିଟାଲରେ ରହି ଜାମିନ ପାଇଯାଇଥିଲେ। ଏବେ ଯଦିଓ ଶାସକ ଦଳ ବିଧାୟକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛି । କିନ୍ତୁ ଏବେ ଗାଡି ନମ୍ବର ବଦଳାଯିବା ଘଟଣା ମାମଲାକୁ ଦୁର୍ବଳ କରିବାକୁ ପ୍ରୟାସ ବୋଲି ଚର୍ଚ୍ଚା ହେଉଛି।