କଟକ: କଟକ ସହରରେ ମଦ ଦୋକାନ ଖୋଲିବା ପ୍ରସଙ୍ଗରେ ଏକ ପିଟିସନକୁ ଭିତ୍ତିକରି ରାଜ୍ୟ ସରକାରଙ୍କୁ ଓଡ଼ିଶା ହାଇକୋର୍ଟ ନୋଟିସ୍ ପ୍ରଦାନ କରିଛନ୍ତି ।
କଟକ ସହରର ପ୍ରକାଶ କୁମାର ରାଉତରାଏ ଏବଂ ଅନ୍ୟ ଦୁଇଜଣ ସ୍ଥାନୀୟ ବାସିନ୍ଦାଙ୍କ ଜନସ୍ୱାର୍ଥ ମାମଲାର ଶୁଣାଣି କରିଛନ୍ତି ଅଦାଲତ । ମଙ୍ଗଳବାର ଦିନ ଏକ ଭିଡ଼ିଓ କନଫରେନ୍ସିଂ ମାଧ୍ୟମରେ କଟକ ମ୍ୟୁନିସିପାଲ କର୍ପୋରେସନ ଅଞ୍ଚଳରେ ଅନଲାଇନ୍ ଓ ଅଫଲାଇନ ଯୋଗେ ମଦ ଦୋକାନ ଖୋଲାଯିବା ନେଇ ମାମଲା ଦାଏର କରାଯାଇଥିଲା ।
ଅଧିକ ପଢନ୍ତୁ: ମଦ ଲାଗି ଛକାପଞ୍ଝା: ପ୍ରଥମ ଦିନ କର୍ଣ୍ଣାଟକରେ ୪୫ କୋଟି ଟଙ୍କାର ମଦବିକ୍ରି !
ମୁଖ୍ୟ ବିଚାରପତି ଜଷ୍ଟିସ୍ ମହମ୍ମଦ ରଫିକ୍ ଏବଂ ଜଷ୍ଟିସ୍ ଏସକେ ମିଶ୍ରଙ୍କ ତତ୍ୱାବଧାନରେ ଅଦାଲତଙ୍କ ଏକ ଡିଭିଜନ ବେଞ୍ଚ୍ ଏହି ମାମଲାର ଶୁଣାଣି ଆସନ୍ତା ଗୁରୁବାର ଦିନ ହେବ ବୋଲି ଧାର୍ଯ୍ୟ ହୋଇଛି ।
ଏବେ ରାଜ୍ୟରେ ଲକଡ଼ାଉନ୍ କଟକଣା ଜାରି ରହିଥିବା ବେଳେ କେନ୍ଦ୍ର ସରକାର ମଦ ଦୋକାନ ଖୋଲିବା ନେଇ ବିଜ୍ଞପ୍ତି ଜାରି କରିଥିବା ବେଳେ ରାଜ୍ୟ ସରକାର ମଦ ଦୋକାନ ଖୋଲିବା ନେଇ ବିଜ୍ଞପ୍ତି ପ୍ରକାଶ କରିବେ ।
ଏଠାରେ ସୂଚନାଯୋଗ୍ୟ, ସିଏମସି ମେ ୩ ତାରିଖରେ ସାମାଜିକ ଦୂରତା ରକ୍ଷା କରି ସେଲୁନ, ସ୍ପା, ଲାଇସେନ୍ସ ପ୍ରାପ୍ତ ମଦଦୋକାନ ଖୋଲିବା ନେଇ ଅନୁମତି ପ୍ରଦାନ କରିଥିଲେ । ସକାଳ ୭ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଏହି ଦୋକାନ ଗୁଡ଼ିକ ଖୋଲା ରଖିବାକୁ ସିଏମସି ଅନୁମତି ପ୍ରଦାନ କରିଥିଲେ ।