ନୂଆଦିଲ୍ଲୀ: ଭାରତୀୟ ନ୍ୟାୟ ସଂହିତା (ବିଏନଏସ)ର ହିଟ୍ ଆଣ୍ଡ ରନ୍ ବ୍ୟବସ୍ଥାକୁ ନେଇ ଟ୍ରକ୍, ବସ୍ ଓ ଟ୍ୟାକ୍ସି ଚାଳକଙ୍କ ଚିନ୍ତାଦୂର କରିବା ପାଇଁ ସଡ଼କ ପରିବହନ ମନ୍ତ୍ରଣାଳୟ ଏକ ପ୍ରସ୍ତାବ ଦେଇଛି। ଯାହା ଡ୍ରାଇଭରଙ୍କୁ ବଡ଼ ଆଶ୍ୱସ୍ତି ଦେବ ବୋଲି ମନ୍ତ୍ରଣାଳୟ ହୃଦବୋଧ କରୁଛି।
ଡ୍ରାଇଭର କରୁଛନ୍ତି ନ୍ୟାୟ ବ୍ୟବସ୍ଥା ଅନୁଯାୟୀ ଯଦି ସେମାନେ ଦୁର୍ଘଟଣା ପରେ ସେଠାରେ ଉପସ୍ଥିତ ରହି ପୋଲିସକୁ ଘଟଣା ବାବଦରେ ପ୍ରସ୍ତାବ ଦେବେ ତାହେଲେ ଦଣ୍ଡବିଧାନ କୋହଳ ହେବ। କିନ୍ତୁ ଡ୍ରାଇଭର କହୁଛନ୍ତି ଦୁର୍ଘଟଣା ପରେ ରହିଲେ ଭିଡ ହିଂସାର ଶିକାର ହେବାର ସମ୍ଭାବନା ରହିଛି। ଏପରି ସ୍ଥିତିରେ ଡ୍ରାଇଭରଙ୍କ ଦ୍ୱାରା ଦୁର୍ଘଟଣାର ଅନଲାଇନ୍ ରିପୋର୍ଟିଂ ପାଇଁ ଏକ ପ୍ରସ୍ତାବ ଦିଆଯାଇଛି ମନ୍ତ୍ରଣାଳୟ ଦ୍ବାରା।
ଏହି ପ୍ରସ୍ତାବର ଉଦ୍ଦେଶ୍ୟ ହେଉଛି “ହିଟ୍ ଆଣ୍ଡ୍ ରନ୍” ବ୍ୟବସ୍ଥାର ପ୍ରୟୋଗକୁ ଏଡ଼ାଇବା ଏବଂ ଡ୍ରାଇଭରମାନଙ୍କୁ ସମ୍ଭାବ୍ୟ ଭିଡ଼ ହିଂସାରୁ ରକ୍ଷା କରିବା।
କେନ୍ଦ୍ର ସଡ଼କ ପରିବହନ ସଚିବ ଅନୁରାଗ ଜୈନଙ୍କ କହିବାନୁଯାୟୀ ଦୁର୍ଘଟଣାସ୍ଥଳରୁ ଫେରାର ହେଉଥିବା ଚାଳକ ଓ ପୁଲିସକୁ ସୂଚନା ନଦେବା ପାଇଁ ବିଏନ୍ଏସ୍ ଅଧୀନରେ ୭ ବର୍ଷ ପର୍ଯ୍ୟନ୍ତ ଜେଲ୍ ଓ ଜରିମାନା ହୋଇପାରେ। ତେବେ ଭିଡ଼ ଆକ୍ରମଣ ଓ ଗାଡିରେ ନିଆଁ ଲାଗିବାର ଆଶଙ୍କା ଥିବାରୁ ଟ୍ରକ ଚାଳକ ଓ ପରିବହନକାରୀମାନେ ଚିନ୍ତା ପ୍ରକଟ କରିଛନ୍ତି। ତେଣୁ ସେମାନେ ଏହାର ପ୍ରତିବାଦ କରୁଛନ୍ତି।
ଅନୁରାଗ ଜୈନ ଆହୁରି କହିଛନ୍ତି ଯେ କୌଣସି ଚାଳକ ଦୁର୍ଘଟଣା ଘଟାଇ ଘଟଣାସ୍ଥଳରୁ ଖସି ପଳାଇଯିବା ଏକ ଗମ୍ଭୀର ସମସ୍ୟା। ଟ୍ରକ୍ ଚାଳକଙ୍କ କିଛି ଚିନ୍ତା ମଧ୍ୟ ବାସ୍ତବତା ରହିଛି। ଯେମିତି ଯଦି ସେମାନେ ସେଠାରେ ଅଟକିଯାଆନ୍ତି ତେବେ ସେମାନଙ୍କ ଗାଡିରେ ନିଆଁ ଲାଗିଯାଇପାରେ ଏବଂ ସେମାନଙ୍କୁ ଭିଡ ହିଂସାର ସମ୍ମୁଖୀନ ହେବାକୁ ପଡିପାରେ । ତେଣୁ ଏହାର କିଛି ସମାଧାନ ଖୋଜିବା ପାଇଁ ଆମେ ଟେକ୍ନୋଲୋଜିକୁ ବ୍ୟବହାର କରିପାରିବା । ଆମେ ଏହା ଉପରେ କାମ କରୁଛୁ। ଆମେ ପରାମର୍ଶ ଦେଇଥିବା ଏକ ସମାଧାନ ହେଉଛି ଚାଳକମାନେ ସେମାନଙ୍କ ଅନଲାଇନ୍ ପ୍ଲାଟଫର୍ମରେ ଦୁର୍ଘଟଣା ବିଷୟରେ ରିପୋର୍ଟ କରିପାରିବେ ଏବଂ ଏହାକୁ ହିଟ୍ ଆଣ୍ଡ ରନ୍ ମାମଲା ଭାବରେ ବିବେଚନା କରାଯିବ ନାହିଁ ।
ଡ୍ରାଇଭର ଘଟଣାସ୍ଥଳଠାରୁ ୨୫ରୁ ୫୦ କିଲୋମିଟର ଦୂରରେ ଥିବା ଏକ ଥାନାରେ ଘଟଣା ସମ୍ପର୍କରେ ସୂଚନା ଦେଇପାରିବେ।
ଯେହେତୁ ଥାନାରେ ମାମଲା ରିପୋର୍ଟ କରିବା ପୂର୍ବରୁ ଡ୍ରାଇଭରମାନଙ୍କୁ ହିଟ୍ ଆଣ୍ଡ୍ ରନ୍ ପାଇଁ ଅଟକ ରଖାଯାଇପାରିବ ବୋଲି ଆଶଙ୍କା ରହିଛି, ତେଣୁ ହେଲ୍ପଲାଇନ୍ ନମ୍ବରରେ କଲ୍ କରିବାର ବ୍ୟବସ୍ଥା କରାଯାଇପାରେ ବୋଲି ଜୈନ କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ଏହି ପ୍ରସଙ୍ଗରେ ଚୂଡ଼ାନ୍ତ ନିଷ୍ପତ୍ତି ଗୃହ ମନ୍ତ୍ରଣାଳୟ ନେବ।
ଅଧିକାରୀମାନେ କହିଛନ୍ତି ଯେ ହିଟ୍ ଆଣ୍ଡ୍ ରନ୍ ମାମଲାର ବିଚାର କରୁଥିବା ବିଏନ୍ଏସର ଧାରା ୧୦୬(୨)ରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ ଦୁର୍ଘଟଣାସ୍ଥଳରୁ ପୁଲିସକୁ ସୂଚନା ଦେବାକୁ ପଡ଼ିବ ନାହିଁ ଏବଂ ତେଣୁ ଡ୍ରାଇଭରମାନେ ହେଲ୍ପଲାଇନ୍ ନମ୍ବରକୁ ଫୋନ୍ କରି କିମ୍ବା ନିଜ ସୁବିଧା ଅନୁଯାୟୀ ଥାନାକୁ ସୂଚନା ଦେଇପାରିବେ।
ପୀଡ଼ିତମାନେ ଯେପରି ଶୀଘ୍ର ଚିକିତ୍ସା ସେବା ପାଇପାରିବେ ତାହା ସୁନିଶ୍ଚିତ କରିବା ଏହାର ମୁଖ୍ୟ ଉଦ୍ଦେଶ୍ୟ ବୋଲି ସରକାରଙ୍କ ତରଫରୁ କୁହାଯାଇଛି।