ନୂଆଦିଲ୍ଲୀ: ମଣିପୁର ରାଜ୍ୟରେ ସୁରକ୍ଷା ଏବଂ ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି କେନ୍ଦ୍ର ସରକାର ସଶସ୍ତ୍ର ବାହିନୀର ସ୍ୱତନ୍ତ୍ର ଶକ୍ତି ଆଇନ (AFSPA)କୁ ଛଅ ମାସ ପାଇଁ ବଢେଇ ଦିଆଯାଇଛି । ଗୃହ ମନ୍ତ୍ରଣାଳୟର ସୂଚନା ଅନୁଯାୟୀ, ଏପ୍ରିଲ ୧,୨୦୨୫ରୁ ମଣିପୁର ରାଜ୍ୟକୁ ପୁଣିଥରେ ଛଅ ମାସ ପାଇଁ ଅଶାନ୍ତ ଅଞ୍ଚଳ ଭାବେ ଘୋଷଣା କରାଯାଇଛି । ତେବେ ପାଞ୍ଚଟି ଜିଲ୍ଲାର ୧୩ଟି ପୋଲିସ୍ ଷ୍ଟେସନ ଅଧୀନରେ ଥିବା ଅଞ୍ଚଳଗୁଡିକ ଏହି AFSPAରୁ ଦୂରେଇ ରହିଛନ୍ତି ।
ଗୃହ ମନ୍ତ୍ରଣାଳୟ ପକ୍ଷରୁ ଜାରି ବିଜ୍ଞପ୍ତିରେ ମଣିପୁରର କେତେକ ଅଞ୍ଚଳରେ ଅଶାନ୍ତି ଓ ହିଂସା ପରିସ୍ଥିତିକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି ବୋଲି କୁହାଯାଇଛି। AFSPA ଅଧୀନରେ ସଶସ୍ତ୍ର ବାହିନୀ କୌଣସି ସନ୍ଦିଗ୍ଧ ବ୍ୟକ୍ତିଙ୍କୁ ଗିରଫ କରିବା,ଯାଞ୍ଚ କରିବା ଏବଂ ଆବଶ୍ୟକ ସ୍ଥଳେ ଗୁଳି ଚଳାଇବାର ଅଧିକାର ରହିଛି। ଏହି ରାଜ୍ୟରେ ଆଇନ ଶୃଙ୍ଖଳା ବ୍ୟବସ୍ଥାକୁ ବଜାୟ ରଖିବା ତଥା ରାଜ୍ୟରେ ଶାନ୍ତି ସୁନିଶ୍ଚିତ କରିବା ପାଇଁ ଏହି ସଶସ୍ତ୍ର ବାହିନୀର ସ୍ୱତନ୍ତ୍ର ଶକ୍ତି ଆଇନ ଗୁରୁତ୍ୱପୂର୍ଣ୍ଣ ବିବେଚନା କରାଯାଏ, ବିଶେଷତଃ ସେହି ସମୟରେ ଯେତେବେଳେ ରାଜ୍ୟରେ ବିଭିନ୍ନ ଉଗ୍ରବାଦୀ ଦଳ ତଥା ବିଚ୍ଛିନ୍ନତାବାଦୀ ପ୍ରବୃତ୍ତି ଦେଖିବାକୁ ମିଳେ ।
ମଣିପୁର ବ୍ୟତୀତ କେନ୍ଦ୍ର ସରକାର ନାଗାଲାଣ୍ଡ ଏବଂ ଅରୁଣାଚଳ ପ୍ରଦେଶର କିଛି ଅଞ୍ଚଳରେ AFSPA ର ଅବଧି ଛଅ ମାସକୁ ବୃଦ୍ଧି କରିଛନ୍ତି । ଏହି ଦୁଇ ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି। ନାଗାଲାଣ୍ଡର ଦୀମାପୁର,ନିଉଲ୍ୟାଣ୍ଡ ଏବଂ ମୋନ୍ ଭଳି ଜିଲ୍ଲାରେ AFSPA ବଳବତ୍ତର ରହିବ, ଅରୁଣାଚଳ ପ୍ରଦେଶର କିଛି ସ୍ଥାନରେ ମଧ୍ୟ ଏହି ନିୟମ ଲାଗୁ ରହିବ ।
Comments are closed.