ବୟସକୁ ନେଇ କଟାକ୍ଷରେ ରାଗିଗଲେ ଦିଦି, କହିଲେ, ‘ତୁମମାନଙ୍କର ଅନ୍ତ ନ ଦେଖିବା ପର୍ଯ୍ୟନ୍ତ ମୁଁ ବଞ୍ଚି ରହିବି’

କୋଲକାତା: ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ (TMC) ସୁପ୍ରିମୋ ମମତା ବାନାର୍ଜୀ ପୁଣିଥରେ ବିଜେପି ଉପରେ ତୀବ୍ର ଆକ୍ରମଣ କରିଛନ୍ତି। ବୟସକୁ ନେଇ ତାଙ୍କୁ କଟାକ୍ଷ କରାଯାଉଥିବା ପ୍ରସଙ୍ଗରେ କଡ଼ା ପ୍ରତିକ୍ରିୟା ଦେଇ ସେ କହିଛନ୍ତି, “ନିର୍ବାଚନ ଫଳାଫଳ ଦିନ ବିଜେପିର ଗୁଣ୍ଡାମାନେ ଚାହୁଁଥିଲେ ଯେ ମୋତେ ହାର୍ଟ ଆଟାକ୍ ଆସିଯାଉ ଏବଂ ମୋର ମୃତ୍ୟୁ ହେଉ। କିନ୍ତୁ ମୁଁ ତୁମମାନଙ୍କର ଅନ୍ତ ନ ଦେଖିବା ପର୍ଯ୍ୟନ୍ତ ବଞ୍ଚି ରହିବି।”

ମମତା କହିଛନ୍ତି, କାହାର ବୟସକୁ ନେଇ ତାଙ୍କୁ ଅପମାନିତ କରିବା ଉଚିତ ନୁହେଁ। ସେ ସାଧାରଣ ଲୋକ ଓ ଶ୍ରମିକଙ୍କ ଅଧିକାର ପାଇଁ ଲଢ଼େଇ ଜାରି ରଖିବେ ବୋଲି କହିଛନ୍ତି। ଦଳର ଅନେକ କର୍ମୀ ଏବେ ମଧ୍ୟ ତାଙ୍କ ସହ ରହିଥିବା ସହ ନୂଆ ଲୋକମାନେ ମଧ୍ୟ ଦଳରେ ଯୋଗ ଦେଉଥିବା ଦାବି କରିଛନ୍ତି।

୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନ TMC ପାଇଁ ବଡ଼ ଝଟକା ହୋଇଥିଲା। ୧୫ ବର୍ଷ ଧରି କ୍ଷମତାରେ ଥିବା ଦଳ ମାତ୍ର ୮୦ଟି ଆସନରେ ସୀମିତ ରହିଥିବାବେଳେ ବିଜେପି ୨୦୮ଟି ଆସନ ଜିତି ପ୍ରଥମଥର ପାଇଁ ରାଜ୍ୟରେ ସରକାର ଗଠନ କରିଥିଲା। ମମତା ବାନାର୍ଜୀ ମଧ୍ୟ ନିଜର ପାରମ୍ପରିକ ଭବାନୀପୁର ଆସନରୁ ବିଜେପିର ଶୁଭେନ୍ଦୁ ଅଧିକାରୀଙ୍କଠାରୁ ୧୫ ହଜାରରୁ ଅଧିକ ଭୋଟରେ ପରାଜିତ ହୋଇଥିଲେ।

ନିର୍ବାଚନ ପରେ TMC ଭିତରେ ବଡ଼ ଧରଣର ବିଦ୍ରୋହ ଦେଖିବାକୁ ମିଳିଥିଲା। ୮୦ ଜଣ ବିଧାୟକଙ୍କ ମଧ୍ୟରୁ ୬୪ ଜଣ ବିଧାୟକ ବିଦ୍ରୋହୀ ଗୋଷ୍ଠୀରେ ଯୋଗ ଦେଇ ଋତବ୍ରତ ବାନାର୍ଜୀଙ୍କୁ ନେତା ଭାବେ ବାଛିଥିଲେ। ପରେ ଲୋକସଭାରେ ମଧ୍ୟ ଦଳର ଅନେକ ସାଂସଦ ଅଲଗା ଗୋଷ୍ଠୀ ଗଠନ କରି NDAକୁ ସମର୍ଥନ ଦେଇଥିଲେ।

ବର୍ତ୍ତମାନ TMC ଭିତରେ ଦଳୀୟ ନେତୃତ୍ୱ, ହ୍ୱିପ୍ ଓ ‘ପ୍ରକୃତ TMC’ର ଅଧିକାରକୁ ନେଇ ବିବାଦ ଜାରି ରହିଛି। ଏହି ପ୍ରସଙ୍ଗ ସୁପ୍ରିମକୋର୍ଟ ଏବଂ ବିଧାନସଭା ବାଚସ୍ପତିଙ୍କ ସମ୍ମୁଖରେ ବିଚାରାଧୀନ ଥିବାବେଳେ, ଦଳର ଭବିଷ୍ୟତକୁ ନେଇ ରାଜ୍ୟ ରାଜନୀତିରେ ଚର୍ଚ୍ଚା ଜୋର ଧରିଛି।