ହିସାର: ‘କଂଗ୍ରେସ ଯଦି ମୁସଲମାନଙ୍କ ପ୍ରତି ଏତେ ଦରଦ ଦେଖାଉଛି, ତାହେଲେ କଂଗ୍ରେସର ଅଧ୍ୟକ୍ଷ ଜଣେ ମୁସଲମାନଙ୍କୁ କରାନ୍ତୁ । ସଂସଦରେ ୫୦ ପ୍ରତିଶତ ଟିକେଟ ମୁସଲମାନଙ୍କୁ ଦିଅନ୍ତୁ, ତା ପରେ କହିବେ ।’ ଆଜି କିଛି ଏପରି ଓ୍ବାକଫ୍ ବିଲକୁ ନେଇ କଂଗ୍ରେସ ଉପରେ ଜୋରଦାର ବର୍ଷିଛନ୍ତି ପ୍ରଧାନମନ୍ତ୍ରୀ ମୋଦି ।
ଆଜି ହରିୟାଣାର ହିସାରରେ ବିମାନମନ୍ଦର ଉଦଘାଟନ କରିବା ସମୟରେ ପ୍ରଧାନମନ୍ତ୍ରୀ ମୋଦି ୱାକଫ ସଂଶୋଧନ ଆଇନକୁ ନେଇ କଂଗ୍ରେସ ଉପରେ କଡା ଆକ୍ରମଣ କରିଛନ୍ତି । କହିଛନ୍ତି, ଯଦି କଂଗ୍ରେସ ମୁସଲମାନମାନଙ୍କ ପ୍ରତି ଏତେ ସହାନୁଭୂତି ରଖେ, ତେବେ ସେ ଜଣେ ମୁସଲମାନଙ୍କୁ ତାଙ୍କ ଦଳର ସଭାପତି କାହିଁକି କରୁନାହିଁ? ସଂସଦରେ ୫୦ ପ୍ରତିଶତ ଟିକେଟ୍ ମୁସଲମାନମାନଙ୍କୁ ଦିଅନ୍ତୁ । ଯେତେବେଳେ ସେ ଜିତିବେ, ସେ ତାଙ୍କର କଥା ନିଜେ କହିବେ, ଆଉ ସେମାନଙ୍କୁ ଏହା କରିବାକୁ ପଡ଼ିବ ନାହିଁ ।
ହେଲେ କଂଗ୍ରେସର ଉଦ୍ଦେଶ୍ୟ କେବେବି କାହାର ଭଲ କରିବା ନୁହେଁ ବୋଲି କହିଛନ୍ତି ମୋଦି । ମୁସଲମାନମାନଙ୍କର କୌଣସି ମଙ୍ଗଳ କରିବାର ଉଦ୍ଦେଶ୍ୟ ମଧ୍ୟ ତାଙ୍କର ନାହିଁ । ଏହା ହେଉଛି କଂଗ୍ରେସର ପ୍ରକୃତ ସତ୍ୟ । କଂଗ୍ରେସର ତୁଷ୍ଟୀକରଣ ରାଜନୀତି ମୁସଲିମ ସମ୍ପ୍ରଦାୟର ଲାଭ କରିନାହିଁ ବରଂ ସେମାନଙ୍କୁ କ୍ଷତି ପହଞ୍ଚାଇଛି । କଂଗ୍ରେସ କେବଳ କିଛି ମୌଳବାଦୀଙ୍କୁ ଖୁସି କରିବାକୁ ବାଛିଛି । ସମାଜର ବାକି ଲୋକମାନେ ଦୁଃଖୀ, ଅଶିକ୍ଷିତ ଏବଂ ଗରିବ ରହିଯାଇଛନ୍ତି । କଂଗ୍ରେସର ଏହି ମନ୍ଦ ନୀତିର ସବୁଠାରୁ ବଡ଼ ପ୍ରମାଣ ହେଉଛି ୱାକଫ୍ ଆଇନ ପ୍ରତି ତାଙ୍କର ଅସମ୍ମାନ ।
ଏଥିସହିତ କଂଗ୍ରେସ ବାବା ସାହେବଙ୍କୁ ଅପମାନିତ କରିଥିଲା ବୋଲି ଅଭିଯୋଗ କରିଛନ୍ତି ମୋଦି । ବାବା ସାହେବ ଆମ୍ବେଦକର ଯେଉଁ ସ୍ୱପ୍ନ ଦେଖିଥିଲେ ଏବଂ ସାମାଜିକ ନ୍ୟାୟ ପାଇଁ ସମ୍ବିଧାନରେ ଯେଉଁ ବ୍ୟବସ୍ଥା କରିଥିଲେ, ତାହାକୁ ବି କଂଗ୍ରେସ ହତ୍ୟା କରି ତୁଷ୍ଟିକରଣର ରାଜନୀତିର ଏକ ମାଧ୍ୟମ ବନେଇଦେଇଥିଲା । କଂଗ୍ରେସ ଆମର ପବିତ୍ର ସମ୍ବିଧାନକୁ କ୍ଷମତା ହାସଲ ପାଇଁ ଏକ ଅସ୍ତ୍ରରେ ପରିଣତ କରିଛି । ଯେତେବେଳେ କଂଗ୍ରେସ କ୍ଷମତା ସଙ୍କଟର ସମ୍ମୁଖୀନ ହୋଇଥିଲା, ସେମାନେ ସମ୍ବିଧାନକୁ ଚୂର୍ଣ୍ଣ କରିଥିଲେ। ଜରୁରୀକାଳୀନ ପରିସ୍ଥିତି ସମୟରେ କଂଗ୍ରେସ କୌଣସି ପ୍ରକାରେ କ୍ଷମତା ବଜାୟ ରଖିବା ପାଇଁ ସମ୍ବିଧାନର ଆତ୍ମାକୁ ଦଳିଚକଟି ଦେଇଥିଲା । କଂଗ୍ରେସ ବାବା ସାହେବଙ୍କୁ ଅପମାନିତ କରିଛି. ତାଙ୍କ ଚିନ୍ତାଧାରାର ଅନ୍ତ ଘଟାଇବାକୁ ଚାହୁଁଛି ବୋଲି କହି କଡା ସମାଲୋଚନା କରିଛନ୍ତି ମୋଦି ।
ଅନ୍ୟପକ୍ଷରେ ମୋଦିଙ୍କ ବୟାନରରେ କଡା ପ୍ରତିକ୍ରିୟା ରଖିଛନ୍ତି, କଂଗ୍ରେସ ସଭାପତି ମଲ୍ଲିକାର୍ଜୁନ୍ ଖଡଗେ । ଆମ୍ବେଦକରଙ୍କ ଜୟନ୍ତୀରେ କଂଗ୍ରେସ ବିରୋଧରେ ପ୍ରଧାନମନ୍ତ୍ରୀ ମୋଦିଙ୍କ ସମାଲୋଚନା ଉପରେ ପ୍ରତିକ୍ରିୟା ଦେଇ କଂଗ୍ରେସ ମୁଖ୍ୟ ଖଡଗେ କହିଛନ୍ତି, ବିଜେପି, କଂଗ୍ରେସ ଏବଂ ନେହେରୁଙ୍କୁ ଦୋଷ ଦେବା ବନ୍ଦ କରିବା ଉଚିତ ଏବଂ ବାବା ସାହେବଙ୍କ ନୀତିକୁ ବଜାୟ ରଖିବା ପାଇଁ ସେମାନେ କ’ଣ କରିଛନ୍ତି ତାହାର ହିସାବ ଦେବା ଉଚିତ । ବିଜେପି କେବଳ କଂଗ୍ରେସ, ନେହେରୁ ଏବଂ ଆମେ ଏପର୍ଯ୍ୟନ୍ତ ଯାହା କରିଛୁ ତାହା ବିରୁଦ୍ଧରେ କୁହନ୍ତି । କିନ୍ତୁ, ମୁଁ ପଚାରୁଛି, ସେମାନେ ଏପର୍ଯ୍ୟନ୍ତ କ’ଣ କରିଛନ୍ତି ଏବଂ ବାବା ସାହେବଙ୍କ କେଉଁ ନୀତିକୁ ଆପଣାଇଛନ୍ତି? ବୋଲି ପ୍ରଶ୍ନ କରିଛନ୍ତି ଖଡଗେ ।
Comments are closed.