ରାଜ୍ୟଗୋଷ୍ଠୀ କ୍ରୀଡା: ପୁରୁଷ ହକି ସେମିରେ ଭାରତ, ବକ୍ସିଂରେ ୩ ପଦକ ନିଶ୍ଚିତ

ବର୍ମିଂହାମ: ଚଳିତ ରାଜ୍ୟଗୋଷ୍ଠୀ କ୍ରୀଡାର ପୁରୁଷ ହକି ସେମିଫାଇନାଲରେ ଭାରତ ପ୍ରବେଶ କରି ପଦକ ଆଶା ଉଜ୍ଜୀବିତ କରିଛି । ଗୁରୁବାର ଅନୁଷ୍ଠିତ ମୁକାବିଲାରେ ଭାରତ ୪-୧ ଗୋଲରେ ୱେଲ୍ସକୁ ପରାସ୍ତ କରିଥିଲା । ଏଥିସହ ଭାରତର ପଂଏଟ ୧୦ ହୋଇଛି । ଜବରଦସ୍ତ ଫର୍ମରେ ଥିବା ହରମନପ୍ରୀତ ସିଂ ହ୍ୟାଟ୍ରିକ ଗୋଲ ସ୍କୋର କରିଥିବା ବେଳେ ଗୁରୁଜନ୍ତ ସିଂ ୪ର୍ଥ ଗୋଲଟି ଦେଇଥିଲେ । ହରମନପ୍ରୀତ ଏହି ଟୁର୍ଣ୍ଣାମେଂଟରେ ଏ ପର୍ଯ୍ୟନ୍ତ ୯ଟି ଗୋଲ ସ୍କୋର କରି ସାରିଛନ୍ତି । ୱେଲ୍ସ ପକ୍ଷରୁ ଏକମାତ୍ର ଗୋଲଟି ଗାରେଥ ଫର୍ଲଙ୍ଗ ସ୍କୋର କରିଥିଲେ ।
ବକ୍ସିଂ: ବକ୍ସିଂରେ ଭାରତୀୟ ପ୍ରତିଯୋଗୀମାନେ ୩ଟି ପଦକ ନିଶ୍ଚିତ କରିଛନ୍ତି । ୬୦ କେଜି ବିଭାଗରେ ଜୈସ୍ମିନ ନ୍ୟୁଜିଲାଣ୍ଡର ଟୋରୀ ଗ୍ରାଂଟନଙ୍କୁ ହରାଇ ସେମିଫାଇନାଲରେ ପ୍ରବେଶ କରିଛନ୍ତି । ସେହିପରି ଅମିତ ଫଙ୍ଗଲ ଓ ସାଗର ଅହଲାୱତ ମଧ୍ୟ ନିଜ ନିଜ କାଟାଗୋରୀର ସେମିକୁ ଉନ୍ନୀତ ହୋଇଛନ୍ତି । ଫଳରେ ଏହି ୩ ବକ୍ସର ଅତି କମରେ ବ୍ରୋଞ୍ଜ ପଦକ ହାସଲ କରିବେ ।