ଉପରାଷ୍ଟ୍ରପତି ନିର୍ବାଚନ: କିଏ ହେବେ ବିରୋଧୀ ଦଳର ଚେହେରା?, ଚର୍ଚ୍ଚାରେ ଏହି ୩ ନାଁ….

ନୂଆଦିଲ୍ଲୀ: ଆସନ୍ତା ମାସ ସେପ୍ଟେମ୍ବର ୯ ରେ ଉପରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏହା ପୂର୍ବରୁ ରାଜନୈତିକ ମହଲରେ ବିଭିନ୍ନ ଗତିବିଧି ଦେଖିବାକୁ ମିଳୁଛି । ଶାସକ ଦଳ ଏନଡିଏ ଉପରାଷ୍ଟ୍ରପତି ପଦ ପାଇଁ ତାର ପ୍ରାର୍ଥୀ ଘୋଷଣା କରିସାରିଛି । ଏବେ ଖାଲି ଅପେକ୍ଷା ବିରୋଧୀ ମେଣ୍ଟ ଇଣ୍ଡିଆ ମେଣ୍ଟ କାହାକୁ ବନେଇବ ଉପରାଷ୍ଟ୍ରପତି ପ୍ରାର୍ଥୀ ? ଇଣ୍ଡି ମେଣ୍ଟ କହିଛି ଯେ ଏହା ଉପରାଷ୍ଟ୍ରପତି ପଦ ପାଇଁ ନିର୍ବାଚନ ପାଇଁ ପ୍ରାର୍ଥୀ ମଙ୍ଗଳବାର ଅର୍ଥାତ୍ ଆଜି ନଶ ଘୋଷଣା କରିବ । କିନ୍ତୁ ଏପର୍ଯ୍ୟନ୍ତ ନାମ ଚୂଡ଼ାନ୍ତ କରିନାହିଁ । ତଥାପି, ଦେଶର ଏହି ସବୁଠାରୁ ବଡ଼ ପଦବୀ ପାଇଁ ତିନି ଜଣ ବଡ଼ ବିରୋଧୀ ବ୍ୟକ୍ତିଙ୍କ ନାଁରେ ଚର୍ଚ୍ଚାର ଶିରୋନାମାରେ ରହିଛି ।

ଉପରାଷ୍ଟ୍ରପତି ପଦ ପାଇଁ ପ୍ରାର୍ଥୀତ୍ୱ ବିଷୟରେ ଆଲୋଚନା କରିବା ପାଇଁ ଆଜି ଅପରାହ୍ନ ୧୨.୩୦ରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କ ବାସଭବନରେ ବିରୋଧୀ ଦଳଗୁଡ଼ିକର ନେତାମାନଙ୍କର ଏକ ଗୁରୁତ୍ୱପୂର୍ଣ୍ଣ ବୈଠକ ଡକାଯାଇଛି । ଆଶା କରାଯାଉଛି ଯେ ଏହି ବୈଠକ ପରେ, ଉପରାଷ୍ଟ୍ରପତି ପଦ ପାଇଁ ପ୍ରାର୍ଥୀଙ୍କ ନାମ ଆନୁଷ୍ଠାନିକ ଭାବରେ ଘୋଷଣା କରାଯିବ।

ବିରୋଧୀଙ୍କ ପ୍ରାର୍ଥୀ କିଏ ହେବେ? ଆଲୋଚନା ହେଉଥିବା ତିନୋଟି ନାମ ମଧ୍ୟରେ ପ୍ରଥମ ନାମ ହେଉଛି ଚନ୍ଦ୍ରାୟଣ-୧ ପ୍ରକଳ୍ପର ନେତୃତ୍ୱ ନେଇଥିବା ପୂର୍ବତନ ଇସ୍ରୋ ବୈଜ୍ଞାନିକ ମଲ୍ଲସ୍ୱାମୀ ଅନ୍ନଦୁରାଇ । ଦ୍ୱିତୀୟ ନାମ ହେଉଛି ତାମିଲନାଡୁର ଡିଏମକେ ସାଂସଦ ତିରୁଚି ଶିବଙ୍କ ନାମ, ଅନ୍ୟପଟେ ତୁଷାର ଗାନ୍ଧୀଙ୍କ ନାମ ମଧ୍ୟ ଏହି କ୍ରମରେ ରହିଛି । ବିରୋଧୀ ଦଳ ଚାହୁଁଛି ଯେ ଏଥର ଉପରାଷ୍ଟ୍ରପତି ପଦ ପାଇଁ ନିର୍ବାଚନକୁ ‘ଗଣତନ୍ତ୍ର ଏବଂ ସମ୍ବିଧାନର ରକ୍ଷା’ ପାଇଁ ଲଢ଼େଇ ଭାବରେ ଉପସ୍ଥାପନ କରାଯାଉ। ସେଥିପାଇଁ ଏହି ତିନୋଟି ନାମ ଉପରେ ଆଲୋଚନା ହେଉଛି ।

ଅନ୍ୟପଟେ ବିଜେପି ତାର ଗୋଟି ଚଲାଇ ସାରିଛି । ଏନଡିଏ ମହାରାଷ୍ଟ୍ର ରାଜ୍ୟପାଳ ଏବଂ ତାମିଲନାଡୁର ବଡ଼ ମୁହଁ ସିପି ରାଧାକୃଷ୍ଣନଙ୍କୁ ଉପରାଷ୍ଟ୍ରପତି ପଦ ପାଇଁ ପ୍ରାର୍ଥୀ ଭାବରେ ଘୋଷଣା କରିଛି। ବିଜେପି ଏହି ନିର୍ବାଚନ ପାଇଁ ରାଧାକୃଷ୍ଣନଙ୍କ ନାମ ଘୋଷଣା କରି ବିରୋଧୀଙ୍କୁ ଦ୍ୱନ୍ଦ୍ୱରେ ପକାଇଛି, କିନ୍ତୁ ବିରୋଧୀ ମେଣ୍ଟ ‘ଇଣ୍ଡିଆ’ ଏପର୍ଯ୍ୟନ୍ତ ନିଜ ପକ୍ଷରୁ କିଛି କହିନାହିଁ। ତଥାପି, ମେଣ୍ଟର ଅଂଶବିଶେଷ ଥିବା ଏସପି ଏବଂ ଶିବସେନା ଉଦ୍ଧବଙ୍କ ନେତାମାନେ ରାଧାକୃଷ୍ଣନଙ୍କ ନାମ ଆସିବା ପରେ ତାଙ୍କୁ ପ୍ରଶଂସା କରିଛନ୍ତି ।

ଅପରପକ୍ଷେ ଏହା ଏକ ପ୍ରକାର ସ୍ପଷ୍ଟ ଯେ ବିଜେପି ଦ୍ବାରା ଚୟନ କରାଯାଇଥିବା ଉପରାଷ୍ଟ୍ରପତି କୌଣସି ବାଧା ବିନା ଏହି ପଦବୀ ଲାଭ କରିବେ । କାରଣ ସଂଖ୍ୟା ଗରିଷ୍ଠତା ଦେଖିବାକୁ ଗଲେ, ଦୁଇଟି ସଦନର ମିଳିତ ଶକ୍ତି ୭୮୬, ଛଅଟି ଖାଲି ଆସନକୁ ମିଶାଇ (ଲୋକସଭାରେ ଗୋଟିଏ ଏବଂ ରାଜ୍ୟସଭାରେ ପାଞ୍ଚଟି) ରହିଛି । ପୂର୍ଣ୍ଣ ଅଂଶଗ୍ରହଣକୁ ଗ୍ରହଣ କରି ଜଣେ ପ୍ରାର୍ଥୀଙ୍କୁ ଜିତିବା ପାଇଁ ଅତି କମରେ ୩୯୪ ଭୋଟ ଆବଶ୍ୟକ। ଆଉ ଏନଡିଏ ପାଖରେ ୫୪୨ ସଦସ୍ୟ ବିଶିଷ୍ଟ ଲୋକସଭାରେ ୨୯୩ ସାଂସଦ ଏବଂ ୨୪୦ ସଦସ୍ୟ ବିଶିଷ୍ଟ ରାଜ୍ୟସଭାରେ ୧୨୯ ସାଂସଦ ରହିଛି । ଏହା ଶାସକ ମେଣ୍ଟକୁ ଆନୁମାନିକ ମୋଟ ୪୨୨ ଭୋଟ ଦିଏ, ଯାହା ଆବଶ୍ୟକୀୟ ସଂଖ୍ୟାଗରିଷ୍ଠତାଠାରୁ ଆରାମରେ ଅଧିକ ।