Pralay Missile Test: ଚାନ୍ଦିପୁରରେ DRDO ପକ୍ଷରୁ ଦ୍ରୁତ କ୍ରମାଗତ ୨ଟି ପ୍ରଳୟ କ୍ଷେପଣାସ୍ତ୍ରର ସଫଳ ପରୀକ୍ଷଣ
ନୂଆଦିଲ୍ଲୀ: ଦେଶର ପ୍ରତିରକ୍ଷା କ୍ଷମତାକୁ ସୁଦୃଢ଼ କରିବା ପାଇଁ, ପ୍ରତିରକ୍ଷା ଗବେଷଣା ଏବଂ ବିକାଶ ସଂଗଠନ (DRDO) ପ୍ରଳୟ କ୍ଷେପଣାସ୍ତ୍ରର ଏକ ପ୍ରମୁଖ ଏବଂ ସଫଳ ପରୀକ୍ଷଣ କରିଛି। ଓଡ଼ିଶାର ଚାନ୍ଦିପୁରରେ ଗୋଟିଏ ଲଞ୍ଚରରୁ ଦୁଇଟି ପ୍ରଳୟ କ୍ଷେପଣାସ୍ତ୍ର କିଛି ସେକେଣ୍ଡ ମଧ୍ୟରେ ନିକ୍ଷେପ କରାଯାଇଥିଲା।
ସୂଚନାଥାଉକି, କମ୍ ସମୟ ବ୍ୟବଧାନରେ ଗୋଟିଏ ଲଞ୍ଚରରୁ ଦୁଇଟି କ୍ଷେପଣାସ୍ତ୍ରର ସଫଳ ଉତ୍କ୍ଷେପଣ ନିଜସ୍ୱ କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ସଫଳତା।
ପ୍ରତିରକ୍ଷା ମନ୍ତ୍ରଣାଳୟ ଅନୁଯାୟୀ, ବୁଧବାର ସକାଳ ପ୍ରାୟ ୧୦:୩୦ ସମୟରେ ଓଡ଼ିଶା ଉପକୂଳରେ ସମାନ ଲଞ୍ଚରରୁ ଦୁଇଟି ପ୍ରଳୟ କ୍ଷେପଣାସ୍ତ୍ର ଉତକ୍ଷେପଣ କରାଯାଇଥିଲା। ଉଭୟ କ୍ଷେପଣାସ୍ତ୍ର ନିର୍ଦ୍ଧାରିତ ପଥକୁ ସଂପୂର୍ଣ୍ଣ ଭାବରେ ଅନୁସରଣ କରିଥିଲା ଏବଂ ସଫଳତାର ସହିତ ସମସ୍ତ ଉଡ଼ାଣ ଲକ୍ଷ୍ୟ ହାସଲ କରିଥିଲା।
Salvo lunch of two Pralay Missile in quick succession from same launcher were successfully conducted today from ITR, Chandipur. The flight test was conducted as part of User evaluation trials. Both the missiles followed the intended trajectory meeting all flight objectives. pic.twitter.com/QeJYVDhL1l
— DRDO (@DRDO_India) December 31, 2025
ପ୍ରଳୟ କ୍ଷେପଣାସ୍ତ୍ର ସମ୍ପୂର୍ଣ୍ଣ ସ୍ୱଦେଶୀ ଜ୍ଞାନରେ ବିକଶିତ, ସଲିଡ୍ ଇନ୍ଧନ ବ୍ୟବହାର କରେ ଏବଂ ଅତ୍ୟନ୍ତ ସଠିକତାର ସହିତ ଲକ୍ଷ୍ୟଭେଦ କରିବାରେ ସକ୍ଷମ। ଏହା କ୍ୱାସି-ବାଲାଷ୍ଟିକ୍ କ୍ଷେପଣାସ୍ତ୍ର । ଏହା ଅତ୍ୟାଧୁନିକ ମାର୍ଗଦର୍ଶନ ଏବଂ ନାଭିଗେସନ୍ ପ୍ରଣାଳୀ ସହିତ ସଜ୍ଜିତ, ଯାହା ଏହାକୁ ଉଚ୍ଚ ସଠିକତା ସହିତ ଲକ୍ଷ୍ୟଭେଦ କରିବାକୁ ସକ୍ଷମ କରିଥାଏ। ଏହି କ୍ଷେପଣାସ୍ତ୍ର ବିଭିନ୍ନ ପ୍ରକାରର ଯୁଦ୍ଧାସ୍ତ୍ର ବହନ କରିପାରିବ ଏବଂ ଶତ୍ରୁ ସ୍ଥାନକୁ ଟାର୍ଗେଟ କରିପାରିବ। ଏହା ୫୦୦ ରୁ ୧୦୦୦ କିଲୋଗ୍ରାମ ଓଜନର ପାରମ୍ପରିକ ଯୁଦ୍ଧାସ୍ତ୍ର ବହନ କରିବାକୁ ସକ୍ଷମ, ଯାହା ଫଳରେ ଏହା ଶତ୍ରୁର ବଡ଼ ଏବଂ ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନକୁ ଟାର୍ଗେଟ କରିପାରିବ।
ଏହି କ୍ଷେପଣାସ୍ତ୍ରକୁ DRDO ଭାରତୀୟ କମ୍ପାନୀମାନଙ୍କ ସହଯୋଗରେ ବିକଶିତ କରିଛି। ଏହି କ୍ଷେପଣାସ୍ତ୍ରକୁ ହାଇଦ୍ରାବାଦର ଗବେଷଣା କେନ୍ଦ୍ର ଇମାରତ ଦ୍ୱାରା ଅନେକ DRDO ପରୀକ୍ଷାଗାର ସହାୟତାରେ ବିକଶିତ କରାଯାଇଥିଲା। ଭାରତ ଡାଇନାମିକ୍ସ ଲିମିଟେଡ୍ (BDL) ଏବଂ ଭାରତ ଇଲେକ୍ଟ୍ରୋନିକ୍ସ ଲିମିଟେଡ୍ (BEL) ର ଅବଦାନ ସହିତ ଭାରତୀୟ ଶିଳ୍ପ ଏହାର ବିକାଶରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା।
ଏହି ପରୀକ୍ଷଣକୁ DRDOର ବରିଷ୍ଠ ବୈଜ୍ଞାନିକ ଏବଂ ଭାରତୀୟ ବାୟୁସେନା ଏବଂ ଭାରତୀୟ ସେନାର ପ୍ରତିନିଧିମାନେ ଦେଖିଥିଲେ। ଏହି ସଫଳତା ପାଇଁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ DRDO, ସେନା, ବାୟୁସେନା ଏବଂ ଦେଶର ପ୍ରତିରକ୍ଷା ଶିଳ୍ପକୁ ଅଭିନନ୍ଦନ ଜଣାଇଛନ୍ତି। ସେ କହିଛନ୍ତି ଯେ ଗୋଟିଏ ଲଞ୍ଚରରୁ ଦୁଇଟି କ୍ଷେପଣାସ୍ତ୍ରର ସଫଳ ପରୀକ୍ଷଣ ସିଷ୍ଟମର ବିଶ୍ୱସନୀୟତାକୁ ପ୍ରଦର୍ଶନ କରୁଛି।
ଡିଆରଡିଓ ମୁଖ୍ୟ ଡକ୍ଟର ସମୀର ଭି. କାମତ କହିଛନ୍ତି ଯେ ଏହି ସଫଳତା ସୂଚାଇ ଦେଉଛି ଯେ ପ୍ରଳୟ କ୍ଷେପଣାସ୍ତ୍ର ଏବେ ସଶସ୍ତ୍ର ବାହିନୀରେ ସାମିଲ ହେବାର ବହୁତ ନିକଟତର। ଏହି ପରୀକ୍ଷଣ ଭାରତର କ୍ଷେପଣାସ୍ତ୍ର କ୍ଷମତା ଏବଂ ଆତ୍ମନିର୍ଭରଶୀଳ ପ୍ରତିରକ୍ଷା ଶକ୍ତିକୁ ନୂତନ ଶିଖରରେ ପହଞ୍ଚାଇବ।