ନୂଆଦିଲ୍ଲୀ:ଭାରତୀୟ ଜୁନିଅର ପୁରୁଷ ହକି ଦଳ ସୁଲତାନ ଜୋହୋର କପ୍ ୨୦୨୫ (Sultan of Johor Cup) ରେ ଦମଦାର ପ୍ରଦର୍ଶନ କରି ବିଜୟରୁ ଅଭିଯାନ ଆରମ୍ଭ କରିଛି । ଶନିବାର ଦିନ ମାଲେସିଆର ଜୋହୋର ବାହରୁର ତମାନ ଦୟା ହକି ଷ୍ଟାଡିୟମରେ ଗ୍ରେଟ ବ୍ରିଟେନକୁ ୩-୨ ଗୋଲରେ ପରାସ୍ତ କରିଛି ଟିମ୍ ଇଣ୍ଡିଆ ।
ଭାରତ ପକ୍ଷରୁ ଅଧିନାୟକ ରୋହିତ (୪୫+’, ୫୨’) ଏବଂ ରଭନୀତ ସିଂହ (୨୩’) ଗୋଲ ସ୍କୋର କରିଛନ୍ତି । ବିପକ୍ଷ ଦଳ ଗ୍ରେଟ୍ ବ୍ରିଟେନ ପକ୍ଷରୁ ମାଇକେଲ ରଏଡେନ (୨୬’) ଏବଂ କାଡେନ ଡ୍ରେସି (୪୬’) ଗୋଲ ସ୍କୋର କରିଥିଲେ।
ଭାରତ ପରବର୍ତ୍ତୀ ମ୍ୟାଚ୍ ୧୨ ଅକ୍ଟୋବର ରବିବାର ଦିନ ୧:୩୫ PM IST ରେ ନ୍ୟୁଜିଲ୍ୟାଣ୍ଡ ସହିତ ମୁହାଁମୁହିଁ ହେବ ।
ସୂଚନାଥାଉକି, ସୁଲତାନ ଜୋହୋର କପ୍ ୧୧ ରୁ ୧୮ ଅକ୍ଟୋବର ପର୍ଯ୍ୟନ୍ତ ମାଲେସିଆର ଜୋହର ବାହରୁରେ ଅନୁଷ୍ଠିତ ହେବ । ସୁଲତାନ ଜୋହର କପ୍ ଟୁର୍ଣ୍ଣାମେଣ୍ଟରେ ଭାରତ ଦ୍ୱିତୀୟ ସବୁଠାରୁ ସଫଳ ଦଳ । ଭାରତ ତିନି ଥର (୨୦୧୩, ୨୦୧୪ ଏବଂ ୨୦୨୨) ଟାଇଟଲ ହାସଲ କରିଛି । କେବଳ ଗ୍ରେଟ୍ ବ୍ରିଟେନ, ଚାରୋଟି ଟାଇଟଲ ସହିତ, ଅଧିକ ଥର ଟ୍ରଫି ଉଠାଇଛି।
ଦେଖିବାକୁ ଗଲେ ସୁଲତାନ ଜୋହର କପ୍ ଟୁର୍ଣ୍ଣାମେଣ୍ଟ ରେ ଭାରତୀୟ ହକି ଦଳ ମଧ୍ୟ ଚାରୋଟି ରୌପ୍ୟ ପଦକ (୨୦୧୨, ୨୦୧୫, ୨୦୧୮, ୨୦୧୯) ଏବଂ ଦୁଇଟି କାଂସ୍ୟ ପଦକ (୨୦୨୩ ଏବଂ ୨୦୨୪) ହାସଲ କରିଛନ୍ତି ।
ଟୁର୍ଣ୍ଣାମେଣ୍ଟ ପୂର୍ବରୁ ଭାରତୀୟ ଜୁନିଅର ପୁରୁଷ ହକି ଦଳର ପ୍ରଶିକ୍ଷକ ପିଆର ଶ୍ରୀଜେଶ କହିଛନ୍ତି, “ସୁଲତାନ ଅଫ୍ ଜୋହର କପ୍ ସବୁବେଳେ ଆମ ପାଇଁ ଏକ ସ୍ୱତନ୍ତ୍ର ଟୁର୍ଣ୍ଣାମେଣ୍ଟ ହୋଇଆସିଛି – ଯେଉଁଠାରେ ଆମର ବର୍ତ୍ତମାନର ଅନେକ ବରିଷ୍ଠ ଖେଳାଳି ପ୍ରଥମେ ନିଜର ଛାପ ସୃଷ୍ଟି କରିଥିଲେ। ଏହା ଯୁବ ଖେଳାଳିମାନଙ୍କୁ ବିଶ୍ୱର ଶ୍ରେଷ୍ଠ ଖେଳାଳିମାନଙ୍କ ବିରୁଦ୍ଧରେ ନିଜକୁ ପରୀକ୍ଷା କରିବା ଏବଂ ଅନ୍ତର୍ଜାତୀୟ ସ୍ତରରେ ସ୍ଥିର ପ୍ରଦର୍ଶନ ପାଇଁ କ’ଣ ଆବଶ୍ୟକ ତାହା ବୁଝିବା ପାଇଁ ଏକ ଉତ୍ତମ ମଞ୍ଚ ପ୍ରଦାନ କରେ।”
ଆହୁରି ମଧ୍ୟ ସେ କହିଥିଲେ , “ଏହି ଟୁର୍ଣ୍ଣାମେଣ୍ଟ ଚଳିତ ବର୍ଷ ଶେଷରେ ଜୁନିଅର ବିଶ୍ୱକପ୍ ପାଇଁ ପ୍ରସ୍ତୁତି ପାଇଁ ଏକ ଭଲ ପ୍ଲାଟଫର୍ମ ଭାବରେ ମଧ୍ୟ କାର୍ଯ୍ୟ କରିବ। ଏହି ଟୁର୍ଣ୍ଣାମେଣ୍ଟରେ ଶକ୍ତିଶାଳୀ ଦଳଗୁଡ଼ିକର ମୁକାବିଲା ଖେଳାଳିମାନଙ୍କୁ ମୂଲ୍ୟବାନ ଅଭିଜ୍ଞତା ଏବଂ ଶୀର୍ଷ ସ୍ତରୀୟ ପ୍ରତିଯୋଗିତାର ପ୍ରକୃତ ଅନୁଭବ ଦେବ । ”
ଶ୍ରୀଜେଶ ଶେଷରେ କହିଥିଲେ “ଆମେ ପ୍ରତ୍ୟେକ ପ୍ରତିଦ୍ୱନ୍ଦ୍ୱୀଙ୍କୁ ସମ୍ମାନ କରୁ, କିନ୍ତୁ ଆମର ଧ୍ୟାନ ଆମର ବ୍ରାଣ୍ଡ ହକି ଖେଳିବା ଉପରେ – ଦ୍ରୁତ, ନିର୍ଭୀକ ଏବଂ ବୁଦ୍ଧିମାନ। ଦଳ ଜାଣେ ଯେ ଏହି ଟୁର୍ଣ୍ଣାମେଣ୍ଟରେ ଭାରତ କେତେ ଐତିହ୍ୟ ରଖିଛି ଏବଂ ଖେଳାଳିମାନେ ସେହି ପରମ୍ପରାକୁ ବଜାୟ ରଖିବାକୁ ଏବଂ ଶୀର୍ଷ ସ୍ଥାନ ପାଇଁ ଲକ୍ଷ୍ୟ ରଖିବାକୁ ଦୃଢ଼ ପ୍ରତିବଦ୍ଧ । ”
Comments are closed.