India GDP: ଭାରତର ଅର୍ଥନୀତିରେ ଲାଗିଲା ଡେଣା, ପ୍ରଥମ ତ୍ରୈମାସିକରେ ୭.୮% ରେକର୍ଡ ବୃଦ୍ଧି, ୨୦୨୬ରେ ବି ଭାଙ୍ଗିବ….

ନୂଆଦିଲ୍ଲୀ: ଏବେ ସତେ ଯେପରି ଭାରତୀୟ ଅର୍ଥନୀତିକୁ ଡେଣା ଲାଗିଯାଇଛି। ଟ୍ରମ୍ପଙ୍କ ଟାରିଫ୍, ବାଣିଜ୍ୟ ଅନିଶ୍ଚିତତା ମଧ୍ୟରେ ବି ରେକର୍ଡ଼ ଭାଙ୍ଗୁଛି। ସରକାରଙ୍କ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଜୁନ୍ ୨୦୨୫ ତ୍ରୈମାସିକରେ ଭାରତର ମୋଟ ଘରୋଇ ଉତ୍ପାଦ (GDP) ୭.୮ ପ୍ରତିଶତ ଅଭିବୃଦ୍ଧି ରେକର୍ଡ କରିଛି। ଏହି ସଂଖ୍ୟା ଗତ ବର୍ଷର ସମାନ ତ୍ରୈମାସିକରେ ୬.୫ ପ୍ରତିଶତ ଅଭିବୃଦ୍ଧି ଅପେକ୍ଷା ଭଲ। ଯେତେବେଳେ, ପୂର୍ବ ତ୍ରୈମାସିକରେ GDP ହାର ୭.୪ ପ୍ରତିଶତ ଥିଲା। ଶିଳ୍ପ ଅଭିବୃଦ୍ଧି ଯୋଗୁଁ କାର୍ଯ୍ୟଦକ୍ଷତା ଉପରେ ଚାପ ପଡ଼ିଥିଲା। ଏହି ଅଭିବୃଦ୍ଧି ହାର RBIର ୬.୫ ପ୍ରତିଶତ ଆକଳନଠାରୁ ମଧ୍ୟ ଅଧିକ। RBI ଚଳିତ ଆର୍ଥିକ ବର୍ଷରେ ପ୍ରଥମ ତ୍ରୈମାସିକ ପାଇଁ GDP ହାର ୬.୫ ପ୍ରତିଶତ, ଦ୍ୱିତୀୟ ତ୍ରୈମାସିକ ପାଇଁ ୬.୭ ପ୍ରତିଶତ, ତୃତୀୟ ତ୍ରୈମାସିକ ପାଇଁ ୬.୬ ପ୍ରତିଶତ ଏବଂ ଚତୁର୍ଥ ତ୍ରୈମାସିକ ପାଇଁ ୬.୩ ପ୍ରତିଶତ ରହିବ ବୋଲି ଆକଳନ କରିଛି।

ରିପୋର୍ଟ ଅନୁଯାୟୀ, ଏହି ଅଭିବୃଦ୍ଧି ଆମେରିକା ଦ୍ୱାରା ଭାରତ ଉପରେ ଉଚ୍ଚ ଶୁଳ୍କ ଲାଗୁ କରିବା ପୂର୍ବରୁ ହୋଇଛି। ଶୁକ୍ରବାର ଦିନ ଜାତୀୟ ପରିସଂଖ୍ୟାନ କାର୍ଯ୍ୟାଳୟ (NSO) ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, କୃଷି କ୍ଷେତ୍ର ଏହି ଅଭିବୃଦ୍ଧିରେ ଗୁରୁତ୍ୱପୂର୍ଣ୍ଣ ଅବଦାନ ରଖିଛି। ଏହି ତ୍ରୈମାସିକରେ କୃଷି କ୍ଷେତ୍ର ୩.୭ ପ୍ରତିଶତ ଅଭିବୃଦ୍ଧି ପଞ୍ଜିକୃତ କରିଛି, ଯାହା ଗତ ବର୍ଷ ସମାନ ଅବଧିରେ ୧.୫ ପ୍ରତିଶତ ଥିଲା। ସରକାର ବିଶ୍ୱାସ କରନ୍ତି ଯେ ଚଳିତ ଆର୍ଥିକ ବର୍ଷରେ ଭାରତର ଅର୍ଥନୀତି ଶକ୍ତି ସହିତ ଆଗକୁ ବଢ଼ିବ, ଯଦିଓ ବିଶ୍ୱ ଆର୍ଥିକ ଅନିଶ୍ଚିତତା ଏବଂ ମୌସୁମୀ ପରିସ୍ଥିତି ଉପରେ ମଧ୍ୟ ନଜର ରଖାଯାଇଛି।

ଭାରତ ପୁଣି ଥରେ ବିଶ୍ୱର ଦ୍ରୁତତମ ଅଭିବୃଦ୍ଧିଶୀଳ ପ୍ରମୁଖ ଅର୍ଥନୀତିର ଆଖ୍ୟା ବଜାୟ ରଖିଛି। ଏହି ପ୍ରଦର୍ଶନ ତୁଳନାରେ, ସେହି ଅବଧିରେ ଚୀନର GDP ଅଭିବୃଦ୍ଧି ୫.୨ ପ୍ରତିଶତ ଥିଲା। ଉତ୍ପାଦନ କ୍ଷେତ୍ର ସାମାନ୍ୟ ଉନ୍ନତି ଦେଖାଇଛି ଏବଂ ୭.୭ ପ୍ରତିଶତ ଅଭିବୃଦ୍ଧି ରେକର୍ଡ କରିଛି, ଯାହା ଗତ ବର୍ଷ ସମାନ ତ୍ରୈମାସିକରେ ୭.୬ ପ୍ରତିଶତ ଥିଲା। ପୂର୍ବ ସର୍ବାଧିକ GDP ଅଭିବୃଦ୍ଧି ଜାନୁଆରୀ-ମାର୍ଚ୍ଚ ୨୦୨୪ ରେ ଦେଖାଯାଇଥିଲା, ଯେତେବେଳେ ଅର୍ଥନୀତି ୮.୪ ପ୍ରତିଶତ ବୃଦ୍ଧି ପାଇଥିଲା।

ଭାରତୀୟ ରିଜର୍ଭ ବ୍ୟାଙ୍କ (RBI) ଏହି ମାସ ଆରମ୍ଭରେ ୨୦୨୫-୨୬ ପାଇଁ GDP ଅଭିବୃଦ୍ଧି ୬.୫% ଆକଳନ କରିଥିଲା। ଏପ୍ରିଲ-ଜୁନ୍ ଅଭିବୃଦ୍ଧି ହାର ୭.୮% RBIର ଆକଳନ ଅପେକ୍ଷା ବହୁତ ଅଧିକ, ଯାହା ଅର୍ଥନୈତିକ ଶକ୍ତିକୁ ଇଙ୍ଗିତ କରେ, ଯଦିଓ ଭବିଷ୍ୟତରେ ଭାରୀ ଆମେରିକାର ଶୁଳ୍କ ଏବଂ ବିଶ୍ୱ ଅନିଶ୍ଚିତତାର ପ୍ରଭାବ ମଧ୍ୟ ଦେଖାଯାଇପାରେ।

ଯାହାକୁ ନେଇ ମୁଖ୍ୟ ଅର୍ଥନୈତିକ ପରାମର୍ଶଦାତା ଭି ଅନନ୍ତ ନାଗେଶ୍ୱରନ ଶୁକ୍ରବାର ଦିନ ବିଶ୍ୱାସ ପ୍ରକାଶ କରିଛନ୍ତି ଯେ ଭାରତୀୟ ଅର୍ଥନୀତି ଚଳିତ ଆର୍ଥିକ ବର୍ଷରେ ଘରୋଇ ଚାହିଦା ବୃଦ୍ଧି କରିବା ସହିତ ୬.୩ ରୁ ୬.୮ ପ୍ରତିଶତ ମଧ୍ୟରେ ଅଭିବୃଦ୍ଧି ପାଇବ, ଯଦିଓ ଆମେରିକାର ୫୦ ପ୍ରତିଶତ ଅଧିକ ଶୁଳ୍କ ଲାଗୁ ହେବା ଯୋଗୁଁ ଆକଳନରେ କିଛି ପ୍ରତିକୂଳ ବିପଦ ରହିବ । ସେ କହିଛନ୍ତି, ଉଚ୍ଚ ଶୁଳ୍କ କ୍ଷଣସ୍ଥାୟୀ ହେବ ବୋଲି ଆଶା କରାଯାଉଛି କାରଣ ଉଭୟ ଦେଶ ୨୫ ପ୍ରତିଶତ ଦଣ୍ଡ ଶୁଳ୍କ ହଟାଇବା ଏବଂ ପରବର୍ତ୍ତୀ ଦ୍ୱିପାକ୍ଷିକ ବାଣିଜ୍ୟ ଚୁକ୍ତି ପାଇଁ ଆଲୋଚନା କରୁଛନ୍ତି।ତଥାପି ଆମେରିକା ଦ୍ୱାରା ଲାଗୁ କରାଯାଇଥିବା ପାରସ୍ପରିକ ଶୁଳ୍କ ଏବଂ ଦଣ୍ଡ ଶୁଳ୍କ ସତ୍ତ୍ୱେ, ପ୍ରଥମ ତ୍ରୈମାସିକ ଅଭିବୃଦ୍ଧିର ସ୍ଥିରତା ଦେଖାଯାିଛି ।ଆମେ ଚଳିତ ଆର୍ଥିକ ବର୍ଷ ପାଇଁ ଅଭିବୃଦ୍ଧି ହାର ଆକଳନକୁ ୬.୩-୬.୮ ପ୍ରତିଶତରେ ବଜାୟ ରଖିଛୁ । ବୋଲି ନାଗେଶ୍ୱରନ କହିଛନ୍ତି ।