Israel’s parliament in Indian tricolour: ପହଞ୍ଚିନାହାନ୍ତି ମୋଦୀ, ଇସ୍ରାଏଲ ସଂସଦରେ ଝଲସିଲା ତ୍ରିରଙ୍ଗା
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଦିଲ୍ଲୀର ପାଲମ ବାୟୁସେନା ଷ୍ଟେସନରୁ ଦୁଇ ଦିନିଆ ଇସ୍ରାଏଲ ଗସ୍ତ ପାଇଁ ଯାତ୍ରା କରିଛନ୍ତି। ହେଲେ ପ୍ରଧାନମନ୍ତ୍ରୀ ମୋଦୀଙ୍କ ଇସ୍ରାଏଲ ପହଞ୍ଚିବା ପୂର୍ବରୁ ଇସ୍ରାଏଲୀ ସଂସଦ, ନେସେଟ୍, ତ୍ରିରଙ୍ଗାରେ ଆଲୋକିତ ହୋଇଥିଲା। ନେସେଟ୍ ବାଚସ୍ପତି ପ୍ରଧାନମନ୍ତ୍ରୀ ମୋଦିଙ୍କ ସମ୍ମାନାର୍ଥେ ଏକ୍ସରେ ଏହି ଫଟୋ ସେୟାର କରିଛନ୍ତି। ପ୍ରଧାନମନ୍ତ୍ରୀଙ୍କ ଗସ୍ତ ସମୟରେ ଭାରତ ଏବଂ ଇସ୍ରାଏଲ ମଧ୍ୟରେ ପ୍ରତିରକ୍ଷା ଚୁକ୍ତି ସମେତ ଅନେକ ପ୍ରମୁଖ ଚୁକ୍ତି ସ୍ୱାକ୍ଷରିତ ହେବାର ଆଶା କରାଯାଉଛି। ଏହି ସମୟରେ, ପ୍ରଧାନମନ୍ତ୍ରୀ ମୋଦିଙ୍କ ତେଲ ଅଭିଭରେ ପହଞ୍ଚିବା ପୂର୍ବରୁ, ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଭାରତକୁ ହେକ୍ସାଗନ ମେଣ୍ଟରେ ସାମିଲ କରି ତୁର୍କୀ ଏବଂ ପାକିସ୍ତାନ ଭଳି ଦେଶକୁ ଏକ ବଡ଼ ଝଟକା ଦେଇଛନ୍ତି।
ସେପଟେ ଆଜି ସନ୍ଧ୍ୟାରେ, ପ୍ରଧାନମନ୍ତ୍ରୀ ମୋଦୀ ଇସ୍ରାଏଲୀ ସଂସଦ, ନେସେଟକୁ ସମ୍ବୋଧିତ କରିବେ। ଯାହା ଦୃଢ଼ ସଂସଦୀୟ ଏବଂ ଗଣତାନ୍ତ୍ରିକ ସମ୍ପର୍କକୁ ସମ୍ମାନିତ କରିବାର ଏକ ଗୁରୁତ୍ୱପୂର୍ଣ୍ଣ ମୁହୂର୍ତ୍ତ ବୋଲି କହିଛନ୍ତି ପ୍ରଧାନମନ୍ତ୍ରୀ ମୋଦୀ। ଏହା ଜଣେ ଭାରତୀୟ ପ୍ରଧାନମନ୍ତ୍ରୀଙ୍କ ଦ୍ୱାରା ନେସେଟରେ ପ୍ରଥମ ଅଭିଭାଷଣ ହେବ, ଯାହା ଦୁଇ ଦେଶ ମଧ୍ୟରେ ଗଭୀର ବନ୍ଧୁତା ଏବଂ ସମାନ ମୂଲ୍ୟବୋଧକୁ ଗୁରୁତ୍ୱାରୋପ କରିବ। ଏହା ପ୍ରଧାନମନ୍ତ୍ରୀଙ୍କ ଦ୍ୱିତୀୟ ଇସ୍ରାଏଲ ଗସ୍ତ। ପ୍ରଥମ ଥର ୨୦୧୭ ରେ ସେ ପ୍ରଥମ ଥର ପାଇଁ ଇସ୍ରାଏଲ ଗସ୍ତ କରିଥିଲେ। ଏହି ଗସ୍ତ ସମୟରେ, ଭାରତ ପ୍ରତିରକ୍ଷା ସହଯୋଗ, AI, ସାଇବର ସୁରକ୍ଷା, IMEC ପ୍ରକଳ୍ପ ଏବଂ ଆଞ୍ଚଳିକ ସ୍ଥିରତା ଭଳି ପ୍ରସଙ୍ଗରେ ନୂତନ ଚୁକ୍ତିନାମା ଏବଂ ସହଭାଗୀତାକୁ ଆଗକୁ ବଢ଼ାଇବା ଉପରେ ଧ୍ୟାନ ଦେବ। ଭାରତ ଏବଂ ଇସ୍ରାଏଲ ମିଳିତ ଭାବରେ ବିଶ୍ୱସ୍ତରୀୟ ଚ୍ୟାଲେଞ୍ଜକୁ ମୁକାବିଲା କରିବା ଏବଂ ପ୍ରଗତି ପାଇଁ ନୂତନ ପଥ ନିର୍ମାଣ କରିବା ପାଇଁ ସାହାଯ୍ୟ କରିବ।
ହେକ୍ସାଗନ୍ ମେଣ୍ଟରେ ଭାରତ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଇସ୍ରାଏଲ ଗସ୍ତ ପୂର୍ବରୁ, ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଏକ ବଡ଼ ଘୋଷଣା କରିଛନ୍ତି, ଯାହା ପାକିସ୍ତାନ ଏବଂ ତୁର୍କୀ ଭଳି ଦେଶମାନଙ୍କୁ ଗଭୀର ଚିନ୍ତିତ କରିଛି। ନେତାନ୍ୟାହୁ ଉଗ୍ରବାଦୀ ଏବଂ ଆତଙ୍କବାଦୀଙ୍କ ମୁକାବିଲା ପାଇଁ ସେ ସୃଷ୍ଟି କରିଥିବା ସଂଗଠନ, ହେକ୍ସାଗନ ମେଣ୍ଟରେ ଭାରତକୁ ସାମିଲ କରିଛନ୍ତି। ନେତାନ୍ୟାହୁ କହିଛନ୍ତି, “ମୋର ଦୃଷ୍ଟିକୋଣ ହେଉଛି ଯେ ଆମେ ମଧ୍ୟପ୍ରାଚ୍ୟ ଚାରିପାଖରେ କିମ୍ବା ଭିତରେ ଏକ ସମ୍ପୂର୍ଣ୍ଣ ବ୍ୟବସ୍ଥା ସୃଷ୍ଟି କରିବୁ, ମୂଳତଃ ମେଣ୍ଟର ଏକ ‘ଷଡ଼ଭୂଜ’।” ଭାରତକୁ ଏକ “ବିଶ୍ୱ ଶକ୍ତି” ଏବଂ ପ୍ରଧାନମନ୍ତ୍ରୀ ମୋଦିଙ୍କୁ “ବ୍ୟକ୍ତିଗତ ବନ୍ଧୁ” ଭାବରେ ବର୍ଣ୍ଣନା କରି ନେତାନ୍ୟାହୁ କହିଛନ୍ତି ଯେ ଦୁଇ ଦେଶ ମଧ୍ୟରେ ସମ୍ପର୍କ “ମଜବୁତ ହୋଇଛି।”
ତେବେ ଆତଙ୍କବାଦକୁ ବିରୋଧ କରୁଥିବା ସଂଗଠନ ହେକ୍ସାଗନ୍ ଆଲାଏନ୍ସ। ଯେଉଁଥିରେ ଭାରତ ଏବଂ ଇସ୍ରାଏଲ ବ୍ୟତୀତ, ଏଥିରେ ଆରବ ରାଷ୍ଟ୍ର, ଆଫ୍ରିକୀୟ ରାଷ୍ଟ୍ର, ଭୂମଧ୍ୟସାଗରୀୟ ରାଷ୍ଟ୍ର (ଗ୍ରୀସ୍ ଏବଂ ସାଇପ୍ରସ୍) ଏବଂ ଏସିଆର ଅନ୍ୟାନ୍ୟ ଅଜ୍ଞାତ ରାଷ୍ଟ୍ର ଅନ୍ତର୍ଭୁକ୍ତ। ଏହି ବର୍ଣ୍ଣନା IMEC (ଭାରତ-ମଧ୍ୟପ୍ରାଚ୍ୟ-ୟୁରୋପ ଅର୍ଥନୈତିକ କରିଡର) ର ଦୃଷ୍ଟିକୋଣ ସହିତ ବ୍ୟାପକ ଭାବରେ ମେଳ ଖାଉଛି, ଯାହା ସଂଯୋଗକୁ ପ୍ରୋତ୍ସାହିତ କରି ଆର୍ଥିକ ବିକାଶକୁ ସୁଦୃଢ଼ କରିବା ଲକ୍ଷ୍ୟ ରଖିଛି। ଏହି ମିଳିତତା ବାସ୍ତବତା, ଚ୍ୟାଲେଞ୍ଜ ଏବଂ ଲକ୍ଷ୍ୟ ଉପରେ ସହମତ ରାଷ୍ଟ୍ରଗୁଡ଼ିକର ଏକ ଅକ୍ଷ ସୃଷ୍ଟି କରିବାକୁ ଲକ୍ଷ୍ୟ ରଖିଛି। ଏହି ସଂଗଠନ ବିଶେଷ ଭାବରେ ଉଗ୍ରବାଦୀ ଶିୟା ଏବଂ ସୁନ୍ନି ମୁସଲମାନମାନଙ୍କର ବିରୋଧ କରେ। ଇସ୍ରାଏଲୀ ନେତା କହିଛନ୍ତି ଯେ ଏହି ରାଷ୍ଟ୍ରଗୁଡ଼ିକର ଭିନ୍ନ ଧାରଣା ଥିଲେ ମଧ୍ୟ ସେମାନଙ୍କ ମଧ୍ୟରେ ସହଯୋଗ “ମହାନ ଫଳାଫଳ” ଆଣିପାରିବ ଏବଂ ସେମାନଙ୍କର “ସହନଶୀଳତା ଏବଂ ଭବିଷ୍ୟତ” ସୁନିଶ୍ଚିତ କରିପାରିବ।